eK! is electronic Kabalen, a web-exclusive Kapampangan journal of ideas

cecile s. yumul
cecile s yumul ULI NA ning miyusu lang bina deng teleserye, subuknan tana mo kening panyulat nung nanung malyare ne? Talukian taya naman sana ining milyari karing adua kung kaluguran. Nanu ia kaya ing malyari kilub ning paruminggo?

It's summer time, let's have fun—umpisan kune. Promise, maili nakong maili potang dasan ye ing kapupusan, anti mo yaku aniang ayari deng sinabi kanaku, bagia naku mu. Ing mung asabi ku, wapin ne, itamu ngan alus geua tana ini, lalu na ustung ala nang klasi at datangan naka ning pali.

Munang aldo, makananu kaya?

'Ting maigit aduang pulung banua bayu ke mikit pasibayu. Anti da mu naman ding aliua gang pang maluat na kayung mikilala, medyu mangapkap ka nung makananu meng tuglungan ing meiantalang pamibuklud lebasan ning mialiuang delanan na king bie.

Ing Kapampangan pin naman. Potang ena balu nung makananu nang umpisan, idalan na king pamangan. Mibsu ke pa agnan mengutang, "Mengan na ka bayu minta kene?" Agnan kami naman mipakaili.

Uyta, mipanagkat ke pang mangan. At kekaban milalabas ing oras anti kami mong mibalik king delanan ming pamibiebie, nu ke mengaparas a labuad.

Uli na ning iyang megpatibe king pamiabe mi itang minuna ming pamaglual ikaming adua kanita, ngana kanaku, "Tara"—anti mong down memory lane, balikan ta itang minuna tang geua kanita. Munta kata ketang lugal ayta. Tiu pa.

"Aro ba, makanian a oras, nuku naman, karanun pa yata!"

"Wa, malyari na kanyan. Tsaka mas dakal na reng mamamunta lalu ne ngening panaun ayni. Nuko, pati kayanakan, ala pamong klasi. O makanano, mura mu keni mas agyu da lungub at keni magdatun. Ya naman kasi, gang munta la king mal."

Malagua't salita, nanu pa mo, tinuki ku. Manibat aliua ya ing kayabe ku eku na guang pasibayu ing makanini. Kaya okay mu kasi sarili ne ing tsikot at alang "hustle," ngara pin.

Perada ne ing saken. Aro aku na yata, bala mu tiktak ke ka-atat, ikami mu. Osmap, aku naman king isip ku.

"Uy," ngana ning abe ku, "Tipa naka ken. Ot bala mu akung excited, lagua. Ikatang adua pamo. Gang magkangye kata, lalung olrayt, alang mamamaglalaue king panyaptan ta."

"Ua sige, ika nang bala ken mamayad, munta naku ketang puestu ta."

Mabilis miras ya king lugal a pinili ku.

"Lagua, umpisan mu ne, muna ka alben daka pa. Kaluat nang panaun bayu ta ayulit itang pinakamumuna tang experience together. Kayanakan ta pa kanita ne?"

Osmap, talagang alang aliuang lulub. Anta ba naman Lunis a Lunis, ala pang ugtung aldo, atiu nake karin.

Inumpisan ne kalupa na ning turu na kanaku niang mumuna naku pang patakman. Eku akalinguan linual kepa king ciudad, dela naku ketang awsan daring matua na lambale (shortcut na kanu ning lalambale). Makasamasan ne man uling ating gamit luklukan, mialiuang lamesa, ampong mialiuang sulu.

Lawen-lawen ku pin bala mu talagang dadaywan deng aliua pa ini gang masuluk ya. (O uli napin nita kaya ne?)

"O ba't pigmulalan mu naku mu? Ana na, umpisan mu na, pota muna kung mayari keka sige ka, lagua mu bang agnan kata."

Manibayu naku na naman, eke apalub-palub ining tatalnan ku uling mipapakaili keng pareu king panyaptan mi. "Ohsss..., twenty years and oyni na naman..." "Sabing lagua mu na, potang melambut ne anta kaniamanan ka pa."

Aku, uling ayumpisan kung sasagikgik, uyta makanian na pin man ing milyari angga king mayari ya. Mengalambut ku, maubug kung magbatbat king luklukan. Sinabe pa king gamat ku uling asna kung galo, eku apigil. Mika giggling spells ku. Bang e makaying makarine, pemulis ming kabaragbag a tissue ing tinulu king luklukan. Map namu mipildis ku at alang migmantsa king susulud ku.

Malaguat salita, alang milyari. Inatad nakung payuli, enaku akasabing matinu. Tabalu ta nanung linub king isip ku ot makanian. Uli na ning siyam yang aldo bakasyun at king luat ming e mikit, mekapangaku ku kaya ya ing paruminggu.

Bayu ku tinipa king saken, ngana, "Bukas, maranun ka. Aliuang lugal ing puntalan ta. Bagia naku keka nandin! Bukas kaya nang daptan mu? Map magdala kang extrang isulud." "E di lawan ta," ngaku naman at sayasayukut kung linub king gate mi. Belikdan ke ining abe ku. Piling-piling ya buntuk, pero lawe ku pipigilan nang galapak king milyari, imbes mabusit ya. Balu ku nia balikbalikan naku. Aliua ku kanung kayabe.


[About the author. Cecile Santos Yumul is a veteran award winning Broadcast Journalist, a visionary teacher (Most Outstanding Teacher of the Philipines in 1992), a nationalist (Most Outstanding Kapampangan for Education in 1993), an environmentalist, and a dedicated daughter. She has over 35 years experience in the field of arts as an actor, director, and author. She is a published writer (Woman's Magazine) of essays, poems, short stories, and social commentaries. She currently resides in Lakandula, Mabalacat, Pampanga with her Mother, 18 dogs, doves, and bonsais.]

-Posted: 8:34 PM 4/12/11 | More of this author on eK!
Nextnext