jose roman reyes laquian
PANAQUIT
Malualas yang macabuclat ing banua na ning cabengian
at sapac ya caring batuin a pacalto caningningan.
Ding colina't bunduc mabie la't agnan qng pamidulang
at ding dicut mimindac la queng labul ning angin Amian.

Itang saguling dinatang ning canacung catimauan
nung nu queng aus ning angin matula cung mequiramdam
at ding pacpac na sequen cong masaya capilubluban
at ing diua timaua yang sinulapo qng catasan.

Que libutad da ring batuin sinlag ya ing reinang bulan
at balu na ing sala na e ya ganap a cabilian;
ding iyas da ring batuin at bulan linto migculangan
la sala quetang dalumdum imalan na ning cabengian.
Menagcat ya queng diua cu, "Maliari mu cung abaian?
Ing sala mu at ing cacu isalbag ta," aning bulan,
"catmuan te qng masala ing sari dulum ning cabengian
at panayan te ing aldo lunto at munie aslagan.

"Tau, sulu mu cailangan sala qng meto sicluban,
maguing iyas ning pagasa queng dalumdum ning cabengian
angga ing panaun miras ya qng sadia nang angganan
at ing aldo sunlag ya qng banua na ning cabucasan."

Ing mapinung espiritu na ning bayung galing aldo
atin yang papas at lare, at mairong banua babo;
alcus da ring talangdutung ampon maselan a paco
linto la'ybat qng dalumdum, queng pamibalic ning aldo.

Ding alino qng caquewan teterac lang maqui saya.
Ding patac-ambun quiquislap lang malasmasan ning sala.
Detang mamusbus a iyas midagdag lang tindag-magia
at ding ayup magcanta lang papuri qng DIOS ta banua.

Queng panugaling salpitic a masigla nang pepalto,
ing Indung Sicluban lidlad ne ing panibayung aldo
caibat ning memampan ulap a mialsa queta babo
anting talucbung ning ulas a masalusung milaco.

Ing malacayung sicluban matalustus yang pepalto
maqui bacas da ring lumut, amog ning luang cabud linto
ibat caring pinanaring sampagang macapaniglo,
queng saya ning pamidaque quetang lugal dang sagrado.

Ini'ing saguli nung nu ding balang capigaganacan
calinguan ta queng inaua ning marimlang angin Amian
at ing iyas ning pagasa quilub ning capilubluban
anting aldo yang macaslag queng calamnan ning caquewan.

Ding imperio ning daratang imperio lang caisipan
at ing e macasadia queng paniatang ning cabucasan
ya ing taung micacunu't ing isip na magculangan
capan'walan qng bucas a maqui cayabeng canawan.

Ing daratang bandi ne ning manaquit posibilidad
bayu la maguing catutuan ning panaun a manatad.
Ding posibilidad tandang ibat qng DIOS a Miglalang,
Ya'ing maglalang qng daratang ibat murin qng daratang.

Balang siglo mangailangan yang taung manalacaran
at mangabus qng panaun, queng panaquit ning cayapan
diquil caring bayung bague na ning bucas a daratang,
bayung yatu mayaquit qng auang da ring panimanman.

Ining casalpantayanan queng bague e acaquit man
panuanan ne ning catutuan at pasiag ning panimanman.
Ngeni maguing salilungan ya'ing lalam na ning tanaman
uli ning bining mitanam 'nyang panaun milabasan.

Ing tumpuc da ring batu e manatiling tumpuc-batu
qng saguling pigunaman ne'yti ning metung a tau
at qng queang panaquit a nuan bandi na babo yatu
gauan ne ing tumpuc-batu... masampat a... monumento!

Ing maninap asmu catas maninap yang catuparan.
Panaquit na... ya'ing pangacu nung nanu ya queng daratang.
Bayu pa ing pangayatyu ning matas nang paninapan
iti iquit neng babaltang qng gasgas nang tutuntunan.

Aliua ya ing laue queng acaquit ning panimanman:
Ing tune pamaglacbe queng bayung beluan-camalaian
alayu queng pamanintun lugal pang-casalesaian
nune atiu queng mantabe espiritung panimanman.

Lumaue cang masalese queng aldo casulucuyan.
Paninap ya ing napun at panaquit ya'ing cabucasan.
Dapot nung ing bie mu ngeni bibiayan me qng cayapan
ding bucas mu panaquit no ning pagasa't catimauan.

Nung nu ala ing panaquit, ing balen masisira ya. *
Nung nu ala ing panaquit, milalaco ing pagasa.
Ing dalise panaquit ta... quilub pusu ta atiu ya—
Que lual ya'ing paninapan ta, ... quilub mabie ya'ing diua ta!

* "Nung nu ala ing panaquit, ing balen masisira ya." Ding Casebian 29:18 ("Where there is no vision, the people perish." Proverbs 29:18)

DING CABALDUGAN AMANU (WORD MEANINGS, CAPAMPANGAN: ENGLISH
Pacalto: showing, exhibiting
caningningan: luster, brilliance, shining bright
colina: hill, hills
agnan: at the same time
pamidulang: rolling
mimindac: swaying, swinging
labul: blow, to blow
Amian: the north wind
Saguli: moment, as in "just a moment" ("saguli mu")
catimauan: freedom
diua, diwa: intellectual inspiration
timaua: free
abaian: to accompany, to keep as company
isalbag: to sow, to scatter
catmuan: to fill
sari dulum: extreme darkness
cabengian: duration of a night
iyas: ray (of light)
pagasa: hope
miras: to reach and arrive at a destination
angganan: ending
sunlag: to shine
cabucasan: the following day
mapinu: gentle, refined
espiritu: spirit
galing aldo: dawn
papas, mapapas: yellow
lare, malare: pink
mairo, iro , irau: blue
alcus: shape, shapes
talang, malatalang, sulbang, siga: red
talangdutung: redwood
maselan a paco: delicate fern/s
linto: appeared, to come into view
caquewan: forest, woods, groves
teterac: dancing
patac-ambun: dew drops
quiquislap: sparkling
malasmasan, pamicablas: reflection
sala: light
mamusbus: piercing
midagdag: add, to add
tindag-magia: magic glow
ding ayup: birds
magcanta: sing
papuri: praise
panugali: character, trait, habit
salpitic: celerity, speed, quickness, liveliness
Indung Sicluban: Mother Earth
lidlad: unfolded
memampan: cover from one's view
ulap: fog, mist
mialsa: lifted up
talucbung: covering
ulas: blanket
masalusu, matalustus: fast, swift, quick
malacayu, cayumangui, comangui: brown
bacas: trace, traces
lumut: moss
amog: somewhat moist, humid, damp
pinanaring sampaga: rainbow flowers
macapaniglo: that which is yearned for or wanted
pamidaque: sharing
sagrado: sacred
capigaganacan: much worry or concern, anxieties
calinguan: forget
inaua: breath
capilubluban, pilubluban, caisipan: mind
calamnan: contents, space occupied
imperio: empire, empires
ing, ning daratang: the future
e macasadia: not ready
paniatang, pamaniatang: arrival
micacunu: reluctant, hesitant
canawan: prosperity, comfort in life
posibilidad: possibility/ies
tanda: sign
DIOS a Miglalang: GOD our Creator
maglalang: create
maglalang qng daratang: create the future
ibat murin qng daratang: which also comes from the future
siglo: century
manalacaran: stand up and fight for one's principles and beliefs
mangabus: redeem, to redeem
panaquit: vision
cayapan: goodness
bayung yatu: new world
auang: window
panimanman: perception, to perceive through the eyes
casalpantayanan: faith
e acaquit: that which is not seen
panuanan: to bless
pasiag: to reveal, to stress and make known
salilungan, silungan: shade
tanaman: tree
bini: seed
mitanam: planted
panaun milabasan: time/s past
tumpuc da ring batu: rock or stone pile
pigunaman: to meditate upon
monumento: monument
maninap: to dream
asmu catas: lofty
pangayatyu: existence
babaltang: treading, traversing, walking along a path
gasgas, dalan: road, path, trail
tutuntunan: following along a path, trail
pamaglacbe journey, travel
beluan-camalaian; knowledge consciousness, awareness
lugal pang-casalesaian: historical place/s
espiritung panimanman: spirit/spiritual eyes

*

Panaquit, Tilip: heavenly vision; vivid conception under divine influence; the act or power of anticipating that which will or may come to be: prophetic vision; unusual competence in discernment or perception; intelligent foresight: a leader of vision

Alimbaua (for example):

1.

"Qng bengi mu ring ita mipabalu ya
ing misterio da ring panaun daratang
cang Daniel qng capamilatan na ning
metung a panaquit. At pinuri ne ing
DIOS ning banua." Daniel 2:19

2.

Ing pamaniatang ning aldong mag-ari
ya ing Mayap a Pamangobierno at Tutung
Catalauran (True Justice) ing canacung
panaquit.

Panaquit, Panimanman: sense or object of sight; someone or something seen

Alimbaua:

1.

E mayap ing pane pamaglasing nang
Teban queng panaquit da ring uali na.

2.

Malagu ya y Flora queng panaquit
da ring cabaryu na.
—Posted: 9:41 AM 4/9/10 by eK! | Post Your Comment!



About the author. Jose Roman Reyes Laquian graduated from the University of Santo Tomas College of Architecture, Espana, Manila, Philippines, in 1975. He took and passed the Philippine Architects' Licensure Examination the following year (July, 1976). He had worked and traveled extensively as a Senior Design Architect in various architectural firms in Manila, Philippines, in Malaysia, Singapore, and in the Sultanate of Oman, State of Qatar and Dubai, United Arab Emirates, the Middle East. He hails from Santa Rita and Minalin, Pampanga, where he spent his memorable and happy childhood and adolescent years. He is presently residing in Fremont, Northern California, U.S.A. He is a corporate member of the Philippine Institute of Architects and of the United Architects of the Philippines (U.A.P.) Northern California Chapter and works as a freelance architect. He says that his "deep and pure love" for his Amanung Sisuan inspires him to write "poetry with fiery passion." He is one of the twenty-one living Poet Laureates of Pampanga and is a member of the College of Poet Laureates, Parnasong Capampangan.
eK! is electronic Kabalen (http://eksite.com), a pampanga-based web-exclusive Kapampangan journal of ideas.Websilog - an open collaborative blog on kapampangan life and letters. about pampanga culture, arts, history, society, and politics.
Keni@Ngeni - your daily kapampangan media mashup: breaking news & reviews from pampanga, angeles city, central luzon, the kapampangan region, philippines & the world.
Versilog - new Kapampangan poetry.
Blogganisa - your kapampangan community blog slash guestbook slash bulletin board slash shoutbox slash forum slash post-it-note all rolled up into one meaty joint.
IndioTV - a kapampangan indie web tv.
Tiangge - shop kapampangan. support eK! by shopping from our amazon affiliate store.
Palengke - the kapampangan business and professional registry.
eKalendaryo - kapampangan events calendar.
eK! wiki - all about pampanga, philippines. profile and brief history of pampanga towns and cities: angeles city, clark, city of san fernando
eK! sponsors & partners - with passion and dedication, eK! sponsors, partners & friends support us and we encourage you to support them.