jose roman reyes laquian
PINANARI
Caibat nang memulus uran, yaring banua papaquit ya
Arap aldo, pitung diua macaarcong metung milia:
Caibat ning masican uran, balang dinat palisan na
Quing lualas ning calauacan, quing quetasan, caring banua.

Itas mo ding panimanman, dalise aquit me banua,
Potang calabas ning uran, aquit meng mitmu pagasa,
Saslag ya diuang cundiman, culiauan, mapapas, tayum,
Mairo, aluntiang at malaubi misasanmetung.

Queng quecatang panimanman, maleguan a larauan ya,
Malagad yang magbisita, dapot tune mamie saya;
Daratang yang macatiman at mamie tula quecata
Ing leguan na't macaarcong diuang macaslag quing banua.

Atin pana caring banua, madiua yang cayarian na,
Potang calabas ning uran, maleguan yang acaquit ta,
Metung ya caring pangacung binie na ning Miglalang ta,
A e na Ne payalbugan ining yatung lelangan Na

Calupa na ning gueua Na cang Noe'ng capanaunan,
'Nyang ding tau sinobra la quing carelang carawacan;
Quing dinalan at limang pulung aldo nang miyalbugan
Niting yatu megisan la ding maroc na ning quetauan.

'Nyang quinati na ing danum, Ing DIOS mengamanu quea,
"Noe, tanda niting Tipan Cung gagauan ngeni queca,
Bibili que ing Canacung pinanari caring biga,
Tanda't Tipan ya Canacung dilubyu e na mulit pa."

Ngeni , iquit queng masala ing pinanari quing banua,
E que iquit ing umpisa o maguing peca sepu na,
Dapot iquit cung masala pitung diua atiu quea
caring banua malagu yang larauan a mepintura.

Ing DIOS Tapat Yang mengacu ing yatu manatili ya,
At caring casalanan ta, atiu'ing pamagpatawad Na;
Matula cu quening Mayap a lalang Ning DIOS quecata,
Sana aldo'ldo atiu ya ing pinanari quing banua.

Ing bie, wangis ya't imaje ning malagung pinanari,
Ding pitung diua anti la quing pitung aldong mibili
Queng parmingu, maqui panandam sagrado, luncut, saya,
Simpatia, lugud, dignidad at quealan queng pagasa.

Ding queang malagung diua menibatan caring banua,
Quing paleta Ning Miglalang a pengule queng yatu ta,
Ing pinanari ning banua asmu salang tinipa ya
Queng leguan na mayayaquit Ing Lugud Ning DIOS quecata.

Y Incung cu pintor ya 'nyang queti yatu atiu ya pa,
Que bale mi macasabit ding larauan pininta na;
Ing pinanari malagu ya't itsurang macayama,
Sana sabian nang Incung Qng DIOS a pirman Ne'ing Laguiu Na!

Lumaue ca babo banua, caibat ning uran masican,
Aquit mung asmu casala Ing Upaya Ning Miglalang,
Alang macagaua queang pinanari ating tipan
Nune Ing Mayupayang DIOS IBPANG Tapat Capilan Man!

Queng gloria ning pinanari, Ing DIOS Tapat Yang Miglalang,
Queng pinanari Lugud Na Manatili Capilan Man:
Y JESUS , DIOS ANAC At Menatbus ning meto sicluban,
Ya'ing Marapat Salpantayan ban mica-Bie Alang Angan!

BOCABULARIO (CAPAMPANGAN): VOCABULARY (ENGLISH)
"Pinanari": Rainbow
"diua" ("cule"): color
"cundiman" ("malasulbang," "malutu ," "siga," "bangcuro," "talang,"
"meguintalang"): red
"culiauan" ("malaculiauan,""naranja"): orange
"mapapas" ("papas," "dilo," "marilau," "dilau," "amarillo"): yellow
"tayum" ("malatayum," "meguintayum"): indigo
"mairo" ("irau," "iro," "azul"): blue
"aluntiang" ("mayaluntiang," "verde"): green
"malaubi" ("telaubi," "purpura"): purple
*
Capabaluan: Diquil qñg acamulatan at acaragulan cu qñg barrio mi San Matias (Santa Rita) ampon Santo Rosario (Minalin), dadaque at papasquil co pu ding balu cung diua o cule qñg Amanung Capampañgan. Nung atin co pa pung balung idagdag carening cataya (term) , maragul pung bague iti para magsilbi lang sanggunian pamasan (writing reference) tamu. Daca'la mu naman pu ring catayang cule a inambag nang capatad a Mike Pangilinan a macayabe carening diua o cule ning Bocabulariong Capampañgan que lalam niting sulat. Pisaup-saupan tala pung tipunan at isinup ding sanggunian pamasan anti careni ban macasadia la nanuman oras a cailanganan tala at para mu naman queng capaquinabangnan da ring tutuquing jeneraciun da ring Capampañgan poeta't talasulat, para qñg lalu na pang pamilabung at pamaniulung ning Indung Amanung Capampañgan.

VOCABULARY (ENGLISH) — BOCABULARIO (CAPAMPAñGAN) — CASTILA (ESPANYOL)
color — diua, cule, culul — color
albino, blond, blonde — bulanggo, albino, cule da ring anac aldo — albino, rubio
blue — irau, iro, mairo — azul
light/sky blue — iro banua
brown — comangui, cayumangui, malacayu, culul/cule suclati — pardo, castanio, moreno
bronze — tumbaga, tangso, tansu — bronce
green — aluntiang, mayaluntiang — verde
gold — guintu, lapang — oro
golden — maguintu , malaguintu, talangtalang — dorado
indigo, bluish gray — tayum, meguintayum, malatayum
dark blue — iro dulum
orange — culiauan, malaculiauan, culul/cule dalandan — naranja
pink — lare, malare, malarosa — rosado
purple — malaubi, telaubi, culul/cule ubi — purpura
red — lutu, malutu, sulbang, tungao, bangcuro, bulanggao, talang, malatalang, meguintalang — rojo
crimson red, deep red — cundiman — carmesi
flaming/fiery red — siga
yellow — papas, mapapas, dilo, dilau, marilau, culul/cule ebun, culul/cule ange — amarillo
white — puti, maputi, cule/culul calaru — blanco
black — tuling, matuling, pugut , mapugut — negro

—Posted: 6:31 PM 3/10/10 by eK! | Post Your Comment!



About the author. Jose Roman Reyes Laquian graduated from the University of Santo Tomas College of Architecture, Espana, Manila, Philippines, in 1975. He took and passed the Philippine Architects' Licensure Examination the following year (July, 1976). He had worked and traveled extensively as a Senior Design Architect in various architectural firms in Manila, Philippines, in Malaysia, Singapore, and in the Sultanate of Oman, State of Qatar and Dubai, United Arab Emirates, the Middle East. He hails from Santa Rita and Minalin, Pampanga, where he spent his memorable and happy childhood and adolescent years. He is presently residing in Fremont, Northern California, U.S.A. He is a corporate member of the Philippine Institute of Architects and of the United Architects of the Philippines (U.A.P.) Northern California Chapter and works as a freelance architect. He says that his "deep and pure love" for his Amanung Sisuan inspires him to write "poetry with fiery passion." He is one of the twenty-one living Poet Laureates of Pampanga and is a member of the College of Poet Laureates, Parnasong Capampangan.
eK! is electronic Kabalen (http://eksite.com), a pampanga-based web-exclusive Kapampangan journal of ideas.Websilog - an open collaborative blog on kapampangan life and letters. about pampanga culture, arts, history, society, and politics.
Keni@Ngeni - your daily kapampangan media mashup: breaking news & reviews from pampanga, angeles city, central luzon, the kapampangan region, philippines & the world.
Versilog - new Kapampangan poetry.
Blogganisa - your kapampangan community blog slash guestbook slash bulletin board slash shoutbox slash forum slash post-it-note all rolled up into one meaty joint.
IndioTV - a kapampangan indie web tv.
Tiangge - shop kapampangan. support eK! by shopping from our amazon affiliate store.
Palengke - the kapampangan business and professional registry.
eKalendaryo - kapampangan events calendar.
eK! wiki - all about pampanga, philippines. profile and brief history of pampanga towns and cities: angeles city, clark, city of san fernando
eK! sponsors & partners - with passion and dedication, eK! sponsors, partners & friends support us and we encourage you to support them.