eK! is electronic Kabalen (eksite.com), a web-exclusive Kapampangan journal of ideas

aida tanglao
aida tanglao NANU YA ing tune National Artist? Bakit makalungkut at dening taung gagalangan sa ngeni balamu bababa la at kesa tingkad la't kinang panga-talalalang legwan, dadalumdum at mitatakpan la ding mayap dang atangka at ayaring ambag king kekatamung kalinangan? Mipanaus lang elitista at nanu pa. King bage atin pin, tutu, dakal kekatamu ing elitista. Pati ding ali na makayabe karing elite megi na ring elitista, maralas ita. Kapamu na malilitu na ku yata karing katayang elitista at KAPANUSGA? Makananu wari pin ing maging bage National Artist? Itang ding gawa mu paturu at palage dala karing eskwela. Itang mikutkut ka kanu patye mete na ka king Libingan ding Bayani, itang tanggap kang dakal a salapi, at miririnan kang dake pera kabang mabye ka ampo ing kekang kayabe?

I Imelda Marcos ali ku balu nung kitkut na ne ing katawan nang Ferdinand nang kayabe. Buri na king Libingan ding Bayani ya milibing, kabang deng memalayan ali la mamayun. Mausta kayang pamanisip o logical nung sabyan tamung kawangis de ri Cecil Guidoti-Alvarez (a kanakung tatalangan sa) at Carlo Caparas i Imeldang anting pipilit manaus bayani kang Presidenti Marcos?

I Pitoy Moreno a miyabe karing palagwan na sang National Artists Gloria a ali kanu dinalan king paralan delarayan ning batas, e makaying bubulad. Ing pamanayi pin kaya at papalakad karing makatuki king buring timbang katawan at anting gatas linatnat balat a babayi't lalaki karing miyaliwang lugal Yatu, malyaring matanggap maragul a ambag king legwan at ketawan? Ali tanala abilang-bilang ding kilalang mangulis imalan Pilipinas, karakal da. Dapot ing maging National Artist masakit, anting lulub king busbus karayom. Abasa ke king facebook ining kwentu. Ketang misan pamikatagun akayabe nala di Doktor Virgilio Almario, Bienvenido Lumbera, at aliwa pang mangatenakan talasulat Pilipinas. Abalu na kanita king ing maki-bansag Rio Alma pala Kapampangan ya kang Tatang na. Tubu yang San Miguel de Mayumo. Kaybat nang memoesyang National Artist Doktor Lumbera ya kanu ing magkwentu ing tinuking memasa. Asabi na kanu bayu ya migmula: "Nanu na waring mayap kung gewa king bie ku bang magi kung karapatdapat mamasa katuki ning metung a National Artist?"

Sana balabalaus ing metung yang iyas ning kekatang kalinangan ing National Artists Awards. Maralas talang ababasa ding puge karing pilan talasulat ding pilidung makapamulagat. Ayalben ke ing bie ning metung a kalupa nang Pitoy, kilalang manabas imalan:


Atin Lagyu O Ala

O kayapan dang gumules
Alitista ning tabeng
Kwentu nang Coco Chanel
Mabanglu reng pepaket!


Ngeni pin mipayntagun
Labing walu ning Agosto
Kabaytan na palang Coco
Balamu ding Magsaysay Quezon
I Chanel women's liberation


Yang agaganaka pakiwangis
Ing manaying imalan at sastri
Lakwas na ing depat nang mipiblas
Mitimawa mipante karing babayi
I Coco Chanel yang mibalangkas, menabas.


Tangke ne ning legwan ing pami-imalan
Nung mitangka yang bayung belwan
Mitalakad ulaga king ketawan
National Artists Awardees anti lang bayani
Ding tau ilang mamili gagawa babye puri.


Kayabe la naman ding malukang mangatenakan
Kawangis ding mituru karing kababan lub
Legwan da ring turu dang map ding nunu
Karing maluka bulsa dapot mabandi pusu
Karela ko reni abalu ali karing masyas lagyu.


I Coco Chanel ulila ya't maluka
Melatyan de't semantala detang iro daya
Dapot ing malambut at basyu nang bulsa
Pesiknangan ning matatag nang telakaran
At ning talino na king pamanlalang legwan.


Ding tune at tapat alagad ning kalinangan
Ila detang ali mamiling lagyu at aguman
Alang kule o kabilyan kabyayan kasalpantayanan
Anti'y Rio Alma, Manansala, di Zoilo Hilario
Jose Gallardong minambag bayung aske bage ra -



[About the author. Aida Tanglao is a U.S.-based Kapampangan Filipino American. She has lived and worked in different communities in Pampanga, Manila, and in Nigeria when the Philippines was under a regime of civil rights suppression. She studied in various public and private Philippine institutions, went to graduate school in Pampanga, and further attended local colleges in the U.S. Proudly, she is a mother of five and a grandmother to eight. Her personal and educational backgrounds provide the impetus for her to reach out and help in instilling cultural, moral, and historical consciousness among her people and in advocating correct child rearing approaches. She has embraced into her motherhood and patriotic obligations working for the Filipino's aspirations to spiritual and human liberation and contentment.]

-Posted: 10:22 AM 9/2/09 | More of this author on eK!
Nextnext