eK! is electronic Kabalen (eksite.com), a web-exclusive Kapampangan journal of ideas

aida tanglao
aida tanglao SADYA MAGI neng boring ngara ing pamiganaka karing aldo ning katimawan ampo ning kebayitan nang Doktor Jose Rizal. Keng bulan ayni, ning Unyu, miragdag ya adwa na pin pulung banwa ing milabas king pangatdas ning Bunduk Pinatubu.

Karakal a matimbang a dapat pisabyan, pibulayan, at dinan pang ulaga karing mengalabas a aldo. Dapot mengatakpan karing salitang mangasakit a balamu alang kepuntan a mayap. Mengayna lub karing abasang salita ra ring taung sukat tatalangan. Anya pin dakal karing malda mimwa.

Maulaga ya ing pisasabyan dapot ding pilan ali la binang miganaka karing kapara ra o kayalwa. Map peganaka nang Arsobispo Socrates Villegas ing lugud, metung karing atlung ulagang turu ning Pisamban Catolicu.

Ketang panaun ning kapanuldwan nang Marcos, masikan mituru at mikalat ing Family Planning. Pamanyabat ngara king labis-labis bilang ding tau. Nasa ning Bayung Lipunan ing ibaba yang 2.2 % ing 4. maygit % a pangarakal ding mibabayit a anak.

Kayagnan nini ilapin ding dakal a mipapalage a bomba films a ausan da. Abe la naman mengausu ding beer gardens at massage parlors Pampanga. Dakal la naman ding babasan marakal a larawan papalto karing katawan da ring babayi ampo lalaki karing palengki.

King panaun ayni king Santa Iglesia Catolica, ing pamuntuk Pampanga ya pin i Arsobispo Oscar V. Cruz. King panaun ayni masikan ya ing jueting. Alang tatakut ata kanita, lantaran ing jueting kanita.

Karing miyasawa, ding baby boomers, pengari ding ekis a dayi ngeni, dakal maygit lang adwa ding anak da. Ding matwa o pengari ding baby boomers, sasabi la patye ding indang anak da kagili la pa o bibilis lang darakal anak. Ding babayi nang daptan da, paybuktut la o nanu. At nung ali la, ding asawa ra nang gawan da nung ali la (misadsad pen)?

Nung pasara o pa-ligate la ding babayi, dapat manyawad lang pamun pa king Arsobispo Cruz, bankanita ali la mikasala. Tabalu nung makanyan mu naman karing pakana IUD. Masikan ya ing pamangalat ning bante pamagbaba karing manganak pauli ning ing Misanmetung Bansa o UN, gewa neng paksa at inabe ne karing pake ning kayaguman panyatu ing family planning.

Malaya tamu pen, lakwas na ding babaye?

Buri keng pibulayan ing sulat nang Jose Rizal karing babayi Malolos. Buri kong ataruk ding sangkan nang Kragi B. Garcia nung bakit ali na buri ing anti yang pagpiyestan ing pangatdas ning Pinatubu. Ngana nitang metung a manalesayan amanu, balang pamagbayu o pamanyulung magmula karing albug. Ing kayang Pinatubu nang pigmulan na kekatamu?

Metung pang maragul a bage ya pin ing pasalamat ku king mabayanyan Kabalen Kragi king sinulat at peganaka nang amlat ning kekatang Katimawan. Ya mu ata kabud ing susulat history king Amanung Kapampangan ngeni. Pauli nang Kragi ing pamanusga karing tau Macabebe mababawas. Ali ku balu nung bakit anggang ngeni ining Kragi ali ya pa mibabansagan Outstanding Kapampangan.

Pagmaragul tamung Kapampangan ing dakal ta nunung sinaup king kalayan ning Bansang Pilipinas. Nasa ing alimbag dane itang gewa nang history book Doktora Evangelina Lacson. Kilalanan tamu sa pu ing ulaga ning amlat ning balang pamilya, tumula tamu king atin pang susulat at babye katutwan bang mimasala ing kekatang amlat karing anak a magaral. Ala nang aliwa pang makasikan king balayan nung aliwa ing abalu tamung makatayid tamu pala uyat karing bayani. Penandaman ini ketang sinulat nang amlat Kragi. King deng kekatang kabalen, nunu, nung ali man kamaganak maragul sinaup king kalayan ning gagalangan a bansa yatu ngeni.

Ing kwentu o kasalesayan buu ya at palto ing keyang kabilugan. Kalupa ning pamamakbung ning bulkan ding kasalesayan malyari lang magamit anting kasangkapan karing pilan a atin pansariling pakinabang. Pauli nini pupugayan tala ding taung sinaklolo at ali pepatugut bang ing balen masagip ya king albug at laar.

Kekami ngeni makarayu akakit ming malino ing matas dang lawe ding aliwang lipi kekatamung Pilipinu. Mikakalugud kami kanung Pilipino, maganaka, mayalala, misasanmetung at mipapagmasakit. Anya ngeni aliwa na ikami mu ding magmasakit karing kabalen, kabayan, ding aliwang layi ila na ing lalaban karing sisira karing Pilipinu. Ing upaya at kalam ning quarry dinan nala sanang kapasnawan ding memalen. Mabandi ya ing Kapampangan, ali ne kaylangan lilimusan, e ne kaylangan pang sugal.


[About the author. Aida Tanglao is a U.S.-based Kapampangan Filipino American. She has lived and worked in different communities in Pampanga, Manila, and in Nigeria when the Philippines was under a regime of civil rights suppression. She studied in various public and private Philippine institutions, went to graduate school in Pampanga, and further attended local colleges in the U.S. Proudly, she is a mother of five and a grandmother to eight. Her personal and educational backgrounds provide the impetus for her to reach out and help in instilling cultural, moral, and historical consciousness among her people and in advocating correct child rearing approaches. She has embraced into her motherhood and patriotic obligations working for the Filipino's aspirations to spiritual and human liberation and contentment.]

-Posted: 10:00 AM 6/17/11 | More of this author on eK!
Nextnext