eK! is electronic Kabalen, a web-exclusive Kapampangan journal of ideas

cecile s. yumul
cecile s yumul Mais

Makatamisan kilub ning paruminggu, datang la ring magdasyun mais keti barangay Lakandula. Kening dane wewaian kantu, biasa la ngan mamaglutung pamangan ding siping bale, ma babayi o lalaki. Ding manangu, memariu la taga Concepcion, pakasaku la ring anguan dang pupul mais karing tamnanan marangle. Ding pupul a dadalan da mialiua lang mais. Atin siksik mangalating maputi at kintab kintab butil, ilapin ding malagkit at maniaman kiskisan gauan lutung: sabo suam, buluganan me mung bulung lara, nung ting malungge siping bale, maniad kamu at atdanan meng metung wato potang melutu na ing sabo, matula nang pare-pareu. Nung naman ting kang matuang ngungut a makalele andat manakbag la king pun ustung masikan ing angin, bunutan mula, lage me ing kudkuran at masla kang gata, maglelut kang mais, dagdagan meng lakatan nung atin, ban naman pati siping bale, ayatdanan mulang kapangan. Nung matamad naka man kiskis mais, ilaga mu nala mu at ing sabo mais lalu nasa nung atiu pa iting buac daring mais, gauan mung inuman, panulu, kareng manamdaman atin sakit batu ngara di apu.

Lutung Mais

Alang mintis andat alas tres ning gatpanapun, kalembang ne ing takap bakal kabang mabagal iang magbisikleta ing magtindang kulting mais. Ustung maratun ka bale, damdaman miamu ing dadalan, balu mung tambing nung nanu ing tinda na. Pirmi at ia kabud ing datang kalembang takap kalderu ing magmamais. Busuk busuk la king pali deni, aduang dapukanan king mingatba ning bisikleta, makaiangkas ing kaiang kabaian. Oreni ding e bitasang meko king tradisyun ning pamaglako. Gang man ngeni ibalisusu dang bulung sagin sepinan diaryu o "yellow pages" ing kekang saliuan. Potang kayi buburan neng kidkud ngungut king babo ing seli mung kinulting mais.

Gang man ilig ku ing mamanimbentung lutu, pang kayi makapulut ka pang bayu. Mikaiabe kung bale anac ya pa, awus mi pin kaya, ustung magtimpu ne, uling asne lati, "Princesa da ring Mangyan" aturwanan naku ding e maybug magisan ligang mais, gigisa mila at inaus milang "Mais con chili." Lugusan mula ring sobrang milagang mais uling potang merimla nala eno maniaman ngusngusan pin naman. Aba, niaman da pin potang migisa lang dakal a bauang at potang salasalitsit nala king bukal, dinan mung chili sauce ketang buri mung paras. At ila ing pirurungutan yung kanan potang magminindal.

Tin pa, ring pakabalebe kekaban ning dalan, lalu na papunta na Bundagul, tuki tuki la ring mag ningnang mais. Ding aliua ing aus da Derang Mais. Iniang malati ku, atatandanan ku, nung kaustuan yamu dagul ing mais, maliari meng pakiyangkas ketang plantsang de uling, kekaban mamalantsa la, lutuk lutuk ya naman malulutu ing kekang ningnang mais, babo ning uling, na mibabaya king buldit o kilub ning plantsa.

King pamagaral mi pirmi la mu, miyusu ing "Mix-mix": pisamut yang balitug, mani, green peas at sakyud kang chili, igogo meng mayap, oyta na ing pirurungut a kanan potang recess. Abayan miya mu ketang sikyud a emu na balu mekatapilan de denuman ing Sabo Buku. Lugud ning apung ginu, map kanita, ala kang ababalitan me" food poisoning."

Mipagmais

Aro ngening panaun, mais ya naman oneng imbes na makabalisusu lang bulung sagin, pakalulan plastic a basu, linugus la naman oneng dirinan da na lang "food coloring" nung lawen me bala mu mo binubud a queso. Digpan ning damongkal, balu kung sabian uling tikman ku. Kilulan madilo mayumu ing bubud da babo mais.

Karen naman Grill House at mialiuang pipanganan, gang makananu keng takman, mais ya pa rin liga, oneng digpan ne ning metung a sizzling plate, pati presyun mu maybug salitsit uling ing simpleng mais a linugus, potang isubu mu ne maybug mung bilangan ing butil uling tiktak na king kakamal migit dinalan ing order.

Karas naman king Soup ngara pin kareng restaurants at aliua pa, alus bilangan me ing butil a kawe kawe malagad king corn soup mu, akua mung manimawas e king niaman ning soup mais nune, king kakamal ing ilyupan mu, at ala pa kanita ing kanan mung main course.

Corn on the Cob. Pibalabaligtad me man, mais ya pa rin, liga ya rin, midapuk yang mal a bendiadu at dininan butter on the side. Arung nang Indang Berang! Liga ya ring mais!

Ing katataulian, obat mo kaya, ngeni, ustung mipanutu la ring tau, ngarang agad, "Patugut naka ken, mamaisan mu nake na naman."

O nung atin lang akakit aduang tau e makatula pangimut, agad dang sabian,"Lauen yo reta, o nandin la pa mipagmais."

Makananu ya man panga iapag ing mais, dinerang, linaga, kinulti, kiniskis para suam o lelut, maski nanu ya itsura ing mais, nanu mang panaun, maliua ya itsura pangaiapag keka, balu ne parin ning kekang dila, ngalangala at bituka— Mais ya pamu rin eme ayaliwa ing lasa.


[About the author. Cecile Santos Yumul is a veteran award winning Broadcast Journalist, a visionary teacher (Most Outstanding Teacher of the Philipines in 1992), a nationalist (Most Outstanding Kapampangan for Education in 1993), an environmentalist, and a dedicated daughter. She has over 35 years experience in the field of arts as an actor, director, and author. She is a published writer (Woman's Magazine) of essays, poems, short stories, and social commentaries. She currently resides in Lakandula, Mabalacat, Pampanga with her Mother, 18 dogs, doves, and bonsais.]

-Posted: 3:44 PM 1/29/09 | More of this author on eK!
Nextnext