eK! is electronic Kabalen (eksite.com), a web-exclusive Kapampangan journal of ideas

aida tanglao
aida tanglao NINUNG MAYAYAUS ari ning dalan Pilipinas ketang minunang panaun? Deng damulag ilang pekamumunang ginamit dang maglakbe ding tau kanita. Gugulyut lang garetang dakal sake tau ampon gamit. Makupad la lakad dapot masikan la, dakal at mabayat ing agyu rang gulyutan at sake. Anya keng pamaglakbe at pamanalis gamit at panyalwan ilang maralas dang gagamitan kanitang e pa melalang at miras Pilipinas ing makina. Ala ku pang ikit kwentu o amlat king pamanggamit elepanti o nanu ya man ing yawus kanini king Amanu tamu.

King pamisaglulu o mabilis a lakaran deng kabayu ilang gagamitan da kanita. Ding bangka at bapor gamitan la naman karing nunu tamu, neng ing Kapampangan lugal ne ning Maragul a Ilug ampo ning makaba at masalusung Sapang Balen. Maragul ya papil a legen ing Kapampangan pauli ning keyang kabilyan. Makabebe ya dayat at makalibutad ya lugal. Anya megi yang pusad ning dakal a kapalyaryan makasalesayan ali mu king Pilipinas nunge king mabilug yatu. Europa, Amerika, lakwas na Aslagan.

Antimo king ulaga ning Pilipinas karing pekamasikan a bangsa yatu, ing Kapampangan metung yang maulagang lugal ning kapuluan. Dapot ing makasalesayan at marakal nang arapat at genap king Amlat ning yatu ampo ning keyang dakal a likas a bandi, minuli bandang tawli king matas a pamanulaga king meyaus Ari ning Dalan, King of the Road.

Balamu ing kabyayan at biye memye binang dakal a pamanulaga karing papapulaying saken. Ding drivers, ila ding mengaring ari ning dalan. Munta ya aliwang bangsa ing tau bang makatipun panyaling jeep. Kabalik na pin, driver ne't operator. Ding atinan dakal la sasalwan saken, at agyang malapit mu sake la pa kesa lumakad namu. Ding ali makwalta makanyan mu naman. Agyang malambat pauli ning traffic ing pulayi ding saken, lakwas dang buri ing sasake kesa keng mabilis a pamanlakad.

Bakit la sasake jeep at ali nala lalakad? Kasi alus ala nang sidewalk a pilakaran at ali la sapak alikabuk kanu at asuk. Agyang ding makibale karing malapit dalan ala nalang lugal arap da pauli ning bina nalang mengalapad ding dalan. Nung atin man megawa lang paradaan saken.

Dakal la ding mengapalaris at maybug nang mangapalaris pauli nini. Bakit ding papapulaying saken ila ring megawang ari? Bakit ding taung makatuknang malapit dalan at ding anak mangalati at magaral, taung lalakad dalan ilang lalako ra lugal at daralanan?

Kanita ing makupad lumakad a damulag yang King of the Road, patye kaylangan yang magbawas agyang libutad ning dalan, ding tau ala lang akarapat. Sukat la ngan tuknang ding king gulut na, alang sabisabi alang break o signal, tuknang ya.

Keng makabayung panaun ning teknoloya ding akakit ata karing games buri ra marapat mu naman karing dalan, lalako nala ding likas a biye. Magi nemung computer game ing Telabastagan at MacArthur Highway, Luzon. Pabilisan ngan kulang namu ali sulapawan, saglulu, bakbakan?

Ning meging ari at reyna ning dalan ngeni? Ning sukat mag-Ari at Reyna ning Balayan, retang maninggat, mag-masabal o retang makatakut a mipitna-pitna karing tau at Kapuluaan? Ing taung tutu yang sukat maging ari o reyna aliwa ring makina, pera o nanu man.


[About the author. Aida Tanglao is a U.S.-based Kapampangan Filipino American. She has lived and worked in different communities in Pampanga, Manila, and in Nigeria when the Philippines was under a regime of civil rights suppression. She studied in various public and private Philippine institutions, went to graduate school in Pampanga, and further attended local colleges in the U.S. Proudly, she is a mother of five and a grandmother to eight. Her personal and educational backgrounds provide the impetus for her to reach out and help in instilling cultural, moral, and historical consciousness among her people and in advocating correct child rearing approaches. She has embraced into her motherhood and patriotic obligations working for the Filipino's aspirations to spiritual and human liberation and contentment.]

-Posted: 11:01 AM 8/1/09 | More of this author on eK!
Nextnext