eK! is electronic Kabalen, a web-exclusive Kapampangan journal of ideas

cecile s. yumul
cecile s yumul Thy Kingdoom's Come 2

Ema. Gang man nu me biayan, malyari ya dayat malat o danum tabang, kumabie ya. Ken ping bebe dalan akit mu lang pakatali. Ating manangung mamisali. Pupulayi ing ulaga da 500 anggang 700 dalan a pesus ing kilu. Malumut-lumut la man a itsura, potang mibangli na la king bubukal a danum, tingkad ne ing ma-red orange dang kulor anti da reng paro mangaragul mu naman. Nung timtiman me asneng baiat ing ema. Pero, dakal kaniting timbang na mumunta king makapal ng talukab.

Mekad bayu de arakap, lalu na deng e sane, akua dang mangasipit at taganang maybug kang maputal a laman istung ikua na kang asipit ning ema uling e naka itabili, gang nan meng pamisig.

It only shows that some of the most coveted, expensive stuff that makes one salivate do not really give value for money spent. What may have given temporary pleasure rewards you too with high blood pressure!

Galunggong. Agad deng gauan sukad kabilian ning pakakalulu. O rugo, ening kaorasan, ga man ing galunggng e na ne agyung saliuan king sientu beinte ing kilu. Mate niang makamulala ing taung malda.

Ing egana-gana lawen yu, pati ing katas ning mangalbug ustung atin bagyu, matalik mitas. Ing nang sueldu da ring aldauan obreru ing e mitatas.

Gurami. Daragul lang anti king palad a makapalad. Mapinu la at kikintab kaliskis. Ating mapinung antimong aduang antenna, at mapinu la naman palikpik. Malagu lang akakit. Neng kayi pin pati karing petshop manakit kang mipapalili.

Keti Kapampangan, metung la karing pinakamaniaman gagauan burung asan uling maputi at malambut la laman, pati na suksuk akua ng marunut potang meburu at igisa mu ne.

Kaibat ning maragul a danum, oreni ding mumuna dang ararakap ding magkulangan panulam ding kayayalbugan. Nu la manibat, makananu lang misasalba king mangaragul a albug? Uyta ing pagmulalan.

(H)ito. Kaustuan la dagul, matuling la balat, e la makasauang a dagul, oreni ring native a (h)ito manibat karing baryu. Ningnang, pirito, daingan o buruan mu la, ala kang tulak kabiran kareni. Maniaman la ngan king dila at batal ning Kapampangan. Abayan miang pepayalbug a apaliang layas balasenas a bilug o gang man tulungkaba a tiniltil king aslam sasa, patis at ginaiat a laya. Haaaaaisssst!

Aniang lungub na ing bandang dekada nobenta, anti la mong mepupus a bini, diritak at diritak lang bina angga king ding mitagan aliua na la itsura pati kulor ding (h)ito. Megi lang mala-abu at atin pang amanuan dang albino.

Ding native (h)ito bigla lang limbug. Sarili dang balayan, nu la kawe-kawe manibat pa king minunang panaun, ngeni ikua dang merayig karing kabud na dinatang at mibulus ala man kapamunan.

Anta makananu ka? Pelubanan da lang imported a la'i ring ausan dang African Hito. Asno pin dagul, eno man malinamnam at maputla la, pati laman makuniat la.

Ding kekatamung (h)ito megi la naman "endangered species." Liklak da ring dayu na mibulus mapalyaring mekauala karing plasdan misan mikayalbug at ikua dong deyigan ding mas malati tamung (h)ito.

Akit mu na atin uangis ining bie ding asan danum king datang da ring sasakup at kakua king kekatamung mitatagan a "natural resources." Daratang la ring dayu at lalaklakan da ngan, aldukan da la ring mangalating disan dang mangabiaian.

Lialu ampong licauc. Pipilan na kekatamu ing makibalu nanu la ta lasa at itsura dening mesabing asan. Mamanawun la reni. Ustu mung bandang lulub ing bulan ating "ber" karin mu la akit nung dumulung ka palengki. Nung ali man, ding sasaka king baryu, payangu da la idalang paglibe, ayuli dang aliuang asanan manibat naman king ciudad.

Eno man tantung mangadagul, pero tiktak no man king linamnam a lasa laman. Kaustuan la dagul, mangasias la palikpik ampo kaliskis. Makanian man, ustung ustu la pangatinama king bauang, aslam, dildak magaspang a paminta, pikpuk a laya, pebukal, at itang alus ipasipsip mu ngan angga king malapit nang mamala ing pibukalan, kanita mula pa pirituan. Ay nuko! Mituag ya pati ing bangi king kalderu.

Atin nang mga atlung banua. Manibat niang digpanan nakatamung Ondoy at Peping. Ala nakung ikit king palengki dadalan da ring memaryu. Kabud na la mu naman limbug anting bula. Ni eku ayisip ing letratuan kula uling balu ku andat datang ing tauling atlung bulan king pabanua sumaka no ring dakal a lialu ampong licauc. Tauli na. Gang numanu kung mag-istorya, angga nia karin.

It is more than just losing local fish species. It is in fact part of local culture and tradition that we will never see the likes of them again.


[About the author. A renaissance social worker, a revolutionary teacher, a supporter of artists, a trail-blazing woman of substance, Cecile S. Yumul is an embodiment of the phrase "Carpe diem!" This multi-awarded teacher/broadcast journalist started her broadcasting career over 27 years ago. Her radio/tv show "Bukas Bayan" has been on air since 1999 and is still airing with a multi-sectoral fan base. She is an accomplished cook, a mystic gardener, an actress, and a true environmentalist—a distinction she is indeed proud of.]

-Posted: 8:08 AM 10/21/11 | More of this author on eK!
Nextnext