eK! is electronic Kabalen (eksite.com), a web-exclusive Kapampangan journal of ideas

DALAN DALAN la kanung mamamate tau Pilipinas a magobra aliwang bangsa balang aldo. Karin naman mabye dakal lang misasakitan bina. Mangasamantala. Mangapanasakit. Mangakulung. At aliwa pang ali makatau o makaayup a dapat. Agyang nukarin maliliyari ini dapot karing kabalen tamu binang marakal at maralas. Ing mismung Pangulung Gloria ali ya pin sa OFW, agyang ngeni alus balang pilan aldo ning dumingu mamako ya mumunta aliwang bangsa Yatu. Ya, makatakut ya naman kabilyan. Karen mung misusulat kaya nung atin mung lugal masakit pa at malalam kesa impiernus karin de anting darala o makanita babage kararasnan ding babalita at sansangkan ababasa aptas.

Atin pamiyalwa ing kabilyan da ring mengaparas aliwang lugal king kerasnan nang Gloria Macapagal-Arroyo? Masaya ya kaya? Ngana pin ning Kayabe na i Attorney Mike Arroyo, sadya nalang mabandi o makwalta ali nala manako nung iyalili taya man kang Pangulung Joseph Estrada kanita anting Pamuntuk ning Pilipinas. Dapot ikit tana ing bayung kasalesayan merapat king panaun da, agyang ala pang misara o meyaring pisasabyan, ing pataram nang Domoclis atyu ya pa karing buntuk dang miyasawa. Sukat da mung linisan ing eganagana, milako ne ing pamitamit manabung sundang.

Ding memalayan Pilipinu, ing pataram nang Damocles panamdaman demu naman neng ining katatakutan dang Gloria, ali ra balu nung nuya pa angga kalalam karasnan king pangalukluk na. (Read: Rina, HIV +, OFW) Nang pangayalwa ning biye ring OFW at ning Pangulu? Ing Pangulu, ali na buring sabyan a mangulu ya, o ya o ila ding pamuntuk ing mangulu king biye ring tau. Kalupa ring mangapilit mag-OFW. Sukat yang manyamasan at magpatinu king Bangsa. Nung kalagan nala ding buknul a ali napa kasing sakit ning Buknul Gordian, masagip ya. E ra kalupa ding dakal karing OFW ing Pangulu atiyu kaya ing anggang paralan bang maligaya yang mako Malacaniang.

Ya mu ing makasagip king sarili na i Gloria karing sasabyan dang salang sukat nang bayaran pangalako na Malacanian. Aliwa ding Congresswo/men, pota pin ila pa ding mikakana king kamunuy ding aliwa kaya. Anti mu rin Kapampangan king kerakal na ning abling Balas bakit ali agawa ing gewa nang Mayor Binay? (Read: 'Little General' for President) Ning mangulu Kapampangan? Bakit kaylangan la pang mamamunta aliwang bangsa ring inda, tata, atsi, ampon coya? Ning mikwalta king balas, ning migpasasa, mika-bilyun pera ibat minang balas? Ninu man deni ila kaya ing sasabyan a karayang anting maglako pangatau karing kalupa rang Kapampangan? Sadya ding dayung manyakup ila ring mag-dehumanize karing katutubu, ngeni karaya nala ding darapat kanine?

Sana i Gloria, lakwas ya pang mabanglung lunto king amlat ning Pilipinas kesa king Kaluguran at Gagalangan tang Cory Aquino. Malyari ini nung pilinan ne i Tita Cory kesa king Dictador Marcos. Makapamili ya i Gloria, ding OFW makanyan mu naman nung pilinan ing timmawang lakad ning utak, panamdam, at dapat. Katungkulan ning metung Pamuntuk ing dinan lang kapanatagan lub ding tau. Makalunus la ding anak purus nang mangarinat at makatakut ing kapadurutnan . Makalibutad ing terorismu. Sukat da sang isipan ing maragul nang asisira ding X-rated a video karing anak a tutubu pa mu pamisip.

(Makasaup yang mintindi kanini ing aklat a "Pedagogy of the Oppressed" nang Paulo Freire. Ing Professora Ruth Mabanglo, kilalang watas at talasulat aklat a karing miyayalwang amanu misumangid ning aklat, atin yang masanting a sinulat dakal a kawatasan king biye ring babaying OFW. Dagdag ye itang aklat a "The Dictators")