eK! is electronic Kabalen (eksite.com), a web-exclusive Kapampangan journal of ideas

aida tanglao
aida tanglao LIBUTAD NING albug at pangalagpak ning dake nang Apung Alaya ayarapan sana king matinung pamisip at paralan ing eganaganang malilyari. Neng ing Labwad Kapampangan mitmu ya delanan at daralanan pang pamanyubuk. Mabayat dili kareni mekad ilapin ding pamanyakup ding daywan kekatamu. Ing kekatang kabyasnan mituran. Ing Malagung Panyulat o Literatura ngana pin ning metung minyakup. Ing pamiyalu-yalu ra ding dakal kasangkanan, gulut ning pamanalili ning pamanyulat karing titik at anas ing panakit at panamdam mika-pangayalwa.

Lundag ku king panaun a likbangan da ding linakad king pangatimawa anga king magi ya sang Panbangsang Amanu ing kekatang salita. Ing panga-ala na bie Congressman Ukum Don Zoilo Hilario, kaybat i Poeta Laureado Jose Gallardo, at Congressman Ukum Amado Yuzon maragul meging sangkan king pamanudtud ning pamikudta king Amanung Kapampangan. Ing AKKAP, Akademyang Kapampangan a binyayan nang pasibayung Doktora Evangelina Hilario-Lacson pilan banwa pangayala na bie ning pengari na, mekagising pasibayu king Panyulat tamu. Maragul saup pepalto karing watas at talasulat. Kayabe ning AGTAKA, king pamanimunu nang Poeta Laureado Jose Gallardo at aliwa pa. Mapilan kareni pasalamatan tamu, atyu la pa at gagale pang salungsungan.

Dapot migkakasakit pa mu rin ing pamanyulung ning malagu tang panyulat. At kawangis ning sasabyan nang Oscar Balajadia alang makaying bayung megawa. Ding Lakaran Pankalinangan lakwas na king Panyulat, undap-undap ing galo ra. Ding watas ali la makalto, e la miririnan pansin o e la mayayakit. Pauli ning ala pin pane at masigasig a lakaran sasaup karela.

Ing kabud tang Amanu memigsu ya limbug o meyala inawa. Ngening mipapate la ding watas masanting pin ini king metung a dane. Mabye ya, mabye ya ing Kawatasan Kapampangan.

Ing aptas o internet maragul yang mengising at mitipun karing maburi king kawatasan. Lipat ning marakal a mangasakit delanan karing pilan a ali pa akayarap at pilan a tutunggen kakaluguran o anting kapatad, ding panugaling ali kesanayan, makanyan man - miglakwan mayap para king Indung Kapampangan.

Ining kekayung talasuyu tinangap saup ampon sikan lub karing kakaluguran at king Babasan "Ing Susi". Ini patune ya king misaup-saup la ding watas a batikan at ding bayu-bayung magpumilit magaral king malagung panyulat. Matingkad ya kareni ing migmasabal memye sikan lub, ing miparanglan galal kawatasan i Tony Mercado Peña.

Dapot ding tanka at haiku, matwa nala at sadyang aske o nanu man yaus karela. Aisip kumu, nung ding aliwang amanu at bansa atin la kareni, atin tamu naman sukat. Metung ya ining makayagape king Amanung Kapampangan karing dakal amanu yatu. Marakal mekad karing misabit nang tanka at haiku mangaylangan pamanyamasan. Dapot, aliwa neng pisasabyan ini.

Mangaylagan tamu pin bayung aske at malalam pang kawatasan. Ngana pin Michel Montaigne pagmulan ne karing anak ing pamanuru o pamagaral Philosopy. Panaun na ban ing matas dang pamisip ding anak mirinan galang at pamangilala. Kanita e makikitid ing matalas dang panutak at kebayit a katimawan.

Dinan lang pansin ding bayu at anak o atyu na twa, a makasalikut dapot dakal a talinu at kegiwan manlalang aske. Male tamu atin na oneng ali lamu makabulalag kekatang malda at king kekatang panimanman. Pauli ning ali la makayagum o kilala; o kadwa: mekad neng e la kayabe karing babansangan "elite"; katlu: lakwas na nung ala lu karing pipagaralan a miririnan katulid a ulaga karing talalalang.

I Among Berganio, ing sinulat Talabaldugan Kapampangan a Kastilang aklat, ngana, " Ali ko buri ding Kawatasan Kapampangan, ali la poesya, kwentu la." Alus makanyan ya ing sinabi na. Pauna ku na karing ali mipayndatun ini, pasintabi pu. Aliwa pu yaku ing paturan na, ala ku pa pu kanitang panaun ayta. Masutil ta mekad king amanu ning Kastilang Prayle. Ninu la kaya ding binasa nang watas kanita, ngakung kinutang king sarili ku.

Puge king Poeta Laureado Rey Alzadon! Pitungan deng koronang lauder karin Holy Angel ding kakaluguran at kayantabe. Ya ing bayung Ari ning Parnaso! Masampat mu at matulid. Nasa king asundu mu't aragdagan pang bayu ing kekang ambag king Panyulat Kapampangan! Kawangis na ning pemanapse kung mangayap a salitang katutwan kaya, dakal ne asulat ining Maginung Kabalen tubung Arengoreng, Capas, Tarlac, malapit king Lawi. Dapot e la lawi ding kabalen aren. Karing kabaru, masikan at malalam la datang ding gawa nang Poeta Laureada Rosa Yumul Ogsimer! Ing Meangunabiye Imang Neni Lacson, maragul ing kapanwalan kung nasa na ing miras la o dakal la ding atyu na king matas a pamanisip o Philosophy. Pablasang tiru ne ing paksa o pamagaral Existentialism, nung ali ku magkamali, kabang tutulak ne ing pamagtas na ning kekatang Malagung Panyulat.

Ali tala kakalingwan at pabusten mitatakpan ding anak karing pipagaralan manlalang bayung kawatasan. Ampo ing sadyang Pamuntuk ning AKKAP at Punu ning Babasan nini "Ing Susi" Kragi Garcia, ing minunang balu ming memanyulat dakal a poesyang makabayu. Karing anak i Jason Laxamana, at dakal pang ali tamu balu lagyu. Palabungan da ing pamanubu ning kawatasan tamu. Mayap agyang ali la misane ding pilan king malayang pamanapse.

Pasalamatan tamu ing makabuklat dang pamangilala ding dakal a alagad ning panyulat karing bayung paralan at gulis da ring bayung sisibul a watas. Mayap lakwas king ding mibayit a watas at talasulat busten lang timawang mamapse manlalang karing paralan a likas lulwal karela.

Ding talaturu at ding pamantasan, at aliwa pang pipagaraln makanini ing karelang gagawan. Pamanantabe, pamangalang, pamangilala at pamanyikan lub karing anak at karing atyu na idad maki-kegiwan at bisang manapse king Amanung Siswan.

Kekatamung susulat at mamapse o gagale ngeni, ala tang katakutan. Pangalako tamu nung nanu man ing makalto pa babo ning Rio Grande De Pampanga, kilalanan da ing nanu mang dapat tang mayap keti Yatu. Abe na ding e map, makapulut lang aral at mabyasang mangilag ban ing ligaya ding sapni managlus karing pusu at inawa.


[About the author. Aida Tanglao is a U.S.-based Kapampangan Filipino American. She has lived and worked in different communities in Pampanga, Manila, and in Nigeria when the Philippines was under a regime of civil rights suppression. She studied in various public and private Philippine institutions, went to graduate school in Pampanga, and further attended local colleges in the U.S. Proudly, she is a mother of five and a grandmother to eight. Her personal and educational backgrounds provide the impetus for her to reach out and help in instilling cultural, moral, and historical consciousness among her people and in advocating correct child rearing approaches. She has embraced into her motherhood and patriotic obligations working for the Filipino's aspirations to spiritual and human liberation and contentment.]

-Posted: 10:22 AM 10/11/09 | More of this author on eK!
Nextnext