KALUAT KU nang e manakit sarul gamat ampong ortelanung gagambul king marangle. Pati magbabad king burac, kabang mitipun la ring lango at tulang king gulut at lele ning magpainawang damulag, bibiung king balugbug na kabang sisipang dikut at pisig pisig ya bintuk piyasiwasiwas ne ing iki na.
Enaku manakit gagamit bikse ampong igu. Eku na naman ababawu ing banglu ning pamanggisa potang oras ning pamaglutu king bariu. Ding banggera nu la makasele ding sartin at makapatung ing tapayan lulanan inuman.
Alang dapug neng bayu datang ing sisilim. Alang sasalingalngal ningnang tuyu o kaya tinapa, para isamut king linggukan a kangkung o kamuti. Alang baung dikut, malanging are, ampong taklang damulag.
Alang magtumaila anggang pang makananu ya gege ing boses nang apu, o ima , ene a tumbasan ning alang kapupusan a makasulpak a ipod king balugbug mu.
Aliwa ya agud boses ing kaluguran, ning Indu, at y Apu.
Aisip me man, aganaka me man, lalu na't linub na ing amaiam, eme alasa ing niaman ning Duman. Dandaman mu la man, akit mu la man king webcam at video-calling aliwa ya pa mu rin ing pali ning salu ampong igpit daring brasu aampong sakmal ding gamat potang milapat ra ring salung mikakawul. Aliwa ya niyaman ing bawu ning kaluguran ngara pin king kelwatan mu makabaung stetsayd, panintunan me pati tang emu buring baung kaslam pawas uling makabilad king marangle, pati kili-kiling babawung sabo bulanglang.
Bakit wari? It moves all of the senses. It is the only one which makes sense. Bawat pangisnawa, bawat tagaktak ning pawas, bawat agus ning lua, bawat tula at saingsing ning anak at asawa, Indu, Ingkung at Kamaganak ati ka lele da. Amu nang masnuk mekad neng kayi. Ita at ita pa mu rin ing mangibabo kekatamung Pilipinu ing makayuli at mikit pasibayu. Anya eta wari, anti mong alikansia kekaban makawale ka, tipun-tipun, sabun, lotion, de lata, tualia, t-shirt at nanu nanu pang a pamie. Peparagul dakang e makasarili, nune king nanu mang bage, madake ya ing bawat metung king pamilya.Uling buri mu duangan mu lang ding makikit keka king pamanuli.
It is after all the ordinary migrant Filipino who makes the most sensible reason for wanting to have more of the comforts in life not for himself, but for family and extended family as well. This is inherent in almost every Filipino in the early years of migration to other countries. It is to save and come back home. However, as years moved on to decades the ticket ride on the homeward bound seemed to have been waylaid due to so many other priorities until someone dies. Then you come home.
Kata katang salamat at dinatang na ing panaun, ena siguru panayan malyari itang sinabi ku bayu ka misip king pamanuli mung pasibayu. Oyni ing metung a gewa ning Arti Sta Rita king pangatatag na at pamagpalage ketang U.S. Tour da milabasan a maleldo.
King pamanuli da, dekayan daka tamu nung nanu ing inapag da karing menalbe tamung kabalen ati ngan king mialiwang labuad America. Oyni ing mapilan a tinarak king pusu anyang sabadung bengi king, PAMANULI concert king HAU theater.
Mapilan la pa reni king e na patugut kukurukul king pilubluban mu ustung digpan naka ning Arti Sta Rita.
Lalam sala ning bulan. Pamilyang misalbag king mialiuang labuad ning yatu.
"Potang malungkut ka agnan ta lumawe king sala ning Bulan," nganang Guidu
Angga ala yang sala talanga ka king banua, balu mung atiu ya pa rin ing bulan.
Ing pisabi da ring mikalugud miasawa nyang bengi bayu mikawani munta abrod.
Metung ya namang tiktak king kasanting, malalam a kirut king pusu ing eksenang ini. Uling apakit ne ing nung makananu king alub danang mipasanting ing kabilian ning pamilya. Minta ya Amerika gang man e maibug y Guidu. Kaibat nakang iduyan ning eksenang ini at maibug nakang mamanulu saldang, bilyanan naka naman siste king tutuking dialogue, uling pakit na nung makanu potang tanggap na ing pamaglaco ning metung a kapamilia, kata katang panabilin ing ing lumapo agnan agnan karing atiu entabladu... M&Ms, Ershey, isnikers, spam , sanabagan!!! Mendalas yang maniabi king panabilin ene ikuang a pansin, meko ne pala y Guidu !
Ing katutuan a ini, lalu yang matingkad keti banda Pampanga uli da ring Clark Air Force Base at Subic kanita. Gawan me man lista at siguradu akit mu e malayaring alang kamaganak e linub king navy (lalu na) anti mo i Guidu.
Andy Alviz's PAMANULI brings you on a roller coaster ride of laughter, reminiscing, conscience, piercing humor, highlighting with gusto the Kapampangan's light-mannered use of profanity which brings one to sagakgakan in instant recollection at having used the same language. Most of all those who've watched the show especially those from the West Coast in their U.S. Tour, without saying out loud were in a chorus in their minds, "Tanay Da Na! Bisa nakung Muli! Tanay Da Na pang Andy Alviz, papagkusuelu naka pin, pagalapakan naka pin, pepagagan naka man bandang tauli! Tanay da na talaga, maskup ku yata salu! Ima, Inang, panayan yu ku muli naku!" Gang man alang kang damdaman masikan, king agus da ring lua king mata at siguk king sipun da ring manalbe, mangapanagkas la king niaman at agnan sakit ning panandaman ketang oras ayta. Peparamdam da ring Arti Sta Rita ing lablab ning pangakapampangan mu (maski nanung malilyari king siping mung bale o kabaryu, abe abe, tuki tuki, dame dame!) at ing alang panulung katumbas ning lungkut ning makadayu nune ing Pamanuli.
Tanay Da Na! King oras ay ni eya panagkas akakit at daramdaman ku, nune kasi mituran, ali mu aptdu, balunbalunan, pusu, nune pati kaladua da ring manalbe. Metung yang pinakamatas a papuri king penibatan na ning beyit a anak. It is for lack of the ultimate phrase of praise and the only exclamation for mother and son that could be uttered again and again during the performance wanting to keep quiet but at the same time tortured for feeling both agony and ecstasy Agony for all the years you've not felt, seen all that was, outpouring onstage in rhyme, music, and drama. Ecstasy for instantly bringing you back home to the fields of boyhood days, and street language you have not heard for so long, scenes of barrio life, you thought you may never see again. Tanay Da Na! Uling nung ene beyit at dinayas linwal king antak ng inda na, eta mu sana akakit ing gelingan ng Andy Alviz at ing Arti Sta. Rita.
Makatapilan me man alben, ulit ulitan mu man dandaman eka sumawa. Uling ing katutuan, ring gawang Arti Sta.Rita biniayan de ing busal ning salu ding Kapampangan, petingkaran ng Andy Alviz ing lagu ning kekatamung musika at kultura, pepalto na ing lagu ning kekatamung akamulatan. Nung bisa kang sumulung at malaut dasnan, metung ya ing talagang paintungulan potang miras naka king ruruk. Iti ing Pamanuli at idaun king Balen kaiabe daring kabalen at pamiliang pakamalan.
Publish your comments...
