eK! is electronic Kabalen, a web-exclusive Kapampangan journal of ideas

cecile s. yumul
cecile s yumul Thy Kingdoom's Come 1

Alitaptap. Mayayakit karing mitatagan pang malapulu kapal ding matuang tanaman. Keta kekami Gintung Pakpak Eco Park at matanaman parte ning Mt. Arayat, piyalben la pa ustung datang na ing dalumdum. Kanita ustung megmaneu kang bengi apapaslagan mula pang headlights da ring saken misasagana kayu sala king kabengian.

Ngeni, pati na kareng aliaung baryu, aliua nalang alitaptap deng papaslag ustung bengi. Neng kayi, karatula ya o lagyu ne ning beerhouse. At ening papalapit ne ing Pasku, kate-kate lang babaratilyu pati kareng bangketa, mangalating sulu, anti mong alitaptap, puru gaua Tsina. Nung mamalas-malas ka, sali lusis, kutitap a masala, silab tutuking bengi.

Fireflies, are one of the best measures of a balanced ecosystem. To miss them among the trees is to raise alarm and concern.

Barag. Kareng sukal, kareng aplaya, maburak gilid-gilid, gaua lang lungga, ibayit da la ring ebun asna lambut balat. Uling ing tau, ikua na lang atakman linamnam, gang ela sukat pakialaman uling metung lang makasawup king pamagbalanse king kayang kapaligiran, geua nalang anti mong pampatibe tud. Ena man inisip ing katataulian maigit ing perwisyu king saglian niang sinipsip laman ing ebun barag.

Ngeni, ela barag nune pati itang marking t-shirt lupang pamilia da reng barag, sinaka la emu karing mialiuang barangay hall, munisipyu, kapitolyu, anggang Malacañan ikua rang miras. Ya kaya ing kablas ning pamamangan karing barag, ela itsurang barag nune daig dala pang laklak, manyagpang bie ra ring mangalati karela't alang laban?

Karag. Nula ta menibat dening poison frog a reni? Dati na ding kekatamung tugak, ilang asna karakal. Kumokak nala ustung kaibat ning uran. Kaibat atin pang mialiua—tugak batan, tugak saba. Butiti la pa mamangan na lang tuad-tuad, ania gang mamanuran at atin magpondung danum alang yemuk manuktuk. Neng megisan nala uling malalasun la king kakabit dang panulu bang sagli lunsut at taba ing pale. Emu ita, detang mitatagan, keta pin kaibat ng dinalan Pedring, ding manunugak, makapila lang papaduas dane ning NSO, uling atin pang mitagan a marangle e da pa gisan sekupan ding mag-real estate.

Ngeni, king kerakalan da, banda norte, nula linikas, ding akakaua da, geua dalang pataka, lulanan pera o kaya pabito anti mong kwintas. At ela karag a posion frog ding luksu-luksu emu neng madalumdum, king dalan a sementadu, nune, pati king istasyun pulis, kungresu at senadu luksu-luksu la't maglub ding karag at gangman. Mabie la, lulan dala naman sinlalam balun ing perang pipawasan buwis ding memalen.

Dagis. Ating mialiua kulor, uling mialua la pipaglungga. Dagis pale: deni potang tutung darakal la, uling malinis no man, darakpan dala at gagauan adobu at ulaman. Dagis bale, dagis bodega, dagis mabibie king pitak, kanal at egana-ganang piyugsianan basura: ila mu naman ding magpakalat king metung makamate sakit ustung datang ing madagul a albug, nung atin kang sugat, galus o nanu man malating megasgas, lungub ing mikrobiu at dagpanan na ka ning leptospirosis. Metung mung paris a dagis agyu dang manganak magparakal 33,000 kilub ning pabanua.

Ngeni, lalu na ustung sasabian dang magkulangan ing supply na kanu ning abias, mialiua lang dagis ding lulub karing bodega ning NFA. Neng kayi ela man gagapang ustung ala ng tau. Basta't abalu mu namu, midagisan ing supply ning abias at kulang na king bilang ing pakasakung dapat sana karing maldang tawu miras para itun at kanan. Mekad, dagis-dagisan la mu ding linusub mitake karing pakasakung abias, nia pati saku emu man abakas ing pingatngatan.


[About the author. A renaissance social worker, a revolutionary teacher, a supporter of artists, a trail-blazing woman of substance, Cecile S. Yumul is an embodiment of the phrase "Carpe diem!" This multi-awarded teacher/broadcast journalist started her broadcasting career over 27 years ago. Her radio/tv show "Bukas Bayan" has been on air since 1999 and is still airing with a multi-sectoral fan base. She is an accomplished cook, a mystic gardener, an actress, and a true environmentalist—a distinction she is indeed proud of.]

-Posted: 10:10 PM 10/10/11 | More of this author on eK!
Nextnext