eK! is electronic Kabalen, a web-exclusive Kapampangan journal of ideas

cecile s. yumul
cecile s yumul ALANG PAMIYALIUA ketang minuna ku nang pinsinan kareng tatalakad concretung dalan ketang "Lawen Yu Man." Makanian mu naman dening tutuki tamung lawen at pagmasusian.

Istung telakaran ne ning metung magnegosyu at meg-"click" ia, uyta na pu, ginu kung mamakalulo, itang ayabut ning mata mu, batyon mu, sulput lang anting kuat payung-payungan kildap ding kalupa na pang negosyo, maragol o malati man ing pisasabian. Ya naman ing dapat, emo mo makanian?

Kanita ustung ing pupuntalan mga atlu yang kantu kalawut, ing agkatan, "Tara, lakaran taya, beben tala ring lalam tanaman." Oneng ngeni, tebas da no ngan ding tanaman, o nang daptan mu, gang malapit iya mu, sake lang tricycle, o kaya, sake lang jeepney. Mas maluat pang manaya lang makalukluk kesa ketang idagus ning saken, e pa man mekapagtersera ing kambyu, "Ken pung lele," ngana, adua ya pang kantu ing limpasan ning saken! Ay nuko, emo makanian, ikayung kalupa kung sasake kareng jeepney manenaia kareng terminal, suglungan bia(h)yi?

Sadianan ustung daratang ia ing gatpanapun, ustung magbaba ne ing pali ning aldo, mamaglual nalang lumual dalan ding matua ampong anac, mamialung tambubung, maro, piku, nung bakasyun, mekad anggang bengi, istung masala ia ing bulan, dasan da pang balikan ing pialung kaibat memanapun. O ngeni nanu mo? Ustung pababa ne ing aldo, mamanyara nang pasbul, gate, tarangka dana la, kasi ding subaybayan dang telenobela magumpisa nala. Emo saglulu pang mamanagkap, baraha, tongits, at umpukan, pota mitauli la ketang alang kapupusang "Ang nakaraan . . . ." Emo makanian? Ala nang kate-kate mipag-istorya keng dalan karen kilub subdivision?

Datinan, ustung linto ya ing tiranti na ning bra, asna ka dine, ustung malino yang bagia ing blusa at ababakas de ing kamisun, eka maibug lumual king bale, ustung atin ditak a pirat o tastas ing malan o e makalilip a sepu, e me buring sulud man, ustung eka makasukle buac at alayu king sangi eka lumual king dalan. O ngeni, emo, saria deng gasgasan ing maung nung bayu ya at ere agyu itang tiktak kakamal a stonewashed. Emo saria dianaman ilual ing tiranti ning bra, at ngeni, ing kamisun pa kanita ya na mismu ing blouse a pamanyulud da, ngeni sadia deng dinan gel at nanu pang spray bang sumias ya ing buac at maglupa ya sale ayup (or the "dishevelled look!") at sarian deng y-zigzag ing sangi (eda buri ing matulid!).

Uyni pa, gagauan mung sukaran king paratang a panaun o bulan ing datang dareng prutas a lalto kareng estante dareng magtinda. Sabian dang agad, "Aru, atin nang santul, mangga, singkamas, siriguelas, balubad, makopa— talagang maleldo na, atiu nala ding mialiuang prutas a masabo." O kaya, "Aro atin nang lalto lanzones, sagli namu Naval na kanian Oktubri na." O kaya, "Uhhhm, manyangle nalang kasoy, ampong kastanyas, malapit na ing pasku kanyan. O ngeni, king sobra na galing ing utak ning tau, linisia ne king natural ing pamamunga da ring tanaman, kaibat magtaka ka pa wari, nung mengaloku ing panaun at emu na naman balu nung kaleldo na o kauran? Emo tutu, wet-wet ing summer, hot-hot ing kauran?

Lalung masiri ini. Ustung palapit ne ing" Holy Week," kanita pati kayanakan, tutuki king pamagbihilya. Gang pang deng magtindang pamangan, sariling kusa, ela mapag-ating karning babi o baka o manuc. Asan danum mu o gule. Ding estudianti gang alang klasi dakal la ring magkusa, mag-"Stations of the Cross." Munta la kareng puni at panikuanan makabisita pitong pisamban. O ngeni, lawan de ing kalendaryu, kapilan ing Holy Week, kasi magplanu lang mamisita ali pisamban at puni nune munta karing beach at aliua pang pasyalan. Munta la man karing pisamban ali mangadi nune—pasintabi, pero ating katutuan—emo anti la mong makipanalandi?

Dakal ko pa ayisip balu ku, nung masipag kayu, suglungan ye ini karing sarili yung akakit o apupuna king kekong tuknangan o gugusalan a labuad.

King mialiua nang mangapaliari, anti ya mong mangayabtak na ing yatu, anta e malyari ing anti nemong mangatibag ing yatu, ing laman na lalam, sinipsip ta na ngan, gisan, ding mialiuang mina, pikbungan, at peglaso at pepalual manibat king lalam ning gabun. Ding mangatuang tanaman mangalalam kalauat a uyat tatalan maigpit karing batung mabie at mialiua pa, gisan danong pemate, o nanu pamong malyari nune misalbag ya ing yatu.

When we have all but turned what lies from the deepest bowels of Mother Earth (from fossil fuels, minerals, stones, et cetera) out into the open because of insatiable greed, what will hold this planet together? Ala na! Ale? Wa ne!


[About the author. Cecile Santos Yumul is a veteran award winning Broadcast Journalist, a visionary teacher (Most Outstanding Teacher of the Philipines in 1992), a nationalist (Most Outstanding Kapampangan for Education in 1993), an environmentalist, and a dedicated daughter. She has over 35 years experience in the field of arts as an actor, director, and author. She is a published writer (Woman's Magazine) of essays, poems, short stories, and social commentaries. She currently resides in Lakandula, Mabalacat, Pampanga with her Mother, 18 dogs, doves, and bonsais.]

-Posted: 12:12 AM 4/20/11 | More of this author on eK!
Nextnext