eK! is electronic Kabalen (eksite.com), a web-exclusive Kapampangan journal of ideas

aida tanglao
aida tanglao KAYAGNAN NE ning EDSA I ing Presidents' Day Amerika. Metung ya nung aliwa man ing pekamakabang kapagmasusyan. Karing aldo areni gaganakan la ding megi nang kalupang pamuntuk Barrack Obama. George Washington, Abraham Lincoln, kayabe ya i William Henry Harrison, at karing bayu pa, i Ronald Reagan. Bulan ning Pebreru ya naman mibayit i Presidenti Noynoy Aquino. Agyang ali la mig-presidenti, ing bayaning Kapampangan Jose Abad Santos, at ing Igpa ning Pun Batas 1935, Senador Claro Mayo Recto king kadwang bulan ning banwa la rin mibayit. Bayu na penalilan Marcos ing dakal makasalesayan gawi Pilipinas, ing atandanan ku Aldo ne ning Pun Batas ing Ka-8 nang Aldo ning Pebreru. Kebaytan neng Recto. Kayap na sang pamanuru nine, neng ababalu re ding memalen, anak at matwa ing Pun Batas at mabyasa la ring lugud lakwas king Balen at makataruk karing batas.

Agpang king metung a salita ning metung tuturu Philosophy television, i Jefferson dakal ya abalu at tikyan kapanwalang kang John Locke. Antimo ing sasabyan dang balang pilan banwa o balang kasyampulung banwa mikaka- rebolusyun ion. Rebolusyun o pamagbayu. Ali mekad pamiabnung maki sandata, nunge pamagbayu king payapang paralan. Ngeni ding pamaala ala nala ngan atang alus ausan dang "council of elders" o "of state" o nanuman ing yaus karene king Amanu tamu. Anya mapapatad o kukulang la pamitayid karing memalayan.

Metu nang sangkan ning pamangaylangan rebolusyun balang pilan pulung banwa ning balang lakaran. Ing kapanwalan nang Locke, balamu ya pin ing mararapat ngeni Kalibutan Aslagan ampo Afrika. Ngara sinabi nana o bilalag ning Santa Mariang Birhen ini king metung nang pamanalto: magi yang maragul gulu ing Afrika. Ala pa yatang mekaganaka kanini. Isip-isipan waring aliwa mu ing danup Ethiopia yang pagmulan nining gulu. Nanu mo ta ing sasabyan dang aliwa ing Iraq yang maragul a kasangkanan.

Nung mabye ya mu ing Ima ning Bayung Kalinangan Kapampangan, Doktora Evangelina H. Lacson, mayap ne ining isalita kekatamu. Pauli ning megi yang talaturung Philosophy karing pamantasan. Agya mang ing buri kung imasala ngeni yapin ing Bayung Kalayan linaban ketang 1986 People Power, dinatang ya kabud ining ausan kung Ima, i Imang Neni o Doktora Lacson king isip ku. Mekad neng ing philosophy ampon politika mitatayid la. Ali ku balu nung ali la mimwa kanaku ding philosophers, neng ngeni ing mayayaus a politika kerakalan ali na ngan maustang pamisip ing tutukyan na.

Malilyari la ding dakal a payapang pamiabnu king yatu, (ngeni at mangga kapilan kaya ing payapa la pin?) lakwas na karening bansang Arabu, aiisip kung tune nang panaun a mako la reni pauli ning mayna nala king ketwan. Ali nala lambat a bie. Dapot, anti mo anyang i Marcos Pilipinas, ukul da yata ala lang kamatayan. O anti mo i Imelda, Ver, at aliwa pa ngara, dakal lang mignasang malili karela. Mekad nyapin ding diktador keraklan ali nala makaisip mamalangkas king lakwan da. Anya ing lakwan da maging sikolung abaka. Makanyan man, anti mo king misasalikut a pamangan patye bina nang melambat makakulub, manubu ing dinat at kurobyus. Pagmulan ning miyayalwang sakit. At ini manawa pa. Kanitang Martial Law, ampon inaus nang Bayung Lipunan tinubu ing kurobyus, menawa karing sanga ning balayan. Dakal karing kurobyus a memanubu kinalat angga Kapampangan.

Metung a malagung milyari mo sa kanita yapin ing lekaran nang Doktora Lacson bangkanita migising ya at sikan ampon mabalu ing kekatang kalinangan. Kanita binyayan neng pasibayu ing babasan ning Akademyang Kapampangan. Ding kayabe nang talasulat ampo ring watas at pantas a mitatagan miyabeyabe lang pasibayu at memye pang apusan at sikanan karing kayanakan. Ing Meangubye Diosdado P. Macapagal metung ya karing megin pamuntuk lagyu ning Akademya. Sinulat ya pa i Tatang Dadong antimo ning pamisulatmap nang tune ning Kapampangan.

Ing babasan "Ing Susi" megamit la karin ding binyayan at binalik nang pamisulatmap at garalita ning Watas Congressman Zoilo Hilario. Misasanmetung nala kanita ding pasimunu, watas, at pantas ning malagu tang panyulat. Kayabe nala ding talatuki ning legwan o arts kayabe ing tigtigan, ding kayanakan karing Angeles University Foundation ampo i Peter de Veyra. At ding magaral at pilan talaturu University of the Philippines at aliwa pang pipagaralan Kapampangan Region, lakwas na ing Tarlac. Ing katenakan at kapinwan ning panugali, gawi, senayan ulaga ning Kapampangan mirinan lang pansin pasibayu sana.

Dapot ing ditak a makapalub ayni king malambat nang pamalakad Marcos, sinaguli ya mu, neng mituki yang meyna pauli ra ding kurobyus a makalub king diktadura. Pilan banwa ing milabas, panaun nang Pangulung Cory ing Pamantasan ning Angeles king malugud nang pamakyabe sasaup Abogado Emmanuel Y. Angeles, misundu ing lakaran nang Imang Neni. Ing lugud at antabe ring kabalen na at talaturu ampon mamuntukan Pamantasan Magalang at mapilan pang kakaluguran magmasabal ning Agtaka, pilan pang memalen at ding pastul ding pisasamban, sinlag ya ing kalinangan tamu.

Ining Doktora Lacson ketang bayu yang miyalal i Among Ed Panlilio, kayabe ring pilan mumuntukan ning AKKAP ali ne ikwang akasabi ining Bayung Gobernador. Mayna ne kanita ing matwa, mayayakit ing pagal na at pamagkasakit king katawan na. Makanyan man malagu ya pa at matimyas. Pilan bulan ing milabas, meko ne at memayapa i Imang Neni. Ing anak ning kayabe nang sasagip king kalinangan melakwan yang Pamuntuk ning bansa. Siyam yang banwang pamuntuk. Ali ku balu nung milapit ya kaya ining Ima ning bayung kalinangan, a kakaluguran ning pengari na.

Ngeni metung yang masasabing Kapampangan ing pamuntuk, nanu kaya ing malyari king lakaran? Ibalik ya at pasiknangan ing elili ra ring banyaga king belwan tamu o ituru ta karela ing bandi nang tune ning belwan tamu? Nanu ya ngeni ing pamangilala ra kekatamung Kapampangan Pilipinas at Yatu? Panaun na bang maramdam ing laman ning tune tang pilubluban. Ini gagawan pane ban ing People Power mabye yang mabye. Ing pusad ning pamanigaral Kapampangan Don Juan Nepomuceno, king Pantasan ning Banal Angel taglus-taglus ing tagumpe kapamilatan ding dakal a aklat lilimbag at aliwa nang gagawan at sasaup karing pipagaralan at magaral Kapampangan.

Digdagan ne ning Pilipinas ing Ambag na king Yatu, ngeni ing EDSA ning bie tamu ali ya mu pamaglako karing manlubus upaya. Inabe ra ding Pilipinu ing pamanyasamas king milabas. Lwid kayu Kabalen! Kayabe kami lipat dayat king Pilak Kapagmasusyan EDSA!


[About the author. Aida Tanglao is a U.S.-based Kapampangan Filipino American. She has lived and worked in different communities in Pampanga, Manila, and in Nigeria when the Philippines was under a regime of civil rights suppression. She studied in various public and private Philippine institutions, went to graduate school in Pampanga, and further attended local colleges in the U.S. Proudly, she is a mother of five and a grandmother to eight. Her personal and educational backgrounds provide the impetus for her to reach out and help in instilling cultural, moral, and historical consciousness among her people and in advocating correct child rearing approaches. She has embraced into her motherhood and patriotic obligations working for the Filipino's aspirations to spiritual and human liberation and contentment.]

-Posted: 8:40 PM 3/4/11 | More of this author on eK!
Nextnext