eK! is electronic Kabalen, a web-exclusive Kapampangan journal of ideas

cecile s. yumul
cecile s yumul MIRAS KU king pamanaluki karing mengaputut a pun katauan at mangaragul a sangang tanaman king metung a pitambakan, bodegang alang salilung. Mamagus ing kanakung misamut a pauas ampong lua. Alang pamiyaliua ing galgal at pamipasaiang king bie mesaiang king Maguindanao Massacre niang Nobiembre 23,2009. Purus nang massacre aliua'liuang pamamaralan pero eya bie nune maigit pa king bie mung tinomba ing isingil naniti. Ngara ding mangatua, "Ideng kalakalale, nanung man e ustung dapat anti na naman ning maiap siguradung mangulate."

King maigit atlumpulung banuang pamanyagip bie, susuyud mengabitak a bunduk ing maralas pin, potang mangatalusad at magpatinakbag karing maburak at mengatibag gasgas dalan bunduk, ding wakat, uyat, at mangatuang sangang tanaman ila ing sasagip at kakalauatan mi bang e ke malawus tagusgus at magdulangdulang anti ning landslide niang misan metukup kami king ausan dang Bitukang Manuk king Dalton Pass, Nueva Vizcaya.

Kabud ku makatalakad lalam ning metung a mabie pun asnang baiat ing salu. Anti mong pinaku bitis e migalo. Mapilan penandit, balaku tin bulati o mangalating ubingan linual menibat tambak pun tanaman agnan ing peluputan at binalut ding sanga't bulung tanaman ing kanakung pamikatauan. E man matigik, misdan ku pa murin at mengilabut king malilyari. Agnan ing anggang pipututan pun anti lamong asuk menaliua pamikatauan. Linapad ing malaberdeng asuk at selakupan na ing anggang pitutukluan gabun. Aniang eku na akakit ing tatalakaran, miyalsa ku king tuktuk ning matuang tanaman.

Bisa kung sumio, maniabi at gulisak, ing asbuk ku tinikum dia naman ding maragul a bulung tanaman.






Ding tanaman a mitatagan makapalibut (anti king Lord of the Rings, Narnia: Prince of Caspian, at Avatar ) anti na naman ning ikit ku aniang magvideo king malilyari gagapang lulub banaiad ing bubusuk a lahar at tatambunan bagia-bagia ing anggang darasan: anti mu naman king Matuang Tipan niang ginapang ia itang makapal a asuk at liban ding bale ding Ehiptu. Abatiauan mu king pidalan da ring uyat tanaman kanaku ing anggang malilyari king sulip. Mitukup anting ambun makapalibut ing anggang ayabut lalawen da ring mata ku. Kaibat niti, ating aduang sanga, tinulid karing kanakung mata, anti daku mong dela kilub pamibale bale nukarin gagapang ing berding asuk.

Ding anggang anak da at apu alang apulung banua, liban nalang banayad ning kule berdeng asuk at pangayabac, kaslag ning masala ikit dala ding pengaring tatalan poder at menalakaran para mate la ring tanaman, ding karelang anak at apung pakamalan, mistula lang menabtak at masias katauan alang pamiyaliua karing dutung a metigang meputut mikawani kang indung pun tanaman.

Maskup kung maskup a salu, eku mikiak, eku mu naman akuang mimua karing tanaman uling binalik damu ing depat da ring tau. Ing tutu na, bayu la pa mangalasun king dapat da ring tau inagap, kinua danala bana lang e misakitan potang eda na agyung mipangisnaua uling ala nang tanaman. Eku balu nung makananu biglang melubak ing tigik da ring mengulate sanga at uyat kanaku, dindam ku namu mananakbag pasibayu king sulip.

Misaldak ku king sementu! Agnan na ning mimulagat! Bala ku tutu na!

Mimisip ku pilan la kaya ding mitagan a tau at anak nung eya paninap ining ikit ku kekaban matudtud ko. King maluat naku mamaninap, kerakalan karing peninapan megi la ngan tutu. Ini kaya?


[About the author. Cecile Santos Yumul is a veteran award winning Broadcast Journalist, a visionary teacher (Most Outstanding Teacher of the Philipines in 1992), a nationalist (Most Outstanding Kapampangan for Education in 1993), an environmentalist, and a dedicated daughter. She has over 35 years experience in the field of arts as an actor, director, and author. She is a published writer (Woman's Magazine) of essays, poems, short stories, and social commentaries. She currently resides in Lakandula, Mabalacat, Pampanga with her Mother, 18 dogs, doves, and bonsais.]

-Posted: 7:30 AM 7/1/10 | More of this author on eK!
Nextnext