eK! is electronic Kabalen (eksite.com), a web-exclusive Kapampangan journal of ideas

aida tanglao
aida tanglao MASANTING ING pakidwan da rening talasulat at mamalita karing pipasyagan Pilipinas. Anting manwala king kapayapan at king ulaga ning balang bye ampo ning saup dang babye king kalayan deng talasulat mamayun ku kening "Petition". Maulaga ya ing press at kalayan king pamipasyag. Ing press freedom yang patune ning kekatang kalayan. Sana makyabe kayu naman at pasyag ing masabal ta king ketawan. [See link].

Ali ke agad binasa ing sinulat nang Professor Ambeth Ocampo, "The Jesuits' Chastity Belt" [See link].

Neng ali ku inisip a dikil ya karing mangarapat Mindanao. Oneng ali ku agyung panwalan a agyu nang mag-pusung nining kabalen a matenakan propesor libutad ning masakit at ali apanwalan kapusakalan gewa ra ding mangasikanan Maguindanao.

Ya na pin pala, dikil ya king makuyad nang delanan kwentu ning kapalalwan ning militar Mindanao ing sinulat na. Makapalwa yang mata, neng kawangis ding anak ku balu re pala ing mayap a taung Cesar Climaco. Deng anak tatandanan da ing malilyari. Kawangis na nitang anak nang Cotto a akalaban nang Manny Pacquiao, e ra kalinguan ing violent dang asaksyan. (Bakit re kaya pepanalben boksing ing anak ning mismu pang makilaban?) Agyang ali ra ikit tutwanan ababalu ra at akakwa ini.

Cesar Climaco, metung matapang at tapat a politiku ketang anak-anak ku. Kayabe re di Jovito Salonga, Ninoy Aquino, Evelio Javier, Diosdado Macapagal at aliwa pang mayap a abe ning Liberal Party. Kanitang panaun nung nu kami makuswelung makiramdam karing salita ra. Pauli ning mitmu lang belwan, kayapan, katutwan a makatas karing kekaming pamisip at pegaralan ding salita ra [See link]

Ali na kalupa ngeni. Ngeni balamu makababa belwan neng pane mababo ing papakit at paramdam ding menasa karing politiku king media. Pane nang pangangas da sintingan balat o lupa, katutubu o melarin karing babayaran. Kanita ding lagu at santing dang salita at tapat a pamanyuyu king balen ila ding pagmaragul da ring talasuyu ning pamaalan. Anya kanita ali la sasabit mangaragul salita bang ibandera ding pepagawang tete o dalan. King dekalan ding arapat da ala nang paglugalan at panaun bang gawang karatula o bandera.

Asambitla nya naman i Ramon (ali Amado palage ku) Bagatsing, Talamlat Ambeth. Metung yang tapat a Katoliku ing meging Mayor at Congressman Bagatsing. Maralas mi yang pakirandaman kanita ketang colegio Sampalok. Abe ring Knights of Rizal ampo ding Curcillistas at aliwa pang pangmemalayan aguman [See link]. Wa, kanita ding politiku sisikat la pauli ning mayap dang pamanyuyu, ali pauli ning sugal at sintingan lage. Agyang ding dakal karela artista la at makudtang watas, antimo di Rogelio dela Rosa, Diosdado Macapagal, Amado Yuzon, Monico Mercado, at aliwa pa. Malaman at tapat, bandi ra ing karelang lelangan salita at poesya. Kabang ngeni pane namong porma, sankang-sangkan o pamagkunwari ing dakal a akakit lakwas na neng malapit ing alalan. Deng pilan pupulutan da karing tatanggapan dang texts nung atin la mang sabyan. Anti'y Kikung Kalikut (munika o puppet yang lalage nitang ventriloquist kanita Pampanga), aliwa ila ing sasabi. King makuyad a salita, kanita makakawani ing pamaglage king tabing o stage king tune pamanyuyu king balen o politika.

Ngeni misadsad na king sandata lang pakamate ding karelang kakalbitan? Makapanagkas la, pemaril dala kanu maselan katawan ding babayi! Mayap pin gawan sangkan yan a mikagera na Mindanao? Sukat siyasiyatan nung ninu reng tuturu at manutus karela. Obat agawa ra ing makanyan. O bina nalang misane makamate? Yamuk na ing panakit da karing tawo? Sabatan nala ngeni bayu la dakal deng maging demonyung tau.

Ing internet sukat yang makasaup king bilis ning pamangalat karing malilyari bayu la dagul at mipakarok lakwas. Ing pamitalamitam karing mangarayung lugal ning Pilipinas (Menila) dagdagan. Ali la sukat mipaburen ding mangarayung lugal king pamitayid karing panyatung media.

Ing press, pamamalita at limbagan ila ding bante at patune ning kalayan tamu. Dinan lang ustisya ding tau, ding mamalita at talasulat karing radyu, TV, at dyariu. Sana gamitan deng masalese ing matas a teknoloya. Kanita masabat ing krimen, antimo ing pamakamate (karin king La Pieta Memorial Park) king meanguabye pisan ku, a meging konseal Angeles at punung barangay king makabang panaun, i Thelmo Lalic.
[About the author. Aida Tanglao is a U.S.-based Kapampangan Filipino American. She has lived and worked in different communities in Pampanga, Manila, and in Nigeria when the Philippines was under a regime of civil rights suppression. She studied in various public and private Philippine institutions, went to graduate school in Pampanga, and further attended local colleges in the U.S. Proudly, she is a mother of five and a grandmother to eight. Her personal and educational backgrounds provide the impetus for her to reach out and help in instilling cultural, moral, and historical consciousness among her people and in advocating correct child rearing approaches. She has embraced into her motherhood and patriotic obligations working for the Filipino's aspirations to spiritual and human liberation and contentment.]

-Posted: 7:59 AM 12/1/09 | More of this author on eK!
Nextnext