eK! is electronic Kabalen, a web-exclusive Kapampangan journal of ideas

cecile s. yumul
cecile s yumul Talangca

Panenaian. Picacaiatan uaua. Abatan me ing padatang a cauran. Caiagnan nang matda ing pali, malabatu ing patac mumunang uran. Caibat ing singo alilum, dimla na ing tiup angin. Gang bengi patic-patic ing banaiad at mapinung ambun. Palabasan mu ing mapilan aldo, paca tambayuc nala deng manangung talangca. Pirmi uian ing milabasan angga quetang 2009. Tabalu nung pilan pa quecayu ing mecatabnung talangca caibat niting banuang iti. Melagad at limbug la anting bula. Megi la naman "endangered species" ding tutung talangca.

Oneng naman, lingcas la ring masiring clasi daring talangca. Emu na la iangu man. Memaniaca la, tictac catuling gagapang sinaca, emu pampang nune caring anggang lugal a maliari dang salambon.

Burung Talangca

Abac maranun, ita pang p'aslag ia ing aldo, cuculait na la ring manangung talangca. Bayung saca, mabie lang mabie, as na la pa casican manyipit. Cuculam lang mangalauat quing pangadapuk dang lambat. Ustung matuling la talucab, lalu lang malinamnam. Tagal-tagalan mu ing bie da, tambunan lang asin pacalulan gusi. Nung agyu mung abata ing caibug mu nang mamusit bayung burung talangca, pibatan me gang mung atlung aldo bayu mo iaun at iapag. Ternuan me mung bayung tun a nasi, itang busuc-busuc ia quing pali.

Adua ca pipamilian tiltilan, pisit calamunding o aslam sasa. Ba naca man e curucul a atian kaibat mung mengan burung talangca, abaianan me tambing ligang bulung biabas, anti mong tsa, o nung atin cang paniali, 7 Up (bayu la pa memangalto ding mialiuang tatac). Tabac mu batu, mulayi ca banyu ustung eme macanian tinernuan ing pamamangan burung talangca.

Utac Talangca

Mipanabit pababa. Mipanuclu bang miyuciat. Nung pibalac meng tutu, ena man tantung ustu iting casebian ayni, uling ding talangca mipaniaup la liuas-liuas balang miyuciat.

Oneng ing dacal caring tau, pablasang eda aiintindian ing acacuit da, pablasang eno man talangca, dininan deng matsurang cabaldugan iti. (My apology to the crab species.)

Macanian mu naman ining mengapalyari milabasan pang bulan.

Emu agyung aisip nung emu gagauan. Ing nanu caiang lunto, iang ipasiag at lumual asbuc mu potang aduanan dacang amanu. Pacasutana. Pacabelu, pati alang belu (osmap ene mecui soso y Vicky Bello), mamanyiclod, e biasang siclod, at mialiua arapan sisicloran, pepasilip da nanu la calalam o cababo at cacuitid panimanman.

Uyta mu. Alang nanu naman. Niang licuan na ne ring radyu, diaryu, at TV petugut nala naman.


[About the author. A renaissance social worker, a revolutionary teacher, a supporter of artists, a trail-blazing woman of substance, Cecile S. Yumul is an embodiment of the phrase "Carpe diem!" This multi-awarded teacher/broadcast journalist started her broadcasting career over 27 years ago. Her radio/tv show "Bukas Bayan" has been on air since 1999 and is still airing with a multi-sectoral fan base. She is an accomplished cook, a mystic gardener, an actress, and a true environmentalist—a distinction she is indeed proud of.]

-Posted: 8:54 PM 9/13/11 | More of this author on eK!
Nextnext