abel d. soto
PAMAGMASAQUIT
Caring milabas a aldo,

daca'lang cutang ring tatando

quing isip cung e mipasno,

masican la ngan susyo.


Ing poetang Capampangan,

anac ya man o menuban,

camta'ne ing caganapan,

bulung laurel ala ya man.


E nia pin sucat asucad

ning coronang macasucad

ing ulaga na't dignidad

ning poeta at alagad.


Atin ya mang babie dangalan

iting coronang misnang leguan,

e na rin asampulung ngan

ing bie na ning miputungan.


Nun inia sa't lulungcut cu,

baquet daca'la ring tau,

a bibitaul anting asu,

at ing sangcan ya'ing amanu.


E uari camarinayan

at metung a caministilan,

caretang poetang minye dangalan,

bista man e la miputungan?


Ing tune poetang Capampangan,

mapuri ya't picabaluan,

e mu pin quing calalangan,

nune lalu pin quing cababan.


Nun inia sa'ing cacung nasa

ing mipamasalan tamu ngan sa

quing amanung babie tula

ban mitabi ngan ing mua.


Mandatila sa'ing cagalangan

at aliua ing cabugasucan,

ban tutung aquit ta ya ngan

ing catutuan ta'ng paulagan.


Ing diria sa't paguinaquit,

caring laureadu e mayaquit,

at carelang pagcapilit

mie quing ganacang sasandirit.


E yu na mu sana sicasu,

icayu ngan quing parnasu,

ring caung ding anggang asu

a macasirang pangatau.


Aquit da sana quecatamu,

ari na ca ta man ning parnasu

ing tutu tamung susuyu

quing lagyu na ning amanu.


(Lacuan cu ya iting cutang

quecayung poetang miputungan:)


Ing quecayung pamisagsagan

ya pin ing quecayung lacuan

caring sablang cayanacan

                   a ngeni pa mu managuimpan?
—Posted: 10:00 AM 4/25/12 by eK! | Post Your Comment!



About the author. Abel D. Soto took up his certificatory double major course in Creative Writing and Performing Arts at Centre for Arts Foundation, Inc. in Quezon City. He also finished the Managing the Arts Program at the Asian Institute of Management in Makati City. He is a resident of Bacolor, Pampanga.
eK! is electronic Kabalen (http://eksite.com), a pampanga-based web-exclusive Kapampangan journal of ideas.Websilog - an open collaborative blog on kapampangan life and letters. about pampanga culture, arts, history, society, and politics.
Keni@Ngeni - your daily kapampangan media mashup: breaking news & reviews from pampanga, angeles city, central luzon, the kapampangan region, philippines & the world.
Versilog - new Kapampangan poetry.
Blogganisa - your kapampangan community blog slash guestbook slash bulletin board slash shoutbox slash forum slash post-it-note all rolled up into one meaty joint.
IndioTV - a kapampangan indie web tv.
Tiangge - shop kapampangan. support eK! by shopping from our amazon affiliate store.
Palengke - the kapampangan business and professional registry.
eKalendaryo - kapampangan events calendar.
eK! wiki - all about pampanga, philippines. profile and brief history of pampanga towns and cities: angeles city, clark, city of san fernando
eK! sponsors & partners - with passion and dedication, eK! sponsors, partners & friends support us and we encourage you to support them.