eK! is electronic Kabalen (eksite.com), a web-exclusive Kapampangan journal of ideas

aida tanglao
aida tanglao AMATAN YANG agad itang impun tanaman baliti Angeles, digsa ne kanu ning bagyung Pedring. Agad kung aisip, sana ali re pamututan at mitagan lang maragul a dake gawan paganaka o payalala antimong metung a makasalesayan ayalben king balayan Angeles. Arapat da sa reni ding manungkulan. Map ya pung tourist attraction at patune king kekatang pamanulaga king kalikasan at amlat ning balen yan.

Mayayari ne pin ing bulan ning Setyembri, asmo kabilis ing panaun. Kasingbilis ding bagyung daratang. Pasulung kaya ing pulayi o pota paurung. Mayap ing atin balang bulan kapagmasusyan karing bage sukat tamung tatandanan. Kawangis ning kalayan king panyulat, pamanapse, katuliran ding anak, ding tau, ding babayi. Akutang ku pin: O ding ali makasulat, ding ali makagulis, makaukit; ding ali matas mangamanu o byasang mangamanu king salita ra ding matas tau?

Ding babaying mangasamantala, mangapilit karing lakwas masikan katawan, kabilyan ampon/o upaya? Pikakalyan la rene, sangkanan la't usgan angga karing panaun pang daratang? Nukarin ya man ing Kapampangan makatuknan, darala ne ing diwa at kalinangan ning keyang Tibwan. Ali ya apatlud ing pangasuglung na kanini. Dapot neng malambat nang ala king kebayitan lugal, patye pamagsisti mo ring kabalen, lakwas na ding mayna, ali mu ata makasnuk nung e makaalsang pangisnawa karela ini.

Nung dirinan yang anganan ing lalalangan a obra abe ya kanini ing panyulat, e sukat kakalingwan ing alang memetungan taung sisiran. Ing Ginu o i Kristu ali tala asira. Ay, asira tala pala neng ing dapat tamu labag la karela. Lakwas na neng ini pibalak at pigsadyan tamung daptan masalese at ali ta mapilit, mibayaran, mitakutan makananu mang paralan.

Malambat danang apasinan at kanakung dindam dapot ngening tawli penimunan da ing pangasulat na king gintu ri F. Sionel Jose, Leticia Ramos-Shalani, king ding tau Pilipinas mababo la. Agya man, ali ya lubus atangap ini neng pikabalwan nang dakal a pirayit karing mararapat a halalan. Aliwa naman mekad, ngara ing kaburyan da ding dakal ing lulwal.

Deng kapagmasusyan aren arapat da sa ing pake rang mituru at maging tete ning dakal belwan ampon masabal karing tau. Kanita aliwa mu ring maki dakal pera at ditak a pamilya ila ring mikaka penandit mag-lider o pasimunu bansa. Kanita mabawas nala reng awsan trapos at dynasties.

Mabilis ing penandit, nukarin papunta ing pulayi? Pasulong o paurung? Ing milabas metung yang mamye dalan king pulayi ning panyulung kaisipan. Antimo i Leonardo Da Vinci, metung a labis-labis belwan. Metung ya karing memamye lupa karing sasamban o awsan mamilatan neng mangadi o manalangin tamung Kristyanus. Anyang mepili yang gumulis king Last Supper ketang pipanganan ning metung pisamban Dominico king metung lugal Italya, asiwalat ning metung a talasulat at menyaliksik, Roger Masters ining kwentu: Pauli ning pemaligwanan neng mayari nitang prior, a meynip manaya king pangayari ning Tawling Apunan, kabang isipisipan na pa sang Da Vinci nung isanu ing lupa o itsurang igulis na karing akakit nang tau karing dalan ning Milan. Asabi nang Da Vinci a ing keyang kadwang pipilyan ya pin ing itsura ning meynip a prior. At nung ali ya mipabustan manintun pang peka maustang lupa para ka Hudas, ing lupa ning pari ya na ing gamitan na.

O yan pen ing milabas paganaka na kekatamu deng artists ning Europa. Ila ding memye karing larawan ding santos, santas, angeles, pati na'y Udas Iscariote, abe ya naman i Satanas. Di Isabelo delos Santos at Gregorio Aglipay pesuluran dalang imalan Filipino keng pisamban dang Philippine Independent Church deni. Sana ding magsalita o maglalang ali ra naman lalaganasan a ring alagad ning Pisamban makatayid la ngan karing sala o pisasabyan lalto king kekatang pakamalan a Santa Iglesia. Marakal ya asaup king kalinangan at kabyasnan ing Pisamban. Pangadi taya at saupan mitulid at sumaup pang pasikan king sarili na at bangsa tamu ini.

Buri ke sa ing palage ayni nung eya linto anting maglaganas king kegisingan migdala king pamanyalpataya:




[About the author. Aida Tanglao is a U.S.-based Kapampangan Filipino American. She has lived and worked in different communities in Pampanga, Manila, and in Nigeria when the Philippines was under a regime of civil rights suppression. She studied in various public and private Philippine institutions, went to graduate school in Pampanga, and further attended local colleges in the U.S. Proudly, she is a mother of five and a grandmother to eight. Her personal and educational backgrounds provide the impetus for her to reach out and help in instilling cultural, moral, and historical consciousness among her people and in advocating correct child rearing approaches. She has embraced into her motherhood and patriotic obligations working for the Filipino's aspirations to spiritual and human liberation and contentment.]

-Posted: 7:00 PM 10/2/11 | More of this author on eK!
Nextnext