eK! is electronic Kabalen, a web-exclusive Kapampangan journal of ideas

cecile s. yumul
cecile s yumul Bie Ning Ima 2: Anac, Lungub Naka . . .

Galingaldo, ni tricycle, magpotpot pandasal ala pa man lalabas, makatikdo ne y Ima, uling buri na bayu la mamaglako bale deng pamilia na apakabsian nalang almusal.

Penandit, ating magpalpatuk a manuk, ampong magkangye asu, manabisa na umpisa na ing bayung aldo. Pamaglub obra, pamagaral da ring anac.

"Ma, tali kung sapatus ku mebuknul ya, sopan na lako me pangabuknol. Itang geua tang assignment nabengi sana perfect kune, Ma? Bang kayuli ku masuelu naka man kanaku. Agnan kata pota minindal agad ku muli ne, Ma?"

"Maw, iyeeee ing palda ku meplantsa ya? Ding kaklasi ku asno pangabanglu susulud. Ing kanaku eman babawung makanian, pota pagsisti daku nung lukut ya pa." "Leng, bakal ku. Munta ke jobsite a bayung buklat, pota ala pang cantina karin."

Ni metung alang mekayisip mengutang nung mekailyup yamu man mapaling kape ing Ima at disan daneng makagising. Sinalambo la ngan king lamesa.

Ating single nasi, corned beef na dakal patatas bang miragdag, ebun gisa king sibuyas, at atin mu naman pandasal. Balang metung karing katubale ng Ima, mandalas king subu uling ela agad memanikdo gang pang ginising nalang Ima. Oyta, maybug lang mangabaknal managal oras.

Tin tricycle tinulid, serbis de ring mikapatad. Siklulu da ing karga at maybug la pang mangatalabu king eran a makuyad. Bigla lang kinulyo, "Maw, mako na kami." Medaig ing kulyo king arurut ning tricycle papalawut.

"O ika, buri mong dalan dening pandasal a sobra? Palamnan tala kening sobrang ebun o patatas na may corned beef?" Akua na pang mamiru. Bala mu ala yang kapagalan.

Piniling ya ing Tatang. "Keka na yan. Potang kayi mangalipasan kang danup keni bale. O dale na, aku man mako naku, pota malakuan ku ketang serbis a truck dumakit kekami king upisina. Ing anak tang babayi, dalaga ne, pasopan mu ne man keka bang mabiasang obrang bale."

"Wa dale na, paburen me, dacal ya siguru asikasuan king eskuela na, maralas ya pin mirarasan sisilim. Kadatang na makadukmu yang makadukmu ketang a bie tang secondhand a celfone. Eku ne man buring istorbuan pota makatuglung king pegaralan da at mangutang ia pa karing kaklasi na."

Bie ning Anac 2: Ma, Lungub Naku . . .

Ing bunsu, makasakbit ing backpack at ing bakal king metung gamat. Katipa na trike, alang balabalikid linub ne gate ning eskuela. Saktu yamung mekatakbang mapilan kilub, megring ne ing bell.

Ing Imang melakuan bale linukluk ya pa niang mekalako no ngan. Sinangkap iang kape, at tinipun na ing era gisan a pamangan ding aduang anak. Ing bunsu, lambis na ing eya mangisan uling likuan ne ing pandasal ala yang bawas at atin ng palaman. Mipatiman ya ing Ima. Diklut ne at iang pengan nang minuna.

Mipapiling ya king likuan ng pinggan ning atchi. Atin kapitnang pandasal makapalibutad king ebun ampo corned beef. Tagan ngan. Kinua nia naman Ima at pengan na. Sabe ing titipunan no ring pipangan king lamesa.

Ing atchi, katipa na tricycle, ngana, "Ing wali ku iang dakitan mu pota, atin ke pang gauan eku agad muli, sabian mu na king bale potang kayatad mu king wali ku."

Eya agad linub king gate ning eskuela. Peburen ne pang milawut ing serbis. Niang ena ne ababatyon, minawus ia king celfone. Penandit, linakad ne papunta ketang matas a building alus kadane ne ning luluban nang eskuela. Bayu ya miras karin, atin metung a pipanganan at uling atin yang outdoor tables and chairs, bala mu anti yang meging hangout at meeting place da ring estudianti. Wa pin naman, morder lang value meal, gang nula pa kaluat karin, edo man palakuan. Uyta, diretsu ia king kilub y atchi, minorder yang breakfast meal, kabe-kabesa ya at kikinaking a bitis. Makatapilan lawe-lawe ya king celfone na. Mapalyaring text siguru o oras ing lalawen na. Tin mung kapitnang oras, ena pa gisan ing inorder na, likuan na namang makasambuarga at tinikdo ne, linual at linakad, banayad mu, bala mu ating panayan.

Tin pamu sigurung mga apulung takbang, atin megbanayad a kotse ena man masyadung modelu pero bayu ia pa mu rin, binusina yang mekatatlu. Tinuknang ya ing atchi na lalakad, melikid king saken, at linele yang sinake king gulut niang kabuklat ning pasbul.

Asna kalapit, kinorba neng pawanan ing saken linub ketang matas a building asna sala pintura kalupa ning pintura da ring bomberu.


[About the author. A renaissance social worker, a revolutionary teacher, a supporter of artists, a trail-blazing woman of substance, Cecile S. Yumul is an embodiment of the phrase "Carpe diem!" This multi-awarded teacher/broadcast journalist started her broadcasting career over 27 years ago. Her radio/tv show "Bukas Bayan" has been on air since 1999 and is still airing with a multi-sectoral fan base. She is an accomplished cook, a mystic gardener, an actress, and a true environmentalist—a distinction she is indeed proud of.]

-Posted: 10:48 AM 5/24/11 | More of this author on eK!
Nextnext