eK! is electronic Kabalen, a web-exclusive Kapampangan journal of ideas

cecile s. yumul
cecile s yumul DING KERAKLAN lalabas king baryu, potang muli lang ibat memisita, metung karing bitbit da reng bungang Opu. Gang pakatulus la bebe bakud o pakabalag sangang mengalangi, bayuk bayuk la king dakal da ring bungang makayamang akakit.

Ela mamanaun pupul ding Opu. Metung la karing bungang gule e milalako karing tinda da reng mag gugule. Ustung manakit kang Opu nung Kapampangan ka lalu na emu ing bungang Opu ing agaganaka mu nune pati ing sasabian da ring matua kareng anac lalu na deng alang modu ngara pen.

Senayan ta kasi ing babie galang karing makatua kekatamu o karing mamagbisita keng pamibalebale mu. Anya ing metung a anac ustung dindam deng mekibat alang pu potang mapupus ya sasabian o neng makibat ya, "Wa o Ali," agad deng kutnan, "Eka pa mengan Opung magalang ne?" O kasdan mu uling ala ya pang busbus a butul (metung mu naman kasebian matua) at alang nanu ya man isipan, makibat ya ing anac, "Ali ku pa, bakit wari, manianman ya 'y ta?" Manong ya pin naman king balugbug potang dandaman me lalu na nung akit mula pamikanlaut edad ding mipamakibat. Dakal kekatamu ing pimamanan ya ing amanung ini ania gang man ngeni, balu de pa ring anac ing Opung Magalang.

O Babing Maklak mengan na ko po? Reng e Kapampangan mekad misdingan daka pa potang dindam de ini.'Ta pakibaluan pa wari nung matni o maklak ya balugbug ing babi, pulkeruan de mu at gauan sisigan. Oneng pin deng Kapampangan aliua la. Bungang Opu ing pisasabian, eya pu balugbug babi. Ini ing aus da potang bisa naka man magsabo na ing bulug Opu yamu. Magsabo nakang Babing maklak ngarang agad. 'Tsaka mu nya dagdagan paminta tang mediu maybug kang manggatal balugbug king paras. Ing palage ku ding minunang mengan kanini mipalalu ya paminta mekad pamintang magaspang pa panga durug anya niyang milyup nala king busukbusuk a sabo, ikua rang maybug mangaklak king pali at paras.

Ini ing kanaku mung palage uling miliari na kanaku aniang misan mipasobra ing abubud kasi mebalag ya itang takap aniang ipagpag ke sanang panyangkap. Pekasalak kuna oneng dakal pa murin ing sinayad at tinuki lasa king sabo kung babing maklak. Bang madismula ing tapang ning sangkap, biluganan ku pang misua. Aro meniaman ya, sinakyud ku king sanduk, tikman ke pero gugulis ing pali ning paminta king kilub ning telasalamin na ning balugbug. Paki isip yu namu nang miliari karing epagan kung sabo babing maklak. Ding mai'lig king maparas, asna lang kaburi, manimawas la kekaban mimilyup sabo. Yng pengari ku nganang kinutang, "O dyunior, metung a sanduk a paminta ing bilug mo o biluganan me pang inanis ining sabo? Onta maybug kung mangaklak, manggatal ku balugbug!"

Ing koyang asnang kaburi king maparas, "Nyaman na pale, maybug kang manulu saldang!" E mibata leko na ne ing sandu na uling sasagese neng pawas.

Y Mama kung asna kalumane mangamanu, "Ot biniru mu no man ding epaganan mu? Sana digdagan mu namu nung buri mung dakal lang mangan at e agad magisan, imbes na pekatapang mu bulug," at tsaka ya timan timan karing lalawen nang makarungut king lamesa. Atin nang mandalas subu king nasi atin ng pituki ing alduk king sabo, kaibat patukianan dang inuman marimla. Aku eku mibata, tinikdo na linual king kusina lele lababo, sayasayukut sasagikgik, angga king milayi naku banyu tiglus kunang mengapali.

Aniang mimasmas naku, migbalik ku karing mamangan, inapagan nong meyumuan macapaunung Mama ku, ba lang mipasno king pangaparas da. Ngakung kinutang, "Maniaman ya o maniaman yang mipasobra paminta?"

"E mu wari tikman? Pilan waring kutsaritang paminta ing bilug mu?" Eku na balu nung ninu karela uling balamu megkoru la king pamiyagnan da king kutang.

"Dapat sana adua mung wisik king bote nitang dapukan kung paminta, oneng nia pung ipagpag kune, e pala makalakam itang takap ning busbus, mebalag ya king sabo mepitna ya laman ing boteng paminta. Sinalak ku naman tang agyu kung agapan, oneng eku balu nung ti karakal ing sinayad mitagan king sabo. Maniaman ne man ne?" tsaka ke kiniskinisan ing lalam kung labi, enaku bisang galapak, pota bala da seria kung tagana.

"Aru, akung mikirapat ketang takap nitang boteng paminta. Kinwa ku napun, paniltilan kropek, oneng mamalagua ku eke alapat masalese," y koyang mai'lig king maparas ing sinapung mekibat.

"O ngeni kase, balu tana ing pakibat ot megi ya sigurung babing maklak ing lagyu ning sabo opu." Oyta mitiklup ing pisasabian. Misalba ku king parsala king milutung sabo makapangaklak king paras.


[About the author. Cecile Santos Yumul is a veteran award winning Broadcast Journalist, a visionary teacher (Most Outstanding Teacher of the Philipines in 1992), a nationalist (Most Outstanding Kapampangan for Education in 1993), an environmentalist, and a dedicated daughter. She has over 35 years experience in the field of arts as an actor, director, and author. She is a published writer (Woman's Magazine) of essays, poems, short stories, and social commentaries. She currently resides in Lakandula, Mabalacat, Pampanga with her Mother, 18 dogs, doves, and bonsais.]

-Posted: 6:45 PM 11/24/08 | More of this author on eK!
Nextnext