eK! is electronic Kabalen (eksite.com), a web-exclusive Kapampangan journal of ideas

aida tanglao
aida tanglao ALI YA pa binang matwa ing terak a cha-cha-cha, ukulan ku waring keta ya pang magmula ra ring banwang 50 migmula ini Cuba. Ngeni o menibatan ata ketang banwa ring 80 ing salitang cha-cha-cha tatayid de ring anak a mangalati kapupus ning kantang "Masayang Kebaytan" o "Happy Birthday." Nung makananu ya ining migmula ali ku balu, ing asanak ku mu karing lugal pipaningatan anak ya mikalat.

Dakal ne buri sabyan ing cha-cha ngeni mayap lang maglalang palayo't pamamansag ring Filipinu. Ngara ring aliwa cha-cha ya kanu ing manari karing kasulitan da ring bansa. Pilipinas, pati na Misanmetung Bansang Amerika sasambitla dana naman ini. Mesirang kalinangan kanu ing sangkan ning dakal a problema o kasakitan. Wa mabilug yatu na keraklan magagawa ini, Pilipinas mu wari ing dakal matsurang mangapalyari.

Ing pangawala ning buri sanang magin pamuntuk Pilipinas manibatan ketang abasa ku karing malagad mung misusulat at mararamdam karing piyabutan dikil kaya, metung yang pepatune "character change" o "cha-cha" ing makalarin keng anamwan dang mesirang kalinangan, "damaged culture." (Metung yang megin pamagat kasulatan nang James Fallows a maralas dang sasambitlan ding talasulat Pilipinas.)

Jesse Manalastas Robredo, Kapampangan ya kaya ing keyang ima? Kalupa ra ring Punzalan a pilidu ning mumunang kabarung Pekamatas Ukum ning Pilipinas, king balu ku Kapampangan la pipunpunan ding Manalastas. Dapot atin na kung kitnan ukum a makibalu keya, ali ya kanu Kapampangan ing pengari nang babaying Chief Justice Maria Lourdes Sereno agyang Punzalan yan pilidu. Tabalu mu ing pengari nang babaying Secretary Robredo nung Kabalen ya, panayan kunemu ing sabyan ding mangasipag manyasat king Busal ning Pamagaral Kapampangan Holy Angel.

Ali ya mipagkalub Presidenti Pilipinas ing Meangubye Jesse M. Robredo dapot ing keyang pangamate linto ing deig nepa ing metung presidenti. Metung a mayor, dapot uliran ya, apusan de ring dakal a lakwas matas paglugalan. King pangamate na karin la mimasalan ding dakal a mengalingwan king gabun dang tutukluwan. Mengising ini paisip karing mirinan galal at pamikatagun a gawang mayap king karelang katungkulan. Masampat mu ing gawan ke mekad ing kasebyan, nung ala pa, agyang metung ku mu rugung "blogger" o manaptas: "Karing mababa karin ya mayakit ing matas."

Ngana kanu nitang metung a tau, "Nanu wari ing gewa nang Jesse Robredo. Ali ku balu." Mekad mausta pin ing kutang na o ing ali na balu ning mengapalmura tweeter. Kasi ing panugali, pangimut, ampon pangatau o character nang Jesse M. Robredo sukat mung karaniwan karing balang metung kekatamu lakwas na karing mamuntukan pamaala o gubiernu, ali sana sukat ining pagmulalan. Metung a lider, antimo ing pepakit nang Kristu. Mababa lub, mayap a talatuki makirandam karing saingsing ding memalayan.

Nung sira ne pin ing kekatang kalinangan, ali tana balu ing pangatau tamu, melitu tana king kekatang pamangilala sarili o self-identity, sukat tana pin mag-cha-cha. Lupan ing depat na at gawan ing tiru nang Meangubye Jesse Robredo. Ini ing ali bawal a pamangopya.

Pugayan taya at daptan ini king ali pamangalingwan king metung a Jose Rizal lipat ning bayung panaun. Tune yang talatuki nang Yesu Kristu. Pugayan la ring kabalen na Naga, king karelang pamisanmetung king panyulung ning karelang sarili at daratang pang dayi, kayabe la kareni ding ali makiburi at salungat kaya. Tantu tane mu pu sana ining aukul ku pang katutwan o kasebyan: "Ing dapat mayap panbalen pagkaluban nalang mayap pati ring sinalunggat kanini kayabe la ring karelang lipi." Panalangin at pilitan sanang ali na sasalunggatan ing pankabang panaun a makakayap sarili tamu. Cha-cha, "character change," ing pakibat at lutas. Taluntunan taya ing ginulis nang dalan Jesse Robredo.

[About the author. Aida Tanglao is a U.S.-based Kapampangan Filipino American. She has lived and worked in different communities in Pampanga, Manila, and in Nigeria when the Philippines was under a regime of civil rights suppression. She studied in various public and private Philippine institutions, went to graduate school in Pampanga, and further attended local colleges in the U.S. Proudly, she is a mother of five and a grandmother to eight. Her personal and educational backgrounds provide the impetus for her to reach out and help in instilling cultural, moral, and historical consciousness among her people and in advocating correct child rearing approaches. She has embraced into her motherhood and patriotic obligations working for the Filipino's aspirations to spiritual and human liberation and contentment. (Metung miparayung Kapampangan mamasa king pamanapse na king Amanung Siswan makayambag yang ditak mu man king kasulung ning ketawan)]

-Posted: 9:00 AM 9/5/12 | More of this author on eK!
Nextnext