eK! is electronic Kabalen, a web-exclusive Kapampangan journal of ideas

cecile s. yumul
cecile s yumul MAIBUG KANG malula king karakal daring pialungan asna santing itang amanuan dang packaging. Deni ilang akit mung bina karing estanteng salamin at mangaragul a pipanyaliuan, malls, hypermarts, department stores. Manaua, marimla, at mangamal. Maigit kanita, kata kata la at parepareu "perfect replication" nuka man maniali, ustung ikit mune ing metung ikit muna la ngan.

Ding anac ngeni, maragul ing pamialiua ing burian da at ilig pipialungan. Nuka man malikid akit mu, makaduku, alus ela kukurap at aduang gamat makasakmal alang patugut ing miliuasan pindut ing galigit king tatalnan ng iphone, celfone, gameboy. At nung naman e pipindut, taling taling ya buntuk, mekad makapiak at mipapase ya tukituki ing indayug ning makasulpak a tigtigan karing adua ng balugbug. Sulasulapo king sarili nang yatu. King pangadala na king geua nang yatu kalinguan naman sukilkil bisang mangan.

Ding pialungan babayi, asna la pangasanting muna man, mialiua kulor ing buac, ting malabuac mais (blonde kanu– dumb blonde), mala atsuete king lutu, atin mu rin ting iking kabayu. Pati gamit makaiabe tambing manibat king piblasan, balebalayan, gamit a ternung pialungan dadala na ngan "Barbie" doll. Aru nung eka megbarbie collection eka maka-in!

Nung lauen mu misan at e paka isipan, e mo bala mu mas malagua ing pamaningat uling ala nakang pangulaitan kate kate king dalan anggang sisilim, manggabun, at kasdan mu muli ya pa, galusan, bakbakan a tud, siku at lupang migtampiso king burac king karinat, ding tsinelas ela man king talampakan makasulud nune king gamat la makasukbet? Kayuli nang gurumusan mangasungasub ya pa king danup at kauang danum, mikit ing alduk at subu anggang e mayampat ing danup e patugut at matna king lamesang pipanganan.

Oreni mu naman ding anac kanita na ing balu dang pialungan a abatan pasali ustung padatang ing piesta at pasku ding ausan dang Butaka. Matingkad ing pangakule da, mialiua la dagul at gang man king malaut bala mu pare pareu la, potang damput naka at mamili, alang milupang talaga uli na ning manu-manu dalang arian. Alus, kabayu para karing anac a lalaki at Garing naman para karing babayi. Ing anggang lumang diaryu, papel ilang pipakatpakat at molde ra at niang megaral nake karing madre, iya pin ing tiru dang Paper-Mache ini. E naman masyadung meluat, ding Garing a papel, megi nong plastic, masias la, at dudurut nala buntuk, gamat at bitis. Malyari muna lang pikawa-kawani at potang mamialung kayung Garing garing, makagaua nakang baru-baruan. Keraklan, kayabe da ring ating kurangkurangan, ding anac kanita, piabe abe da ing pialungan at ilang iabe king pamagbalebalayan.

Obat king karakal a mangasanting a makapadurut nuku man balikid, potang magpiak ku aniang mipalukluk ku king metung a pipanganan, aliua ding mangasanting a reni ing pilit lalto king panimanman ku, nune babalik ing malisangan,siksikan pamanyali anyang malati ku, matalik pangatayid king gamat ng Mang Geng at Mang Lucing ing kekaban, panintun dakang Garing a paris (a palaguan kung Totoy at Neneng), at itang banua banua, ustung atiu no ring tianggeng piesta mibayu la ring mengaulingan a kurangkurangan. Gang man ngeni, ating ku pang mitagan a paris Garing a plastic at mapilan kurangkurangan. Ustung datang ing piesta, gang man ala ne y Mang Lucing, babalikan ku la ding magtindang kurangkurangan at sasaling tunggal tumpuk. Ding Garing ala na. Mialilan nang stuffed toys mangalambut, eno makatalakad dili da, lapelape maliari mong lamutakan at pamaluktut.

Eda kalupa ding garing a minuna, pialungan la pa, masias nala talakad, maliari mong ibili at talakad lang dili ra, maliari mong ibilad king aldo, maliari mulang sabunan, at ipayanud king malalam a danum, at ela lumbug, lunto la at magbabo king danum. At maigit kanita, gang man piabe abe la ring Garing Butaka at Kurangkurangan, balu meng damputan nung sanu ing keka, uling na ning gang metung la padrun, balang metung a pialungan, eya makina ing ginaua nune, gamat, pawas, at oras ning metung a tagalalang ing ginugul bayang lunto masanting ing lelangan na.

Bigla kung mipamulagat aniang, ginulisak ia tang metung a anac, mangalewung ya karing arapan da retang makadisplay dakal mangaragul a robot, barilbarilan, mialiuang kotse at truck . Magsalibatbat ia king kiak. Ing Tatang, makatsinelas yang pudpud, makasandung kupas, makasakmal yang makasuput dunkin donuts metung gamat, abitan neng papalaut ing kayang anac.


[About the author. Cecile Santos Yumul is a veteran award winning Broadcast Journalist, a visionary teacher (Most Outstanding Teacher of the Philipines in 1992), a nationalist (Most Outstanding Kapampangan for Education in 1993), an environmentalist, and a dedicated daughter. She has over 35 years experience in the field of arts as an actor, director, and author. She is a published writer (Woman's Magazine) of essays, poems, short stories, and social commentaries. She currently resides in Lakandula, Mabalacat, Pampanga with her Mother, 18 dogs, doves, and bonsais.]

-Posted: 6:46 PM 12/13/08 | More of this author on eK!
Nextnext