jose roman reyes laquian
PINGGAN

(03 OCTUBRE 2007)
Itang átsi ampon uali malumeme lang mamañgán
malumeme lang mamañgán misusulu quetang pinggan
latang pinggan ating ditac laman nasi ampon asan
asan tuyu cacapurit miabe dang pisusuluan.

Careng japis dang itsura pati yayat dang catawan,
butul-balat lang larauan ning matinding casaquitan,
quetang apag misusulu, malumeme lang mamañgán
nanamnaman deng cacanán itang nasi ampon asan.

Sumangid ning casaquitan bunga na ning cacaluluan,
ngening bengi misusulu detang adua queng pamañgán;
abac ampon gatpanapun danup pilit dang tidturan
ban a-labas de ing caplas ampon calam na ning atian.

Ngening bengi macatiman lang misusulung mamañgán,
ngening bengi milamnan la reng atian dang alang laman;
itang carelang asimpan ditac a nasi at asan
maulagang pamañgán yang cacanán da't nanamnaman.

Ing inda da taimic ya, ding imalan pipipian na
que lual na nitang cubu, matiaga yang magobra;
matiaga yang mamipi lalam aslag na ning bulan,
cailangan nang mangabiayan ning masaquit nang catawan.

Ining mebalung mamipi , quening yayat nang catawan,
bengi't aldo quetang pipian matiaga yang mangabiayan
ban queng panaquitan ditac macasali lang pamañgán
itang ditac a pamañgán miabe dang pisusuluan.

Ining inda ampon anac: ing mapait a larauan
da reng anac mung misaldac, misubsub qñg cacaluluan;
Masdan mu la, Indung Tibuan, O' Balen cung Capampañgan,
Masdan mu lang mamalipit, mitmung dusa't casaquitan.

Angang cap'lan la mibabata libung danup at quealan?
angang cap'lan de lacaran ing dalan ning caluncutan?
deng anac mung e megaral, memulat qñg camángmañgan
pauli ning cacaluluan: e abilang, Indung Tibuan.

Deng anac mung mepalungi, memisali caring laman,
deng anac mung memaglaco, memanintun pangabiayan,
mig-sacripiciong merayu qñg pamiliang pacamalan
pauli ning cacaluluan: e abilang, Indung Tibuan.

Angang cap'lan mu pagumasdan ing masaclap a larauan
dareng anac mung daranas libung dusa't casaquitan?
angang cap'lan ya sumaclub itang biga ning quealan,
libung gaga at jinagpis ala na'tang capupusan?

Cabang queng pusu mag-ari ing taco at casaquiman,
cabang guinu de ing cualta deng matacong manunculan,
cabang e ca tatalacad wacasan me ing carocan,
Indung Tibuan, manatili ing masaclap a larauan ...

Panaun na, panaun na, O' Balen cung Capampañgan!
Dinatang ne, dinatang ne: Oras Mung Manalacaran!
Mibangun ca't durugan me ing baluarti ning carocan,
Deng anac mu, iligtas mo queng pinggan ning cacaluluan!

BOCABULARIO (CAPAMPANGAN): VOCABULARY (ENGLISH)
"átsi" : older sister; what to call an older sister or certain older woman
"uali," "wali" : younger brother or sister
"malumeme" : slow and gentle
"mamañgán" : eating, are eating
"misusulu," "pisusuluan" : eating together or just simply being together at something
"latang pinggan/pingan" : tin plate
"ditac" : little (quantity)
"nasi" : steamed rice
"asan" : dish; entree; viand; fish of any kind
"tuyu" : fish that is salted and dried and with a smell that is offensive to some
"cacapurit", "capurit" : measly; little in quantity
"miabe" : (adj) together; (vi) to be included
"da," "dang" : they
"japis" : gaunt, haggard look
"itsura" : (Sp) (n) appearance; looks; image
"yayat dang catawan" : their thin bodies
"butul-balat" : skinny; very thin
"larauan," "larawan" : picture
"matinding casaquitan" : extreme hardships/difficulties
"apag" : table for the meal
"nanamnaman" : savouring; savoring; tasting
"Sumangid" : in spite of; notwithstanding
"bunga" : fruit
"cacaluluan" : poverty
"ngening bengi" : tonight
"detang adua" : the two of them
"abac ampon gatpanapun" : morning and afternoon
"danup" : hunger
"pilit dang tidturan" : they tried to get rid of by sleeping; to sleep away
"a-labas," "ilabas" : to do and get over with; pass; pass away
"caplas," "maplas": pain; smarting pain; painful because it bites or smarts
"calam na ning atian" : pricking/piercing sensation with an empty stomach
"macatiman" : smiling
"milámnan" : to get filled, as with food
"asimpan" : store; set aside and keep in one place
"máulagá" : precious; essential; significant; priceless
"inda" : (n) mother ; (Q) Ma (when one calls his mother)
"taimic" : silent; quiet; serene; peaceful
"ding imalan" : the clothes
"pipipian na" : she is washing
"que lual" : outside
"cubu" : hut; shack; shanty
"matiaga" : (adj) patient and determined
"mamipi lalam áslag na ning bulan" : washing in the moonlight
"cailangan nang mangabiayan" : she needs to earn/make a living
"ning masaquit nang catawan" : with her sickly body
"mebalung mamipi" : widowed woman who earns a living by washing clothes for other people
"bengi't áldo" : night and day
"matiaga yang mangabiayan" : patiently working
"ban queng panaquitan ditac" : so that with a meager/little earning
"macasali lang pamañgán" : they can buy food
"itang ditac a pamañgán" : the small amount of food
"miabe dang pisusuluan" : they (all) can eat together
"Ining inda ampon anác" : This mother and her children
"ing mapait a larauan" : the bitter picture
"da reng anác mung misáldac" : of your children who stumbled/fell down
"misubsub qñg cacaluluan" : languished in abject poverty
"Másdan mu la, Indung Tibuan" : Behold them, my Motherland
"O' Balen cung Capampañgan" : Oh! Pampanga my Motherland
"Másdan mu lang mamalipit" : Behold them writhing in pain
"mitmung dusa't casaquitan" : full of hardship and suffering
"Angang" : (prep) Until
"cap'lán"/"capilán" : (adv) when
"la mibabatá" : they bear (or endure)
"libung danup at quealan?" : a thousand hunger and deprivation
"de lacaran" : they walk (tread upon)
"ing dalan ning caluncutan" : the road of sadness (sorrow/grief)
"deng anác mung e megaral" : your children who were deprived of their education
"memulat qñg camángmañgan" : brought up in illiteracy (or ignorance)
"pauli ning cacaluluan" : due to abject poverty
"e abilang, Indung Tibuan" : are countless (innumerable), my Motherland
"mepalungi" : were led astray
"memisali caring lamán" : sold their flesh
"memaglaco" : went away
"memanintun pangabiayan" : looked for livelihood
"mig-sacripiciong merayu" : sacrificed themselves far away
"qñg pamiliang pacamalan" : from their beloved families
"pagumásdan" : observe
"ing masaclap a larauan" : the harsh, bitter picture
"sumaclub" : covering; spreading/laying over
"itang biga ning quealan" : the cloud of deprivation
"libung gaga at jinagpis" : a thousand outcry and sigh
"ala na'tang capupusan" : seems unending
"Cabang queng pusu mag-ari" : As long as it reigns in the heart
"ing taco at casaquiman" : the greed and selfishness
"cabang guinu de ing cualta" : as long as money is the master
"deng matacong manunculan" : the greedy government officials
"cabang e ca tatalacad" : as long as you don't make a stand
"wacasán me ing carocan" : to end this evil/wickedness
"Indung Tibuan , manatili" : my Motherland , this will remain
"ing masaclap a larauan" : the harsh, bitter picture
"Panáun na" : It is time
"O' Balen cung Capampañgan" : Oh! Pampanga my Motherland
"Dinatang ne" : It has come (arrived)
"Oras Mung Manalacaran" : Your time to make a stand
"Mibangun ca't durugan me" : Rise up and destroy (crush; subdue)
"ing baluárti ning carocan" : the bulwark of wickedness
"Deng anác mu, iligtas mo" : Your children, save them
"queng pinggan ning cacaluluan!" : from the plate of poverty!
—Posted: 8:51 AM 3/14/10 by eK! | Post Your Comment!



About the author. Jose Roman Reyes Laquian graduated from the University of Santo Tomas College of Architecture, Espana, Manila, Philippines, in 1975. He took and passed the Philippine Architects' Licensure Examination the following year (July, 1976). He had worked and traveled extensively as a Senior Design Architect in various architectural firms in Manila, Philippines, in Malaysia, Singapore, and in the Sultanate of Oman, State of Qatar and Dubai, United Arab Emirates, the Middle East. He hails from Santa Rita and Minalin, Pampanga, where he spent his memorable and happy childhood and adolescent years. He is presently residing in Fremont, Northern California, U.S.A. He is a corporate member of the Philippine Institute of Architects and of the United Architects of the Philippines (U.A.P.) Northern California Chapter and works as a freelance architect. He says that his "deep and pure love" for his Amanung Sisuan inspires him to write "poetry with fiery passion." He is one of the twenty-one living Poet Laureates of Pampanga and is a member of the College of Poet Laureates, Parnasong Capampangan.
eK! is electronic Kabalen (http://eksite.com), a pampanga-based web-exclusive Kapampangan journal of ideas.Websilog - an open collaborative blog on kapampangan life and letters. about pampanga culture, arts, history, society, and politics.
Keni@Ngeni - your daily kapampangan media mashup: breaking news & reviews from pampanga, angeles city, central luzon, the kapampangan region, philippines & the world.
Versilog - new Kapampangan poetry.
Blogganisa - your kapampangan community blog slash guestbook slash bulletin board slash shoutbox slash forum slash post-it-note all rolled up into one meaty joint.
IndioTV - a kapampangan indie web tv.
Tiangge - shop kapampangan. support eK! by shopping from our amazon affiliate store.
Palengke - the kapampangan business and professional registry.
eKalendaryo - kapampangan events calendar.
eK! wiki - all about pampanga, philippines. profile and brief history of pampanga towns and cities: angeles city, clark, city of san fernando
eK! sponsors & partners - with passion and dedication, eK! sponsors, partners & friends support us and we encourage you to support them.