oliver s. carlos
TAGULELE NING TALASULAT
Ing talasulat—damulag yang gugulyut king sarul ning kalalangan.

makatalakad ka ngeni—pakamalang kayanakan—
king gulut kung mitmung late ning kasakitan
babatyawan mu ing serulan, ing bilbal a buligang
napun-nakadwa na masyas at makatayangtang.
makasake ka kaku—kabang panayan ta ing uran
at king mumuna nang tulu, mekibat ku king gulyut
ning lubid a selaksak mu karing kakung arung.
uran wari o angin a magwasiwas karing bulung
ing mekapigil kekata? ban lumakad at ume gambul
king leparan ning asikang manenayang lingapan
ban mie kalam a iyampang king indu tang pakamalan?
ala . . . alang pamikakunung bitbat te ing sarili,
ing sablang kagiwan, ban ing gabun atin yang pupulan.

makatalakad ka ngeni at babatyo
king mipala at marangle mayaluntiang
gugulisak mung mipnung tula't kagalakan:
ing pale bubuktut at sasapo king linang
ila ring ambag mu king gabun mung menan

igulisak mu pin . . . oh! kakung kayanakan
malapit da nang pupulan
ing bunga ning kasakitan

e mu mu sana kakalingwan :
ding bitis mung makatikad
tatalakad da la naman
ding bitis kung makalbug ngeni king linang.

2011, Oran, Algeria
DING MAPANGANGAS A PAMAGDULAP KING KATAWAN
Misasapwak la king pasbul ning kalalangan
ding mapangangas a pamagdulap king katutwan—
nung misan, awsan do reting Kamuritan
ding maka-baroug, mangatulid a sanging
pantas a migtambun king kulkul ning milabasan

Karing mata rang mapanyuri at magbanal-banalan—
(ding pamagdulap a reti, king mumuna rang tagulele,
bingut lang sisipsip gatas king susu ning amanu)—
matula la pa. Awsan do pang Kabanalan—
pablasang keng umpisa, makagyu mu king lalon dala
ring alang-malit nang timan. Pablasang e re pa selatan,
e la pa metibu’t mesalubsub king dila nang mataram

Ding amanu ning kapangangasan, ampat miyagkas nala
sisiksik la reti karing karelang panimanman. Papalto na
ing kalawang—ing aging makakulapul karing bulung panggalal
a makasabit karing karelang malingmingan
at ing Kabanalan—kanita ne maguing Kamuritan.

Ila ing mayupaya, Ila ing makarakal—
nung mayun ka karela, matinu ka’t banal,
nung salangsang na ka man
ituring da kang panganib at kalaban . . .
ipaspas da la king kekang arapan
ding tanikalang panyakal mung batal.

2011, Oran, Algeria
—Posted: 8:43 AM 3/4/11 by eK! | Post Your Comment!



About the author. Oliver Carlos was born and grew up in the town of San Luis, Pampanga. He studied AB Political Science at the University of the East in Manila, but did not manage to finish it, not because of some difficulties, but rather because of his love of his country. He was kicked out of school because he spent most of his time in the streets with other nationalist youths, fighting against the rotten political system. He chose to stay in other people's houses and studied in the hinterlands with the poor farmers. In doing so, he met his future better half and companion in life. Now, he is one of the OFWs, trying his luck in foreign places to make both ends meet and to get his family out of poverty. Amidst all this, he keeps on looking back at his beloved country, especially his province, Pampanga.
eK! is electronic Kabalen (http://eksite.com), a pampanga-based web-exclusive Kapampangan journal of ideas.Websilog - an open collaborative blog on kapampangan life and letters. about pampanga culture, arts, history, society, and politics.
Keni@Ngeni - your daily kapampangan media mashup: breaking news & reviews from pampanga, angeles city, central luzon, the kapampangan region, philippines & the world.
Versilog - new Kapampangan poetry.
Blogganisa - your kapampangan community blog slash guestbook slash bulletin board slash shoutbox slash forum slash post-it-note all rolled up into one meaty joint.
IndioTV - a kapampangan indie web tv.
Tiangge - shop kapampangan. support eK! by shopping from our amazon affiliate store.
Palengke - the kapampangan business and professional registry.
eKalendaryo - kapampangan events calendar.
eK! wiki - all about pampanga, philippines. profile and brief history of pampanga towns and cities: angeles city, clark, city of san fernando
eK! sponsors & partners - with passion and dedication, eK! sponsors, partners & friends support us and we encourage you to support them.