eK! is electronic Kabalen, a web-exclusive Kapampangan journal of ideas

cecile s. yumul
cecile s yumul IPAGMARAGUL TAYA pu. Kareng mamandatang para bakasyun Pasku, eta ya kakalingwan papasyalan ing sa Clark Expo. Nung emu man akwang miras karing talagang lugar king Ifugao, Kalinga, Bulacan, at miyaliwa pang lugar, keni tana pu king Nayon Pilipino.

Itang meyudlut a pormal ng pamamuklat ning Nayon Pilipno karen kabalen tang padatang ngening Disiembri, tagunan tapu king Disiembri 12, 2007.

Tutu pu masanting ing pamamasyal kareng mall, uling marimla. Marimla—ya pu ita, pero ene agyung ipali at payusbungan ing lugud king indung gabun at ipalto kareng kayanakan ing kekatamung, kasarinlan, kasaysayan, at kultura.

Mas dakal ing eda balu ing nyaman ning mamupul gule king lele ning bale kubu. Kasdan mu ere man balu ing tarnate o balimbing na bungang tanaman nune ing balimbing karela, makayagpang ya karing politikong imbes na sumaup lang mibagua yang mabilis ing balen, balabaligtad lang balabaligtad alang sariling pinsipyu at panalakaran katutuan.

Eda na naman tikman, ing mamanukyat sampaluk, kaimitu, arapilis, duat. biabas, santul at mialiua pang tanaman makapanaun mamunga. Ing balu da wall climbing at vertical challenge, arcade action, at nung nanu pang electronic games.

Igit na yatang kanyaman ing ukyatan me ing tutung maragul a tanaman, mamangulabe ka karing sanga at pibayubayube na ka ning angin amiam ngening Disiembri.

Kasdan mu ere man balu ing talbus (nung wari king wangis amanu, kasdan turwanan naka, "Mom, it's Bush not bus," digpan no ning mayap!). Ing karakalan ning manyaman a dadanggutan mu kanita keng makapatulug king luwal sulip ning matuang bale, ating kang paku, (fern ya yan, abe, fern, as in edible fern; pota bala da ring anak tamu mamangan tang paku—nails), tulud kamuti, kangkung, pansitpansitan, talinum, bulung sale (oyta na naman ana ning anak a engliseru—it's "sale," mom, long "a" as in rhyming with ginger ale. Onta makananu tang mikaintindi!).

Mapilan mu ini king pareung amanu daramdaman king balugbug, pero asna paminkanlaut ing kabaldugan. King pangabuklat ning Nayon Pilipino, ikit ku pung aduang mata nung makananu ing tune saya. Alayu king dekalan ning perang panyali, nune, atiu ketang pamiyabe dang lalakad ding mipapamilya, maglatag lang bakal king lalam ding mangaragul a tanaman. Akit mu nung makananu ing tune ng buring sabyan ning pamilya. Manibat kang apu gang man maka wheelchair ya, akit meng tumiman at mangapatuki king tigtigan kundiman at miyaliwang musika na purus lelangan da ring Pilipinu. Ding anak abulus mulang pulapulaying alang pigaganakan, malili.

Anti na naman nung makananu kung mangabaknal, mangapalua, uling kangatba daring akakit mi kening saya ding pamilyang mamandatang, mas dakal la ring misalbag a pamilyang Pilipinu, misambulat, makakalat mabilug yatu. At makanyan kulang agaganaka ding kerakalan da ring a disipulus, balu ra ini kekaban ning pamanuru ku maigit adwang dekada, metung mu ing tatanam ku king kamalayan da, nung talagang ting lugud at gelingan, ede lalakwan ing balen. At nung e man malyari ita, nung mipalaut lang aliwang labuad, dinan deng dangalan ing panga Pilipinu at maigit kanita, maratna lang marap kaninu man, nanu ya man lahi ing kayadwangan da.

Mapalyaring uli na ning paparamdam at papaganaka ning lugar nung ninu ka, nanu ka penibatan at maigit pa king sabla, kabungad mu pa entrada Nayon Pilipino, atin yang kislut king pusu uling king bandang wanan akit mu ing Pilipinu bayu de pa sekupan, metung yang lahing matalinu, masipag at ating dangalan at matas ya antas ing kamalayan.

Kekatamu ya ini. Pagmaragul taya, Ipabalu taya king mabilug a yatu. Muli tana. Luguran taya ing Balen tamu.


[About the author. Cecile Santos Yumul is a veteran award winning Broadcast Journalist, a visionary teacher (Most Outstanding Teacher of the Philipines in 1992), a nationalist (Most Outstanding Kapampangan for Education in 1993), an environmentalist, and a dedicated daughter. She has over 35 years experience in the field of arts as an actor, director, and author. She is a published writer (Woman's Magazine) of essays, poems, short stories, and social commentaries. She currently resides in Lakandula, Mabalacat, Pampanga with her Mother, 18 dogs, doves, and bonsais.]

-Posted: 1:16 PM 12/3/07 | More of this author on eK!
Nextnext