eK! is electronic Kabalen (eksite.com), a web-exclusive Kapampangan journal of ideas

aida tanglao
aida tanglao MAP PA kanu anyang New Society/Bayung Kampi ning panaun ning kapanuldwan kesa ngeni, ngara kano? Daya tamu kanung asu. Taksil ta kanung Kapampangan. Yang angang baligtad. Mumuna ne atang dili pamanyulung kabyayan ing Pilipinas king dane na Aslagan ngeni, o bakit nang malilyari king laman ding babasan Menila? Angang ngeni kasaman dakatamu pa? Pauli nang GMA, Cory, PNoy? Ketang magaral ku UST itang metung abogadu at talaturu a sasabing Ilokanu ya, asme kamwa karing Kapampangan. Sabyan nalang agad detang tau Lubao/Guagua a megtindang danum o pamangan karing death marchers ampo reng dinakap kanu kang Aguinaldo.

Bisa kung mamye pilan butil karetang ali pigmulalan inablas da ketang sinulat nang Pantasan Holy Angel Lungsud Angeles, Vice President Robby Tantingco ketang pangmabilugyatung babasan. Anti nang kawangis mekad patye akwentu namo ning metung inda ing saya na karing keyang anak. Pasunu man o tapat, ding aliwa ali ra akwa o aburi. Anti mu naman neng deng Amerkanu-Kapampangan-Filipino ali dala buring makyalam o manatu karing malilyari king Balen dang Tibwan.

Neng mapali ing pisasabyan at pamisasalangsang ding pari at matas pang bibilug king Santa Iglesia Catolica ampo ring aliwang tau at politicu, ing pamaglakad king pangasantu ning metung a kabalen mipatayid ya king pali ning tatalaken Pilipinas. Dakal a linto ampon mekalkal a bage sukat na sanang ala ngening panaun ning pamimetung yatu. Ikit pasibayu ing sadya rang laman utak ding mapali daya kekatamu. Ding taung manusga dapot kulang, nung ali man mali belwan king kasalesayan ning sarili rang bangsa. Atin pilan, balu rana ing tutu dapot pauli ning mwa ra tatapus da ing mausta ranang belwan. Ya pin ini ing bunga---kapanusgan o prejudice.

Agaganaka ing divide and conquer ding minyakup Indung Pilipinas. Ngening sasamsaman dala ding pilan karing pulu na, masabal at pamisanmetung ing masampat. Ituru ing tutung kwentu at amlat ning Pilipinas. Ilimbag la ring aklat amlat dikil karing Makabebe Scouts. Ikalat ya ing kwentu at sinulat na mismong General Funston anyang belakan at sidya ne ing pamanyakap na kang Aguinaldo. Dakal ne sinulat ing masipag watas at talasulat meging Pamuntuk Akademyang Kapampangan Kragi Garcia kareni. Tau ya Makabebe i Kragi, ali ku agyung isipan nung bakit ring kabalen na ali re saupan milimbag karing aklat na.

Map namu ring Ilokanu Scouts ali dala binang sasabyan kaya? Keni Amerika kumu abasang atin Ilokano Scouts ampong Apache Scouts. Saliksikan malalam ini bang abalu pa nung itang mituru kang Aguinaldo neng Ilokanu ya, kayanib de reta. Makanyan man ini apipisabi mu, anggang ing "Queng leon o queng tigri ecu tatacut, queca pa"--- makanyan ya, e tamu atabili ing divide and conquer ding memanyakup kekatamu. Gagalangan de reng makaintindi ampong makabuklat isip ing Kapampangan. Antimurin gagalangan la ding kapatad tubu Ilokano Regions.

Pauli ning kababan lub ing matas at mangayap depat ding kabalen ila ding magsalita para king layi. Kaylangan pa wari ing pamanatu o pamipaltutu ring aliwa king katenakan ning Kapampangan. Anting tau matenakan tamu ngan. Patas la sukat ding memalayan Pilipinas. Itamu pin, ikatamung anak nang Aring Sinukwan, neng masikan ta kasalpantayanan karing Nunu, katutubu tamu mekad ing pane manayang atu o pamipaltutu karing pamamintu karela. Bage pagkamalyan dang kapaniglon, kayabangnan o kapaningayan ding ali Kapampangan.

Keng Aldo ning Lalawigan atwan taya at pasalamatan ing babye nang sala ning Apung Alaya. Sala ning katutwan pagmulan ning tiwala balang metung. Masayang Aldo Kapampangan!

[About the author. Aida Tanglao is a U.S.-based Kapampangan Filipino American. She has lived and worked in different communities in Pampanga, Manila, and in Nigeria when the Philippines was under a regime of civil rights suppression. She studied in various public and private Philippine institutions, went to graduate school in Pampanga, and further attended local colleges in the U.S. Proudly, she is a mother of five and a grandmother to eight. Her personal and educational backgrounds provide the impetus for her to reach out and help in instilling cultural, moral, and historical consciousness among her people and in advocating correct child rearing approaches. She has embraced into her motherhood and patriotic obligations working for the Filipino's aspirations to spiritual and human liberation and contentment. (Metung miparayung Kapampangan mamasa king pamanapse na king Amanung Siswan makayambag yang ditak mu man king kasulung ning ketawan)]

-Posted: 8:00 AM 12/12/12 | More of this author on eK!
Nextnext