eK! is electronic Kabalen (eksite.com), a web-exclusive Kapampangan journal of ideas

aida tanglao
aida tanglao MISAN ABAK ketang panaun ding mumunang banwa ning 2000, ikit keng mamasuk pa ing PASUDECO (Pampanga Sugar Development Company) Sugar Central. Menik ku karetang matas nang balitang nitang pekamaragul a ilera ning lugal pipamyalungan Matas Pipagaralan ning Kapampangan o Pampanga High School Grounds.

Manyaman ing dimdam kung kabag ning salu ku, pauli ning kanitang tawli keng ikit tayimik ya't alang galo o asuk a mararandam, mayayakit. Neng akakit yang mamasuk anti yang misubli bye kaybat ning dakal a banwang makatambun pilan sukad gamat laar.

Abasa ku ngeni king misara ne pala at isip-sipan da nung nang gawan king Makasalesayan Pangabyayan Telakaran ning Kapampangan (Historic Economic and Industrial Institution).

(1) Makasalesayan ya ing PASUDECO. E mu kabud king makatulid nang pamangawang mayumu at nanu pang kayabe nang apapalwal gamit, kasangkapan at pamangan nini, nunge (2) mekasaup yang bina karing bye ding tau Kapampangan at makapadurut Lalawigan kayabe ne ing Menila. (3) Metung yang mekasikan king panyulung pangabyayan ning Pilipinas ing PASUDECO. (4) Mekasaup ya king panyatung kabyasanan lakwas na king pamangabyayan at agham (food industry, economics and sciences including engineering). (5) Dakal lang mekapagaral, mengayari, mitas belwan tau pauli ning PASUDECO.

Dakal pa ing merapat pauli ning PASUDECO. Anya, marayu ku man king lugal ning kanakung kebayitan, bisa ku sang magmunikala nung makananung pakaban at busten mabye ing ulaga at katutwan merapat at ayambag ning maragul a industriang dela ning mataba at mapamungang Gabun Tibwan.

Karing pamilyang makatayid king PASUDECO: Gamitan ya sa pu ini bang lakwas migising, maganaka ing belwan king milabas. Mandatila o e ya sa milalako ing sadya nang lupa nini. Nung gawan yang salamin ing bubungan na, kanaku, balamu ali manayun o likas ini. Makananu yang co-conserve neng asme karagul ing gawan a pamagalwang ini? Mekad nung maralumdaum yang bina kilub, ing dapat gawan, pinturan yang makasala king kapadurutnan. Kanita akit da ring dadalo at magpakabyasa ing kilub ning dake nang Museo nining Pamanang PASUDECO.

Masanting ing apaltutu itang minukala ku kanitang samasan la ding matwa at mayamlat tamung istasyun tren. Ganakan ing karetang libutad ding banwang '90 bisni ku't minikala ini king aptas. Dapot king dane ning pamanyagip kareni abe ing at e buburan angang malyari ing karelang tune masalese kabilyan at lupang makadukit king amlat. Ating salamin bubungan o agyang atap ketang panaun a mitalakad ya kaya ing PASUDECO? Buri kung sabyan, busten yang matuki ing tune conservation---e lalako ing kaladwa ning metung talakaran.

Munikala ku pu, ing panalili king yerung bubungan nunge ali man tune yeru, pauli ning tibe o nanu pang kasangkanan; ita sanang kawangis nang kawangis itsura ning yeru. Ali taya alilan a itsura ing PASUDECO. Ali ya kaylangan gawan lupang modern o high tech neng ali naman ita ing katutwan o likas nang itsura ampon kwentu amlat kasalesayan.

Metung pang maulaga, nung e man pekamaulaga, nung gawan yang mall ali sana pu shopping mall. Bakit e ya gawan lugal pikwanan belwan at kabyasnan? Dakal nala deng shopping malls. Neng deni makatayid lang bina king consumerism a masikan sasaup manakap o makapangalingwan king dakal nang dake ning amlat tamu. Masikan sinaup king pangayalwa ning panaun ing consumerism. Dakal milako kabyayan, kapanintunan pauli ra ding metung mu makibanding pipamalenkyan. Masikan mituran ing belwan ampon pamaningat king kalikasan at pamana ning Indung Tibwan pauli ra ding meging panugali king panaun ding shopping, shopping. Merakal ing sukal at basura at plastikan pauli na ning pamanyolu panakitan ding ditak mung tau. Bakit ali taya gawan manalakad ulaga, belwan kesa king kapanyiran king Tibwan ngeni ing matwang talakaran PASUDECO?

Ali ku salungat karing palengki, pipanganan o pidulungan panyalwan, dapot tandanan tala sukat at tukyan ding sadyang gawi at kaugalyan maningat king Indung Tibwan. Mother Nature at ing kekatang Kalinangan. Ali taya paburen mapapangan pati kekatang belwan. Ngana nitang metung aklat, purus nang consume, consume ing bage tatalakad ala nang makabyasa, ala nang lugal pitipunan ding tau. Lugal nung nula mitalamitam, misabisabi. Lugal piganakan king milabas ban makasaup king bukas. Akakit ta ngeni dakal lang sasakit utak o buntuk. Dakal lang mag-suicide o magbigti. Dakal lang manyamantala. Dakal la ding duwag. Alang lugud sarili at kapara. Wa atin pisamban, dapot king pisamban ali tana balu nung nanu pin ing paramdam ning Ginu kekatamu nung ala tang abe makaramdam kanini. Nung abayan taya ini king pamakiyabutan karing kapara pota karin taya damdaman ing sasabyan ning Dios. Sana ing PASUDECO magi yang makanining lugal. A malyari naman manakitan ba yang misadsad at makatipun pang dakal.

Pangading makasaup ya king pamanyagip ning yatu ing PASUDECO kapamilatan ning pamanyundu nang manuru at magpabyasa karing anak at agyang karing taung atyu na idad. Itang kabyasnan at belwan ali milalako pangatuklu karing bitis tamu king gabun. Kanita asabi tamung: Mete ya, dapot king pangamate na lakwas yang mebye't memye (By dying, PASUDECO will live and give more.) Makasadya ku pung sumaup pa o mambag pang diwa't munikala ning pamanalakad ning binansagan kung "PASUDECO Learning and Teaching Mall."


[About the author. Aida Tanglao is a U.S.-based Kapampangan Filipino American. She has lived and worked in different communities in Pampanga, Manila, and in Nigeria when the Philippines was under a regime of civil rights suppression. She studied in various public and private Philippine institutions, went to graduate school in Pampanga, and further attended local colleges in the U.S. Proudly, she is a mother of five and a grandmother to eight. Her personal and educational backgrounds provide the impetus for her to reach out and help in instilling cultural, moral, and historical consciousness among her people and in advocating correct child rearing approaches. She has embraced into her motherhood and patriotic obligations working for the Filipino's aspirations to spiritual and human liberation and contentment.]

-Posted: 10:44 AM 11/10/09 | More of this author on eK!
WHAT THEY SAY...

Papa Osmubal (Philippines/Macau/China) writes...

Masanting ya ing pamalak a ini. Masanting yang masanting. Keng Tsina deng matuwang bale ampong miyaliwang gusali e ro lalasakan. Gagawan dong anti kanining buri ning talasulat a Aida Tanglao. Dirinan nong upaya ning gubyernu reng talalalang na gamitan dala. Alang bayad, kaybat ing gubyernu dinan nong sapat a sawup deng talalalang bisang gumamit kareng gusaling lawun. Ngeni kelat la keti reng lawun a gusali, bale o kamalig a ating makatuknang a talalalang. Nung nukarin ating lawun a gusali, bale o kamalig mekad keng makalapit ating makatalakad a aguman da reng talalalang. Ing awus da "Warehouse Museum" o kaya "Warehouse Art Houses". Keti Macau atin nong karakal, atin pin metung dati yang materu, pipangatatan deng baka dati anya ngeni ing awus da "Macau Ox Warehouse."

-Posted/Via Email: 2009-11-17 23:35:14 PST



post Publish your comments...
Nextnext