eK! is electronic Kabalen (eksite.com), a web-exclusive Kapampangan journal of ideas

aida tanglao
aida tanglao MINTA YA Pilipinas i Anthony Bourdain ning Travel Channel

Kayari ning palage pepasibaywan den tambing. King kadwang ukdu ning palage, makiramdam nakumu. Migugunam ku king peramdam nang kapigaganakan ning pepalage, i Anthony. Ining taung ayni neng atiyu travel channel, 75 a babayaran cable, pane keng darandaman. Balamu mangadi ya swala ngaku king anak kung maburi karing palage na.

Linawe ke ing bilungan na aptas o blog. Memasa ku karing sulat o comments ding menalbe keraklan Filipinu ibatan. Dikil ngan king tula dang minta ya Pilipinas i Anthony, alang pinansin ketang bage atiyu king isip at panamdam nang Anthony dikil karing tau at king Bangsang Pilipinas! Kabang yaku antin nakung dinuyan at bildug king tudturan mumukul king kutang at kapagmulalan a ali na aintindyan Anthony, pauli ning masikan yang kitang nang pilan ukdu ini.

Ulit-ulitan kung sasabing dili ku, magparasakaling pakibatan naku ning anak ku o agpangan na ing sasabyan ku. "Hospitality, hospitable la ding Filipinu. Ita ing akalimbatawan nang salitang Anthony," ngaku. Dapot aliwa mu ita, balu ku metagkil ya pusu't panamdam ining taung ayni ketang pamakipanayam na kang Augustu. Malalam yang taruk ining kilalang talasulat at mapaglayag ayni, anya pin pala ing swala na anti ya mong mangadi patye magsalita ya TV. Lon ya ing talambiye na king keyang blog, dakal ya delanan. Anya mekad balamu makatuklu yang bina gabun, balu ne salat ing Tibwan.

Ing pamamunta karing miyayalwang lugal, e mapupus at lakwas e magnasa mu karing larawan a buring idake karing likwan a kaluguran. Nung ini ya ing nasa ning pamamasyal karing aliwang lugal at kalinangan, mangga mu king angin ing lambat ning kuswelu ampon abalung belwan ning pasyal. Ngana ning anak ku, ali neman dikil mu king pamangan ing palage nining tau (Anthony Bourdain). Ali na ne kinaba pa ing buri nang sabyan kanaku. Neng kayi itamung Inda, anggang atiyu nala twa ding anak ta subuksubukan tala pa at e tamu pa balu ing belwan da't laman diwa.

Ah! Malalam ya ing kwentu ning Pamangan. Maragul yang dake ning kekatang pamana ing Pamaglutu. I Claude Tayag, a binang meniwasa king paras ning pengan da Aling Lusing ampo ketang Kambingan, agyu na pang asinggit ing paglugalan na ampon Panyatung Lugal ning Pamangan Kapampangan at ning Kapuluan Pilipinas. (Buri kung sabyan karing ali pa makibalu a ating aklat o Cookbook linwal banwang metung, Indonesian at Philippine Cooking. Vilma Laus ya lagyu itang author a Filipina king aklat ayni.) Masanting ya pati ding recipes o kalutung gawa nang Ms. Laus. Apansin a pegaralan nang mataluse ing lelangan nang kalutu a migmula karing sadya tang gawi.

Ridiculously nice, dumb kind people la kanu ding Filipinu, anya ing masampat nang bili Mabilug Yatu ning kekatang Kalinangan king Pamaglutu ali taya darasan. Makanini ing ikwa kung abilug nang sangkan Anthony. Nang kayang ikit na? Colonial mentality? Naivety? Bahala na? Alang akarapat karing magpakasasang manyamantala? Balu nang king gulut da ding ganaka ampon saya karing lupa ra ding tau, atin makapanpan a lungkut, takut, at kapigaganakan a kasasaya ra ding atiyu king sikanan?

E pa masaya king gewa na at ikit Pilipinas i Anthony. Makanyan ya pin ing Kapuluan tamu, anti mo king laman ning "Sarimanok Travels" maka-overwhelm yang bina. Makanyan kerakalan ing panamdam da ding purmeru pang minta king Tibwan tang Bansa. Karing mekapanalbe na "Sarimanok Travels" ikit da ing kabandyan nang ini ning Amlat Filipinu. Aganaka ya ing palage ayni neng ing sariling pamangilala, self-identity yang peka-sangkan ning Pamunta nang Anthony at Augusto Pilipinas.

Migaganaka ya at mimisip king kabilyan ning anak ning diaspora i Anthony, king bayu nang kakuyud Augusto lagyu. Aku e ku anak, dapot ing panamdam nang Augustu, apapatune kung lakwas neng atyu ku king Balen kung Tibwan. Ngeni sinag-sinagan ku naman ing magi rang panamdam ding kanakung sapni, lakwas na deng mibayit na keni Amerika.

Atin yang pamisuglung ini king zarzuela o hip hopera "when the purple settles". Manakit keni king kwentu ning metung pungul atiyu atyan ning inda a mimisip nung sukat yang mibayit. Apigunam kening palage ing kekatang biye king diaspora. Sukat tang mika-guilt feeling king kekatang pamaglako Pilipinas? Akit pa keni ing biye ta kanitang Panaun ning Diktadura: (http://pinoyarts.blogspot.com)

King pamanalbe kening dake ayni ning Travel Channel nang Anthony Bourdain pinwalan ku nung bakit ing metung karing anak ku pekiwanan neng atalakad ing Pan Asian Pacific American Studies king College of William and Mary. Tutu pin makasaup makakilala king sarili ing pamagaral king sarili tamu. Makasaup king sariling kapayapan at pamisanmetung tamu Amerika at mabilug Yatu. Ining bayung pamagaral ayni makatuglung ya king Kalalangan Pamagsalita,Teatru, Tigtigan, Terak. Telakad ne ning metung a Bayit Kapampangan, Associate Professor Francis Tanglao-Aguas. Antin pengari ning sinulat at kabalen agkatan dakayung manalbe king palage, king pipagaralan nang George Washington, Thomas Jefferson.

Ngeni Bulan da ding Maglalang Legwan ampon Katutuan dinan tamu sanang penandit ing pamamye Ulaga karing kekatang magmasabal king Ketawan. Alben tala ding palage, basan tala ding obra ra. Bangkanita akilala ta ing sarili, ing ibatan, at miras tamu king maustang pupuntalan.

Munikala ku king Pun Lalawigan, karing Pun Balen at karing Eskwela king payalbe la sa ding Obrang Kabalen a pagaralan da't tuturu keni Amerika alimbawa, agya mang ken king Tibwan ala lang barkada. Misumangid lang salamin deng palage. Karing atin diasporic lives ikit de king marayu ing Tibwan dang biye, karing ali meko, deng palage ra ding dinayung ating balikid ila ding salamin mamye aninag.

Ngening Pebrerung Bulan ning Legwan mayakit sa ing ulaga ra ding gawang pankalinangan king Pamagbayu ning Politika at Lipunan.


[About the author. Aida Tanglao is a U.S.-based Kapampangan Filipino American. She has lived and worked in different communities in Pampanga, Manila, and in Nigeria when the Philippines was under a regime of civil rights suppression. She studied in various public and private Philippine institutions, went to graduate school in Pampanga, and further attended local colleges in the U.S. Proudly, she is a mother of five and a grandmother to eight. Her personal and educational backgrounds provide the impetus for her to reach out and help in instilling cultural, moral, and historical consciousness among her people and in advocating correct child rearing approaches. She has embraced into her motherhood and patriotic obligations working for the Filipino's aspirations to spiritual and human liberation and contentment.]

-Posted: 8:13 AM 2/25/09 | More of this author on eK!
Nextnext