eK! is electronic Kabalen (eksite.com), a web-exclusive Kapampangan journal of ideas

aida tanglao
aida tanglao DIPAN NING mayap, malyari kung managkas. Makananu pin kaya nung de-kuryenti la ding sandata?

Lon ye ing Maginung Angelo Reyes, sadyang matas king ukbung sandatan ning Pilipinas—aba, galing nang talaga. Atyu na king lalam na ing sikanan kuryenti, ngeni manyawad ya pang dinan lang aliwang uring sikanan karing taung karelang sukat susuywan.

Ah, neng paburen yang tatagal ing salungsungan makalukluk a Presidenti ning Pilipinas bang maging Talagawang Batas kaybat—aba, ila na ding Pekamasikan Masikanan Tau mabilug Yatu.

Ditak nang ditak Absolute Powers na ing karela.

Sayang atin Apung Ginu. Nung ali mekad masikan la pa king Ginu.

Ini pauli ning ding tau, mabibisa la.

Nung yaku i Ginung Reyes, ing sukat anwaran ya pin ing Upaya ning Dios, ing mamye Yang uran. Uran mamasa karing lalangi asang; uran maglinis karing marinat a lakaran; uran mangising karing mengatamad isip; uran migalo la ring mipakat bitis.

Ding tau, ding memalayan, ila ding makaparatang king uran. Mausta la ding Obispos, maus tamu king Ginu bang uran dinan nakatamo.

Kawangis ding nunu tamo, kang Apung Alaya, tatalangan mamaus magpauran. Kawangis ding Katutubung Amerikano, ding Indians: "Bum bum ba, bu bum ba..., muran na pu sana."

Bum bum ba, bum bum ba..., muran na pu sana.

Kasimplian na ne po—bakit manyawad pang emergency powers? Panayan nemung mag-Congresswoman ing Pekamasikanan diling Tau king Yatu.

Pero, pasalamat tana ining Ginung Reyes e menyawad pamaniral Labanan o Gera. E mag-declare War pauli ning kelan o kakulangan kuryenti at danum. Nung de-kuryenti la kanita ding sandata, kakalbit namu karing switches, anti lang sulung misisindyan.

Oneng kaylangan kanita atin Secretary of War. Malyari ku kaya? O ba't mo ing Talapanasbuk na o Pun Ning Babalita nang Mamuntuk Macapagal-Arroyo, American Citizen ya kanu? O't mo yaku, e ku malyaring Secretary of War? Bang e masabing ala kung marine, o delicadeza pala, double o dual face a citizen ku kase? Neng ali ku militar, ali ra asabing purus na lang sundalus ding palakad Pilipinas, anya masampat mu king ing Secretary of War, ali ya sundala. Kapamu, ninu ring milaban pala? Bakit kanita pang malati ku pane namung pamatakut yang gera Pilipinas? Ketang pareo kaming anak pang Gloria Macapagal? Ya, mekad atatandanan na ini. Aiisip na naman ampo ikatamu mekad, king ding apu na kawangis ding kekata, mituturan la naman king mangapalyari ngeni.

Samantala, samasan ing pamangampanya nang President Gloria Macapagal-Arroyo anting Congresswoman ning Republic of Bong/Lilia/Dennis et cetera Pineda... ah, Lubao pala, et cetera. Floridablanca, Sasmuan, Guagua? Ila ring bala kanyan dening kabalen nang mangatenakan ning alleged lord. Kapilan ya pu milako ing "alleged" ayan? Kanita pin pala, simpling Lord na kayu mu ne po? Saguli namu pu mekad datang ing panaun ayta.

Mayap naman ding aliwa inamin ning Supreme Court a mako la pangalukluk nung tatagal la king alalan, pero ing Presidenti e re pepalakwan agyang tatagal yang Congresswoman. Only in Pampanga!

Suwerti yang suwerti—itana mu kanyan ing mabye o kaya itana mu ing mete Pilipinas. Nanu pin kaya? Taksil tamu pin Kapampangan? Daya ta kanung aso?

Ah, busten yo ding marirya. Kapampangan ka! Kapampangan ka! Magmaragul ka?


[About the author. Aida Tanglao is a U.S.-based Kapampangan Filipino American. She has lived and worked in different communities in Pampanga, Manila, and in Nigeria when the Philippines was under a regime of civil rights suppression. She studied in various public and private Philippine institutions, went to graduate school in Pampanga, and further attended local colleges in the U.S. Proudly, she is a mother of five and a grandmother to eight. Her personal and educational backgrounds provide the impetus for her to reach out and help in instilling cultural, moral, and historical consciousness among her people and in advocating correct child rearing approaches. She has embraced into her motherhood and patriotic obligations working for the Filipino's aspirations to spiritual and human liberation and contentment.]

-Posted: 2:49 PM 3/4/10 | More of this author on eK!
Nextnext