eK! is electronic Kabalen, a web-exclusive Kapampangan journal of ideas

cecile s. yumul
cecile s yumul MELAMINE POISONING from milk to candies and back tracking to pet food from May 2007 occupied primetime radio television and national dailies. Daily, the avalanche of products recall from supermarket shelves and announcement of new melamine-tainted products is waited with bated breath.

However, while the authorities are occupied with this, what do government agencies have to suggest as alternative sources of nutrient better than milk? There is this ad on television ("ang gatas ng hayop ay para sa hayop") that shows footages of four-legged animals sucking milk from the mother cow, pig, dog, cat, etc., with the camera zooming in next on a human mother and her child drinking a glass of cow's milk.

Wapin naman ne po? Ara pin ding aliuang atin na ring edad, potang ing balita patungkul king makapangalgal laman king sobra karok: "O kasi siguru ing mekagawa ken eya sinusu kang Inda na , niya nung nanu ing sinusu na, gatas animal, makanyan ya kelwalan ugaling animal."

Uyan ing masanting pisabian. Ot eta la balikan deng susu. Opu, alang aliwa nung e reng susu. Keti mu Pampanga, etana pakalawut ing pamaglawe susu akit at akwa mula ngan takman. Obat mo kasi pepatuki la ring kerakalan king agus na ning bie mamalagwa ng mamalagwa. Anya neng kayi, disgrasya ning metung a bangsa, disgrasya daring kalele pang bangsa, kalupa niting milyari keng melamine .

King baryu lalu na, usu la pa reng mamagsusu. Emu matua pati anak, balu dala salat ding mialiwang susu. Tin nang malati, masalat, matuling, pakaba, pabilug, patilus ustung muna mulang pagmulalan. Oneng gang pare pareu lang susu kalupa ning nanu pa mang bage, mialiwa la lasa, salat at paralan potang buri meng kunan lasa ing susu king asbuc mu. Ala ng sumambut pa king lasa at sustansiyng bibie ning susu.

Ding maliligo susu keti mialiwang lutu ing malyari. Detang ausan dang parus parus ampong kalang-kalang. Deni kasali mu, atatandanan ku ibabad dala pa pilan oras, bala kanung manyuka. Pero anyang malati ku pagmasdan kula, bala mu wari king lawe ku malulumud la naman gang pang mabibie la king ating danum. Amu lang ibangli, balang magbukaka ding parus parus. Oreni mangalati la at din namang kalang-kalang mas madagul la laman. Metung a lutu ing magsabo kamu. Igisa mung bawang sibuyas, laya at kamatis at ibulug king bubukal nang denuman a parusparus, timplan mung asin, oyta kanyaman ng ilyupan kabang busuk busuk king pali, itang maybug kapang mangakintal. Ini metung sasabian pamparatang gatas king metung a Indang bayung menganak, bayang dakal a asipsip a gatas ing bingut king susu ng Ima na.

Ing kadwang lutu kareti. Kaibat dang mibangli king bubukal a danum, ikawani la at tipunan ding laman. Malyaring ilang gamitan mung igisa king bawang at atsuete, yang pagbabo sangkap king pancit luglug, maliari la naman gisang anti mong torta, abaianan meng kamatis at patatas.

Susu pa rin! Deni naman ding ausan dang balibid, papa at dagul. Kerakalan, ilang buri dang lulutung atin gata. Ding balibid ila ring masyas at matilus a buldit. Orening papa at dagul ilang balbalan da buldit, at ila mu naman ding balamu makisipsipan labi. Anya metaguri lang, "Kissing lunch" ustung miapag la keng lamesa. Deng e bisang manyipsip susu, ing gawan da sungkitan dala kareng tusuk tinidor o kaya, toothpick in pangawuk dang laman. Mas manyaman nung atin kang tiltilan aslam, ginayat laya at baguk.

Iabe tala naman keng pisasabian deng sulib ampong tahong. Mengutang ku ela wari pareu deni? Mas makule la kanu ring balat da ring tahong. Mas tingkad ya itang berde gilid. O reni, deng pasosyal, iapag dala grilled la kanu o kaya itang singkapan dalang bawang ampong butter or margarine at pisitanan dalang kalamunding/lemon/dalayap.

O atin pang metung ding talaba. Kerakalan, deni bangli dala mu, kaibat, sangkapan dalang sisig. Anti ya kanini ing sangkap: aslam, pamintang durug a magaspang, tidtad sibuyas (detang malati), asin at deng e tatakut ma sodium palinamnaman de pa king betsin.

King karakal ta pikuanan masustansiyang pamangan, neng kayi ngakung mimisip, manibat king malunggay at emu agyung tandanan ing dakal nang bibie sustansiya, metung ne ing mas matimbang ya pa king gatas a sasalwan at maski nokarin tutubu at anyaduan yamu, ampo karening mesabing panibatan ning sustansiya para santing ta pamikatawan aku waring kukutang, "Ing kabiayan yang masakit o ing tau yang pepasakit king kayang kabilyan ngene?"

Kabang isipan taya ing pakibat, ana, manyangle tang nasi, ambulan sabo parus parus, mangan ta king dulang, itas ing metung a bitis. Ada pin kanyan ding aliwa, "Ay nuko niaman na, manulu ku pawas, mangabusarat ku pusad!"


[About the author. Cecile Santos Yumul is a veteran award winning Broadcast Journalist, a visionary teacher (Most Outstanding Teacher of the Philipines in 1992), a nationalist (Most Outstanding Kapampangan for Education in 1993), an environmentalist, and a dedicated daughter. She has over 35 years experience in the field of arts as an actor, director, and author. She is a published writer (Woman's Magazine) of essays, poems, short stories, and social commentaries. She currently resides in Lakandula, Mabalacat, Pampanga with her Mother, 18 dogs, doves, and bonsais.]

-Posted: 7:29 PM 10/11/08 | More of this author on eK!
WHAT THEY SAY...

Manolo Gatbonton (of USA) writes...

Kabangun ku nandin a isip kung lumawe king eK site. Mibungad ya ing sinulat ng Atching Ces, agad keng linawe, binasa (balu meng balu ing ma'ilig) kanyan pala susu lang bilibid ampong papa. he he he he.

On the serious side: Tutulu ku wawa kabang babasan ke ing sinulat la. Ay kanyaman ilyupan ing sabo lalo na nung mapali. Yanapa mu, Manolo Gatbonton, Anak Candaba

-Posted/Via Email: Saturday, Sat, 10/11/08



Papa Osmubal (of Macao, China) writes...

Kabalen Atsing Ces, Keng kekami mu naman ing gagawan na ning pangari kung babayi ampo nitang apu ku, pablasang makatayid ya ing biye mi keng marangle. Ing gagawan da isabo ro reng susu. Kaybat dong pesukan deng susu, pututan dala o pukpukan lako sepu reng susu, kaybat igisa ro pa keng bawang ampong laya. Danuman dala. Dinan deng kapaya ampong bulung aya, o kaya nung alang bulung aya bulung lara. Asnong kanyaman deni.

Neng mamaglimas ku kanita patse ala keng lub keng piparagaralan, ikaming reng kakyalung ku maglimas kami. Keng palak a burak ampo kareng yungib o busbus, makakapkap ke kanitang susu. Deni reng upa mi kareng tutuki kekami kanita a sasawup. Kasi kayakwa ra reng asan a lilimasan mi, paburen mi lang kumang susu reng sinawup kekami kanita. Asnong kasaya uling tsarakal la susung akakwa.

Ketang aldo maganaka ya pa ing gabun kekatamu, uling kanita maganaka tamu mu naman keng gabun. Babye tamu kanita ing buri ning gabun, anya ing gabun babye na kanita kekatamu ing buri tamu.

Ngeni kelingwan ta ne ing gabun anya ing gabun kakalingwan na nakatamu mu naman. E ku balu nung dakal la pa reng susu. Ing balu ku keta kekami keng Magalang dakal la pa kanu reng manyusu kesa kareng susu, ngara. Ini tanda na ning katutuwan a dapat tamung marap pasibayu keng gabun, lingunan taya ini, bangkanita ibiye na ing kailangan tamu, ibiye nong pasibayu reng susu a e tamu dirinan ulaga ketang minuna. Ngeni pu keti tuknangan ku (Macau) uling ala kaming marangle, ing ulaga ra reng susu, nung sali ka, asnong kamal, anti la mong gintu.

Ketang aldo sinali kami, uling bisa ke rugu taganang mangan susu, mangalengale ku rugu luwang memayad mal. Gisa kong bawang ampong laya, kaybat bilusnan kong ditak a alak, e ku no denuman, lingkas ing sarili rang sabo, kaybat esinan ku lang bagya. Nyaman da. Kalupa na pu ning amanwan yu mengabusarat ku pusad keng kabsi ampong menimawas ku. Matas ku man pu prisyun, dapot inisip ku mate na nung mate aku, migpakabsi ku, linayo ke ing sarili ku kareng susu.

-Posted/Via Email: Sat, 11 Oct 2008 22:04:21 -0700



post Publish your comments...
Nextnext