eK! is electronic Kabalen, a web-exclusive Kapampangan journal of ideas

cecile s. yumul
cecile s yumul KAYULI KU pamu 'bat radio. Nung nabengi emi ikuang tumulu lua, ining sinabi da ri K. Rudy at Gelo ikua dakung apatulu mata. At niang dinake ke radio ing sinabi mu Gel, oyta, metulsik naku batal, pusu, at mata kabang magsalita ku radio.

Dake ku pa ing milyari nabengi. Marakal-dakal la ring tinipun nang Gerry nabengi 'niang dinatang naku. Anti ya mong attendance check.

Eku ne ikit mabie y Gerry uli na ning mesaquit ku ining paruminggu. Palako bale, ngaku kang ima ku, "Ma, sagli ku mu, kasi y Gerry atakasan na nang talaga. Ngeni, kailangan aku na'nang munta kaya king Angelina b'ang ene munta keni." Medyu mipapakaili gang malungkut.

Karas ku pa king bukana, di Norman, Ronnie, at aliua pang artists ding magumpuk-umpukan.

Ngaku kang Norman, sabe akbe king brasu na, "Tukian mu ku kilub, uling ing tutu na itang milabasan bengi, manibat abalu mina, dakal lalabas memory flashback. At ing katataulian itang bayu la pa mengasalbag America at Paris di Sarge ampo y Joon (ding aduang miwangis mu naman), pota mangapagaga ku potang akit kune y mang Gerry."


Oyta K. Rudy, miabut la pa detang kaganapan da retang padela mu. At ika, Sarge, sinabi ku naman king misis na ing payabut mu na ibie mu la ding abli mung bonsai na pesali mu para kang Gerry. Kaibat linakbang na keng Norman (eku balu pati ata y Mang Ronnie nung tiu bandang wanan ning kabawung dinungo ku para mangadi).

Atin na sigurung megmisa, uling mabasa at mapalyaring 'bat da neng bisbas holy water. (O kasi ma'p, abalu yu rin o't asabi ku ini!)

Lininlin kung bagia ing magpalabug a danum king bista daring mata ku. Mipayawus ku kang Norman, medyu pasitsit mu, "'Man, o't, ninanan de ing bigote nang Gorio? Mewala ya!"

O't imbes na datangan na ke ning lungkut, o't bigla kung ayisip pota galang milagatan na kung Gerry kanini! Mipapakaili na kaming Norman. Eke bisang sagikgik, oneng tabalu obat, makanian ining malilyari . . . .

Linapit ke pa lalu ing lupa ku arapan ning salamin kabaung nang Gerry, ngaku na naman, "Psst, 'Man, o't pati kile nang Mang George teginan da. Obat maka-eyebrow pencil ya!" pagaralgal ku boses uling maibug ku pung galapak, sabe na ning ikit miya ing pasalikut mag-video.

Talagang anti mong panayan ku namu ing y George, mulagatan na ku at ding adua nang gamat, kapkapan ne ing bigote at kile na agnan ning, "Ma'm Ces, tuto, e ka bibiro?" Maibug ke atang mag-hysteria uling malungkut kaming Norman. Obat, ikit mi ya y George imbes na tumulu ke lua king arapan na, e ke miarap karing tau, uling ding pago mi gagalo lang alang patugut uling pipigilan ming maili. Malungkut kami, Gorio, o't angga keng mikera na ka ena ka makapagsalita, o't pasagikgikan mu kami.

Aniang mimasmas kung bagia, linawe keng malumane y Gerry, talagang manibayu ku, e pa yari, "Nnnormaaaan, o't minatchat ya buac y Gorio? Nu'ya minta ing curly locks na?! Pero ne, lawen me king last performance na, para curtain call, kasi keni 'yang bida. Ikit kia rin makabarong, 'niya pala ngeni ke patutuan ing biru-biru ring dakal, o susulud ne ing pamburul na!"

Y Gerry, ustung akit me, e pa man matula na ka. Y George, ustung ating mangalawut a lakad, e me alakuan (ikami agnan miyang ayisip Sarge kabalu ming mete ne ing Puerto Galera), 'gang pang subuknan yung lakuan ye makatuki ya.

Y Goriu, makatuag ya laman ing bote o aliya, e ya naman boys? Makananu ye pa man ayisip, aganaka ing kaluguran tamu, king marakal linabas a mengapalyari king bie tamu, eya bage o gamit ing atandanan mu kaya.

Y George, y Gorio, y Gerry, binie na ing bie at oras na. Bie tamu ing tutuglungan na. Karing ala keni, yang binie king oras, king lugud anti na mo ning ati kayu king siping da ring pakamalan yu (ne, Mang Ron?) at dakal pa balu yu ita. Ena ka paglibe, kaluguran, kaluguran ka—period! Exclamation! 'Gang mate! Uyan Gerry ikit da naman ding pamilia mu ing era ka pin buring mitakas. Sibuknan da ing pigilan da ing paglako. Oneng itang masterpiece mung obra ayari mu ne, "The Art of Living Life for Others":

Ing panaun manaliua ya timpla, ana nang mapali at marimla.
Ing tanaman manalili yang bulung lunsut katuki na la bunga.
Y G -Boy e bitasang merimla, king bie binie na dakal minianga
kekatamungan meging abe na angga ngeni mangisnaua.


At ngening iya ing bida, e sapat ing metung ya ing venue king pilagen na Funenaria Angelina. Uling ngeni, by popular demand, milipat ya at extended viewing ta pa king final earthly performance na kin tanaman Holy Mary Mary Chapels munta para abaian taya at iyatad bukas Duminggu. Muli ne king mayupayang meglalang kaya.

Ngeni pu sabian ku kekayu ngan, malagad ku mung manyabing masanting ya ing metung a lalaki, asabi kung matapat, at ding anggang menalbe kang Gorio mayun la kanaku; George, kasanting mu pala, abe, uling linto yang masala ing lupa, milako ing kile at bigoteng meging trademark na.

*

At uling balu ku buri mu ini, sige ulitan ke ing paalam bang tumiman ka king aliuang bie.

Ces at Sarge.

(Gregorio Bautista died Wednesday July 22, 2010.)


[About the author. Cecile Santos Yumul is a veteran award winning Broadcast Journalist, a visionary teacher (Most Outstanding Teacher of the Philipines in 1992), a nationalist (Most Outstanding Kapampangan for Education in 1993), an environmentalist, and a dedicated daughter. She has over 35 years experience in the field of arts as an actor, director, and author. She is a published writer (Woman's Magazine) of essays, poems, short stories, and social commentaries. She currently resides in Lakandula, Mabalacat, Pampanga with her Mother, 18 dogs, doves, and bonsais.]

-Posted: 11:19 AM 7/25/10 | More of this author on eK!
WHAT THEY SAY...

Rodolfo "Rudy "del Rosario (Portland, Oregon) writes...

A. Cez, Dacal a dacal a salamat queng update mu tungcul queng mengapaliari ining milabasan a aldo. Lalung lalu na ining tungcul queng capatad tamung " mamiping red carpet para quecatamu" ambas qui quing lipat bie, sasadia ne ing red carpet..Tutu pin sosobra ia lugud at pauli na, icua tamung mibucnul bucnul para misanmetung. He is indeed one of a Kind, alang aliuang manalili cang Goriu, he IS an Original masterpiece.

Queng selese mu, e cu aiaguantang mangari caring, upcoming actors a " umiyak -tawa" a talagang a project cu ing tune emosiun queng arap ning monitor.(maliari na cu sigurung mag audition cang Sisig man). Pasalamat cu naman at atiu la deng aliuang capatad a menantabe caia ampo deng pamilia na manibat iniang megrabe ia angga quing catataulian. (Alang quinanguang "Kodak"?) Dacal salamat, Mang Norms, Mang Ron, Edile, Siuala a memalita at aliua pa, ampo careng aliuang Capatad a macalaut a memie saup, financially and Morally, Paeng, Gelo, Junbap at aliua pa( panupaia namu sana careng e mesambitla laguiu,)

Oini mu ing e cu ganap a aintidian at maliaring maluat baiu cu atanggap... obat leco de ing BIGOTI nang George? at obat pigpractisan do reng quile na?.Tutu pin, trademark no reta.

Macanian man, sana manatili na ing caratunan at cataimican na ning caladua na. Pamisa que bucas Dominggu queti quing Our Lady of Sorrows queti quing Portland, iagnan na lamu sana deng quecong pangadi. Nanu ing planu careng licuan na? Di Manang ampo deng anac na? Pabaluan iu cu mu sa agguiang macananu mu. Dacal Salamat. God Bless. Caluguran daco ngan

-Posted/Via Email: Sunday, July 25, 2010 6:34 AM



Aida Tanglao (of USA) writes...

Kang Ces: Manayun ya ing Parangal mu kang Goryu, agyang magpakayli kayung adwa obat makatulu ya pa rin lwa. Deng tubud ning pamanlalang legwan malalam la't matimbang yampang king ketawan. Lwid ya'y Goryu, migmula na ing kelan nang kamatayan. E na ku kaya sapingan karening corny kung kawatasan ? :-)

Makanyan man buri keng akilala ing meyangubye. Nanu ne kaya itang kaluguran nang Coya ku at kaklasi na HAU i Ben Bautista, a kapatad na atang kapitnang Cong Dadong Tinio a tatang nang Dan Tinio?

Aisip ku Ces, pota mekad mete na ku kanita a derma rana ku. Lako dala ding sunspot at wrinkles ku, ay, sayang ali kuna akit ita. O akit kung lakwas?

Salamat kekayu ngan at komusta Angeles Artists.

-Posted/Via Email: Monday, July 26, 2010 6:50 AM



post Publish your comments...
Nextnext