eK! is electronic Kabalen, a web-exclusive Kapampangan journal of ideas

cecile s. yumul
cecile s yumul NGENING PARUMINGGU namu bayu ing pamagbotu, metung ku kareng mibulebule ot makanian ta kerasan king pamamili karing bobotung kakanditatu.

1. Balas iang Balas ampo "Lord" vs. "Lord"

Niang linto na ing kuentas kilub ning 30 bulan. Iang meging balas ning Gob anti la mong mangabalasbas daig na pang ing tiran nala ning tutung balas menibatan baril. Kaduang balas pareu dang daralan y "Lord."

Mabilug a yatu makatutuk ne naman keti balen Capampangan uling aliua mu ding aduang kandidatu nune lawen da pin kanyan ninung "Lord" ing mangibabo ngening pasibayung pamiyarap. Uling ding talatuki ning aduang kampu, pakapalad la gamat mangadi karing karelang "Lord."

E nia sa miraras king pantasya kung mika "Lord of the Rings, The Movie," nula milabulabu ding mialiuang lelangan keti yatu. "Oh, Lord. Eyu pu paintulutan!" (Sabe sign of the cross abe kung mamasa.)

2. Paku - Upak

Bayu pa man ing pamangampania, anti lang e bitasang megaral at makaintindi ding 99.9 porsientu ding eganaganang kakandidatu:

Republic Act 3571 "(I)t is a criminal offense punishable by imprisonment to harm, nail, cut or remove trees..."(Lawen yu nia mu.) Siglungan ne pa niting Fair Elections Act 9006: "(I)t is illegal to put campaign materials on electric posts, on trees..." (Lawen yu nia mu rin.)

Aldoldo do upakan dana la king radio at telebisyun king alang patugut a paku ng paku karing tanaman at pamanyabit tiktak a pangaragul a letratu na maigit pa king legal mu naman, anti mong ala.

3. Kabanal - Kabalan

O anta makananu ka, nunti ya mo papakit kabanal kareting letratung mengaretoki. Ay sus! Nuko, e pala makanian nune e tatalab ing puna at ala lang kiber lapastanganan geua ra mismung batas. Kelan dang busbus a butol, ela la kabanalbanalan nune nanu ia kanita e kabalan ing awus da ring matua?

4. Iwas - Sawi

Andaman taya pa ini. Dakal a makapakaili at sisting meyakit king mengalabas a mapilan bulan megumpisa niang kampania da ring mialiuang partidu at alang partidu.

Mumunang Dili

Obat naman kasi, menibat na kang uncle na mismung tatagal, "He is just a two-year-old kid. He is only playing." Balu da pala ita ot pitukituki de angga king e pang-anak a pitatagunan. Oyta mo galang, uling ing anac nung namu iang pane daramdaman, gang ena aintindian, iang balu nang pirming ulitan ustung pepaglabitan dane. King metung a amanu inapse na king mikropunu mibulang la emu Inda na bibitbit kaya king entabladu nune mabilug a yatu uli na ning meyusung sagli ikabit dala YouTube. Kaibat niti, bigla anti mong bula, era ne pepalto king publiku, telebisyun pati patalastas ing dati a bukang-bibig ning Inda nang maberatberat mu naman. Iwas-sawi ne? O nung ali, miparoro iang lalu ing pamilit dang itas at manatiling makatas kanu king survey.

Kaduang Magdilidili

Ba, aku mismu masnuk kung masnuk uli na ning muna nang pagmaragul ing kayang pangamakakalikasan kanu. Digpanen! Gang siak man ayup a malutub, eta ia dindam aniang papaten dala ding tanaman a mangaragul keti Pampanga at kilub Clark Freeport Zone. Kaibat, anti ia mong artista "posing-posing," magdilidili, kabaligtaran ning sasabian na ketang political ad king telebisyun, "Hindi ko hahayaang masira ang kalikasan, ipagtatanggol ko." O makananu meng paniualan, mumuna iang makamate karing pemaku nang tiktak karakal a poster karing tanaman? Nung tutu ing babandera nang dakal ia pamagaral patungkul king "environment," ot ena balu ing simpleng pamamaku king tanaman lalabag ne king batas at, mas maulaga, makamate tanaman. Kapilan man eke tanggapan ing katuliran a supporter da kanu ing makirapat! Ay ba naman, naman! O nanu kang klasing lider kanita? Ala kang talan karing talatuki mo?

Katlung Mistulang Tebili

Uli iatang atin lang e pikasundu, migulutan la at, uyta, tinabili ia. Linipat at sinumpa king bayung partidu. Oneng ing milyari anti ia muna man mipaburen. Dapot kabang luluat at ding tau akakit at daramdaman dano mismung mangamanu at milalatag king buri at agyu dang gauan---ba! bagia-bagia, menaliua ing datang. Maski nukarin ku mipabasle, lalu na karing kayanakan at tutung mimisip at e magpadala kareng patalastas mu kabud nune susurian dala pa ngan ding tatagal a kandidatu, kalub kalibugtan ning Abril atin bayung miyusung pakibat, karing bus terminal, tricycle terminal, upisina, eskuela, at dakal pang pikukumpulan tawu. Ngara, "Kaming hindi kumikibo ay boboto ke... (ikayu nang misundu king rima ning lagyu).

Ngaku, kabang pasake ku king maragul a terminal ning mall king Pampanga, "Tutu kayu, abe, king sasabian na dapat eka magpadala king amanuan dang survey, uling ding tawu mialiuang edad, mimisip la, ela mulala at patuki lalu na ding e mamisaling botu at dangalan da."

Sidya ku pu ing ala kung sambitlan metung mang lagyu uli na ning buri ku pin kalikutan ning isip ing kekatamung paganan.


[About the author. Cecile Santos Yumul is a veteran award winning Broadcast Journalist, a visionary teacher (Most Outstanding Teacher of the Philipines in 1992), a nationalist (Most Outstanding Kapampangan for Education in 1993), an environmentalist, and a dedicated daughter. She has over 35 years experience in the field of arts as an actor, director, and author. She is a published writer (Woman's Magazine) of essays, poems, short stories, and social commentaries. She currently resides in Lakandula, Mabalacat, Pampanga with her Mother, 18 dogs, doves, and bonsais.]

-Posted: 5:53 PM 5/5/10 | More of this author on eK!
Nextnext