ALDO RA RING PUSU
MASAYANG KAYALDAWAN ding pusu! Ding nanu man uring pusu, masyas, malambut, malati, maragul. Ikit kune ing sarili kung pusu, maragul (mekad uling close up) ya at masigla. Anti yang makina na ning tren a kakalugkug. E patugut, mayap naman at makanyan.
Ali ku piyadyan makanini pala ing inyawad ning manulung marapat kanaku anyang pepuntan na ku aliwang doktor at pipanulwan. Ngening aldo ning pusu ku, aganaka ke ing doktorang ayta. Sukat keng awsan at pasalamatan. Dakal ku abalung kaingatan keya at pamanulaga king kanakung katawan. Ikit ing lugud keya, neng peulagan ne at gelangan ing kanakung pamikatawan.
Kawangis da ring peparagul, ding meningat kekatamu manibatan king bingut tamu, kayabe ra ring talaturung miningat ali mu king pamisip tamu nunge abe na ing pusu tamu, ganakan la sukat reni at atwan Masayang Aldo Ning Lugud, ning Pusu! At dakal salamat.
STATIN
DENG MIRAS na keng twa, ning limang pulu o patye mesipat na ing cholesterol daya, maralas papaynuman danalang Statin a panulu. Ngara mo mayap ini pauling ning pati pamag-ulyan o pamangalingwan king ketwan babawasan na.
Manintun kung taung atyu keng idad areni ing ali miminum Statin o ing ali matsura timbangan cholesterol. Manakit kayang taung ali memamangan mataba manibatan anyang malati la? Metung ya sangkan ini karing balu tamu, uling atin tau o layi kanung binang masanting a mayap a cholesterol, agyang mapamangan lang bawal timbang la pa ring cholesterol. Antimo retang tau metung dake na ning Italya. Tabalu nung ikit dana ing sangkan nung bakit makanyan la ring tau karin, mangasikan la pusu, ali la mitatas marok a cholesterol.
Geography, layi. o nanu. Mayakit ya keni ing kasalesayan, politika, agham, pamanulu, at kabyayan. Mekad deng tau karin masaya lang masaya anya mangasanting la pamikatawan. Ing pusu eya pin dapat sasapakan kasakitan. Dapot neng pane nang pate, kunsumisyun ing akakit karing politiko at artista media, kayabe na ning mangatabang pamangan, sasapak la ring pusu at mipaburen.
Moderation at Balance Diet—makanini ing sinabi kung kayaryan ning pisasabyan ketang misan o mekatapilan na. Patye pisasabyan ing nutritionism, fastfood, o nung matako tamu pin Kapampangan uli mong byasa tamung maglutu. Ding kekaming talaturu kanita ampo ring mangatwa mi makanyan ing karelang sasabyan, e pakakabsi, e sosobra, at miyayalwa at patas kaylangan ning katawan ing kakanan.
Ketang metung a pamagaral at pamanyasat meyakit karing bangke ing tabang asan, at aliwa pang tabang sasabyan dang mayap a cholesterol kekatamu ing atyu karing uyat da. Anya ngeni ngara sukat mu rin susukdan ing kakanan tabang asan, mani, avocado, at aliwa pang malarung pamangan.
WHITNEY HOUSTON
NANU PIN kaya ing kemate nang Whitney Houston? Mipatudtud ya at melumud king keyang pipandilwan? Matsura pamisamut-samut ing inom nang panulu at inuman maki alcohol? Kanita pa ngara pane yang masakit ing mayap magkanta. Kanita menaya kami kaya kening Amphitheatre, king metung nang maragul a concert. Lugal nung nukarin ya linage i Arnel Pineda at ding Journey. Minuran pa dapot ding tau menaya la, kaybat ngara ali malaus. Ali ya miratang o makapagkanta i Whitney Houston. Dininan da kaming plastic a gawan kapoti at minuli na kami. Lipat ning masanting nang swala at dalit makanyan ke pang ali akalingwan lakwas i Whitney. Rest in peace, Whitney.
Pangadi taya pu at ding eganagana.
