abel d. soto
POEMA AT PANGADI NGENING PANAU' NING PASKUNG PANGASUBLING MEBIE
ING PAMAMATAUAD
Ua, tutu pin ing masaquit ing ibie ta ya'ing capatauaran,
Lalung-lalu na caring taung e ta mu tinuring cacaluguran,
Sabian pa nung reting tau sinugat da ca tamu capanandaman,
O ing dilpac da ca tamu pangatau a tutu tamung pacaingatan,
O ing silbag da ca tamu camarinayan a tutu tamung penandaman,
Nun inia sa't quebat ta ya ing pasbul na ning capatauaran.

Ua, tutu pin ing mapait ing acmulan ta na mu cabud
At idalan quing e bubulad ing sablang bague e maca-tud,
E ta ya man acuang asangcan ing batas na ning lugud
Ban tumibe ya sa'ng baguia ing relasiun tang mengatbud
Bagcus panusignan ta ya pa capanandaman a maglumud
Quing masalang caisipan a parating dapat ta sa’ng susulud.

Ua, tutung normal mu pin ing mua pin ya'ing panandaman
Caring taung menampalasan quing dangal tamung paulagan,
Uling pin ing Guinu tamu a mengabus quecatamu ngan,
Icua na mu namang minimua caring Pariseong tampalasan,
Ban caya ping apasiag ing e macatud a cararaptanan,
Dapot iting mua e na tenam quing caisipa'na't pilubluban.

Ua, tutu pin ring sablang tau acacua ra ngang mimimua,
Santu la man o macasalanan, duajagui la man o timaua.
Uling ding banal, tau la naman a e tamu sucat icalilua
Caring ordinariung tau a darayu quing divinung sala.
At ing cabanalan e na darayu, quing daque ning panga-TAU ra,
Dapot susupilan ne niti iting mabangis a lasu'na ning mua ra.

Ing paniulung ning pangatau e na mu naman darayu
Ing catuliran a mua tamu caring capara tamung tau.
Dapot e ta sana cacalinguan ring cautusan-Cristianu
A miubug quing bie tamu at quing quecatamung pangatau.
Ing Espiritual a pamiubug e na darayu ing mua tamu
Dapot darala ne iti quing panandam a mas mayubu.

Ing Banal a Espiritu e no capilan man lalasacan
Ring naturalesa ning taung ing Dios Ipba yang migcalam,
Nune sasaupan na ca tamu ping linisan ya’ining capanandaman,
At dirina'na ca ta'ng GRACIA a caulan ya'ing capacumbaban,
Uling ing capacumbaban metung yang asias ning capayapan
At ya'ing amut na ning lugud a cacau ning meto-sicluban.

Sasaquit mu ping e mu nanu ing pisasabian a pamaglualu
O ing manauang a panga-umis na ning quecatamung pangatau,
Potang ping pabustan tamu ing supila'ne ning mua tamu
Ing cautusan-Cristianu a luguran la ring casalang tamu,
At ing ipangadi ta la pa ring menampalasan quecatamu,
Uling iti ya ing inalimbaua’na ning Talapangabus ning yatu.

Ua, dapat mu ping ing ipasiag ya iti nang capanandaman
Ning ninu pa mang tau a matulid mung manandaman
Quing pangadacurac na ning cayang ingatan a dangalan,
Ban iting sucal miyugse ya quing pusali ning milabasan,
At munie yang pasibayung dalan quing mebating a camasalan,
At pabustan'ne iting mibalic, iting mecalinguan a capayapan.

Dapot pota ping ini nang mua, yang pebustan ta'ng mandatila
Quing quecatamung pangatau a e pin quing mua megaua,
Lasuna'ne pin at lasunan ing caisipan, pusu, at ing tula,
At parating ing aquit tamu caring taung tutu ta’ng mua
Ya pin ing anggang meguing sangca'na ning sablang casalanan da,
At ya mu namang meguing amut na niting masiring mua ta' carela.

Ing espiritual a pamiubug tutung sasaupa'na ca tamu
Ban mipunla ya quecatamu iting paglalaue-divinu,
Ban mirinan bayung camasalan ing sadiang panugali tamu
At ing sablang meguing amut na ning mua tamung micacalucu
Lauan tamu ping pasibayu quing sala ning pamagbayu,
Ban managumpe ing capayapan a nasa na ning Apung Guinu.

Dapot iti ya ing cucutang da ring taung ating cacamuan:
Macananu cong apatauad ring taung cacu menampalasan?
Ala na cu uaring panandam, ala na cu uaring catuliran?
Iti mu yang aibie cu, uling reni mu ilang catutuan
A tutung munie capayapan quing pusu mu at caisipan:
Supilan mu quing PANALANGIN ing MUA mung alang paquinabang!

At ngara pa ping mangutang rening taung menandaman:
Macananu cong patauaran reni nang canacung casalang,
Nung e no man sisisi caring casalanan dang depatan,
At e la man mengamanung pamaniauad capatauaran?
Pabustan mu ne ing Dios yang mucum carela ngan
Uling quing Cayaria'na, e no na man ngan papaluban.

Buri mo pa uaring idala quing quing cutcutan mung paintungulan
Iting micacalucung mua mu caring casalang mung picasaman?
Payapa ca cayang mipapatudtud quing quecang pagqueran,
Nung quing pusu mu't caisipan ating muang macatanam?
Mirinan ca cayang capayapan? Miras ca caya quing carinan
Nung e me iugse iting sucal, bagcus tenam me pa't pelabungan?

Isucu ta na sana iting mua tamu caring anggang casalang tamu,
At papaliarian tamu ing caburia'na ning malugud a Dios tamu.
Ing GRACIA na ning capacumbaban ya sanang parating pangadi tamu,
Ban parati tamung mibiebie caring cautusa'ning Apung Guinu,
A ya mung bucud ating upaya, upayang musig quecatamu
At aliua ring caburian tamung macayamut quing batas ning yatu.

Iti sanang birtud ning pamamatauad ya sanang miral parati
At ya sanang lacuan tamung mana caring tutuqui pang dai,
Uling ing bini na ning pamamatauad ya pin ing masustansiang bini
A sucat tamung itanam caring pusu da ring cayanacan ngeni
Ban potang miras na ing panaun ning quecatamung pamanuli,
Miuli tamung e magcasaquit at e ya sisisian ing sarili.
ALA SANANG MUANG MITANAM CANACU
Guinu, papanatilian mu cung mulat
nung caninu co ngan tau dadalipat
iti nang mua cung alang mayap a arapat.

E co sana paparusan ding alang casalanan
At ala sanan mua quing pusu cu mitanam
At misambulat a masican anting bulcan.

Bayu que pa man sana idaun quing altar mu
Iti nang daun cung salamin ning pangatau,
Ala cu sanang casalang a tutung picacasaman.

Ibulus mu cu quening gueua cung suculan,
Ing sucula’na ning mua at ning cayabangnan,
Ban miyabe cung pasibayu quing quecang cauan.

Linisan mu cu caniting mamung pamagcunuari
A tutu nang meyaquit caring Pariseo at pari,
Ban tutu cung nabangnan ing bunga na ning pangadi.

Iti sanang canacung mua miyalilan yang tula,
at e que sana pagcamalian anting tune capacumbaban
potang ing mua cu quing sarili yang cacung panandaman.

At e que sana gagamitan ing matulid mu't cayupayan
Ban queng ipamatacut caring canacung casalang
Iti nang mua mung ipagpa caring taung tampalasan.

O Guinu co, managumpe ca caniting laban . . .
careting Pariseo a queca linapastangan,
a quing pusu cu mabibie mu nama't manucnangan.
MANUCNANGAN CU SA'NG PARATI QUING LUGUD MU
Pabustan mu sana ing manucnangan cung parati quing lugud mu
At mananu na sanang munie yang ubug quing canacung pangatau
Ban e na cu maguing malungcut a pastul na ning bie cu.

Iyuli mu cu sana caring mangatas a tucnangan ning canacung caisipan,
At e mu cu darala caring macasarang esquinitang canacung pagmalunan,
Ban maligua queng tuntunan ing dala'ning Quecang cayarian.

Ulasan me ing caladua cu potang daratang ing dimla ning calungcutan
At e mu sana pabustan ing laclaca'na cu ning quetasan,
Nune papanatilian mung mabibie cu quing capacumbaban.

Ala sanang nanu pa mang maguing mabayat a sagabal
Queting pamaglacbe cu quening bie cung tutung mal
Mie Cang sala caring tacbang cu at ing tula mu itibabal.

Lacbayan que sana ing bie a mitmung cayan a pusu
At manucnangan cu sa'ng parati quing masapsap a lugud mu,
Ban parati cung maguing piaquitan ning Banal a Lupa mu.
ING QUECANG PACALULU
Guinu, liguran me ing marinat cung pangatau.
Pebustan mung manucnangan cu caring calam mu.
Binulus mu cu quing sucula'ning canacung quetasan,
At quing pacalulu mu inauad mu ing agyu cu mung daptan.

Quing calam na ning Quecang tune pamamatauad
Maguing mayan ing beyatan ning casalanang e alingad
E cu sana cacalinguan ing Queca maniad tauad,
At patauaran la naman ring micasalang capatad.

Inauad mu ing maguing dala'na cu ning Quecang pacalulu
Ban ayatad que'ing capatauaran quing canacung yatu.
Ilual mu cu caniting mapaglinlang a presidiu
A parating magparatut quing pansariling caligtasan cu.

Linisan me ing pusu cu a miqui murit a cayabangnan
At parati mu cung lunusan at parating pacaluluan,
Ban tune que ping nabangnan ing Quecang cayarian,
At tairan la ring capara cu caniting alang-anggang carinan.
Ipagcalam mu canacu ing gracia ning pamamusan
Quing Crus a tune ping pepabayat ning casalanan.
Tairan mu cung parati quing dalan cung dapat tuquian
Ban parati cung nabangnan ing pacalulu mu't capatauaran.
PANALANGIN PARA CARING MAGDULAP CATAJIMICAN
Guinu, tairan Mu cu quing mamung catajimican
at ituqui Mu cu quing pangadi ning catajimica'ning pilubluban,
ban queng atuquian ing sala ning bie-alang-capupusan.

Ing caganapan at cametungan, a canacung pagdulapan
e co capilan man asumpungan quing canacu mung beluan
at quing libutad da ring mengapirasung bie-sicluban.

Dinan Mu cung catajimican ban canacu yang damdaman
ing pamaindala'ning catajimican quing bie cung lalacbayan
ban ing siuala Mu, quing yatu cu yang damdaman.

Anti cu uaring silbag da caring bulung da ring indredus,
mababating cu caring amanu a mababo mu pangatulus
dapot macapuput quing caladua cung magmacalunus.

Ing catajimican mu atyu quing calalaman ning pilubluban
nung nu ya titipa ing cabenguian a misteriu ning Quecang leguan,
ban ing siuala ning pusu Mu mas masala ya ping damdaman.

Ing catajimican Mu mangamanu ya quing pangatau cu
uling quing catajimican pin carin ca tutung mangamanu,
a meramdam quing Anac Mung Amanung Micatauang Tau.

Ing mayupaya nang amanu na ning malugud a pamaquiramdam
Tune pin ing amanung tutu Mung masiring paquiramdaman,
Uling ing catajimican ya'ing piaquita'ning tune cabiasnan.

Nanu ya pa uari ing panalangin nune ing catajimican arapan Mu?
Ing panenayan ya't paquiramdaman ing Banal Mung amanu,
ban arinan queng capainauan ing malabit a asbu'cu.

Libutad na niting maleguan a catajimican,
miquiquit ca tang anting tune micaluguran,
ban miras cung tajimic quing banal Mung carinan.
—Posted: 7:36 PM 4/28/11 by eK! | Post Your Comment!



About the author. Abel D. Soto took up his certificatory double major course in Creative Writing and Performing Arts at Centre for Arts Foundation, Inc. in Quezon City. He also finished the Managing the Arts Program at the Asian Institute of Management in Makati City. He is a resident of Bacolor, Pampanga.
eK! is electronic Kabalen (http://eksite.com), a pampanga-based web-exclusive Kapampangan journal of ideas.Websilog - an open collaborative blog on kapampangan life and letters. about pampanga culture, arts, history, society, and politics.
Keni@Ngeni - your daily kapampangan media mashup: breaking news & reviews from pampanga, angeles city, central luzon, the kapampangan region, philippines & the world.
Versilog - new Kapampangan poetry.
Blogganisa - your kapampangan community blog slash guestbook slash bulletin board slash shoutbox slash forum slash post-it-note all rolled up into one meaty joint.
IndioTV - a kapampangan indie web tv.
Tiangge - shop kapampangan. support eK! by shopping from our amazon affiliate store.
Palengke - the kapampangan business and professional registry.
eKalendaryo - kapampangan events calendar.
eK! wiki - all about pampanga, philippines. profile and brief history of pampanga towns and cities: angeles city, clark, city of san fernando
eK! sponsors & partners - with passion and dedication, eK! sponsors, partners & friends support us and we encourage you to support them.