eK! is electronic Kabalen (eksite.com), a web-exclusive Kapampangan journal of ideas

aida tanglao
aida tanglao METUNG YANG amanung matni pa karing balugbug ku. Babawal nakong babawal. Maralas keng dindam yan karing matwang kapatad at karing selagpyan pangatwa ku. Manyumpal asbuk. Ikwa yan at pekyapusan karing memanyakop? E mu sasabyan yan! Papa pu ka? Oy, siklod, manyiklod ka! Mayap yan? Nang bubunga na niyan karing anak a malating salukuyan tutubu utak? Ali mu takut o panga-bating ning kapanwalan king sarili ra o pamikakunu karin karelang kimut at iyapse salita, nunge ngara pin king Inglis, memess-up me pa ing panyulung at pamanubu ning utak da.

Panupaya dapot agyang nukarin ya pa mipaugse ing kabalen, tau ya pa rin kalupa dake ne ning ketawan. Ali sa lalto kapusukan neng iyapse yang tapat ing pilubluban. Makasawa na ing pamanakap karing katutwan, ding kalaraman ampon pamag-kunwakunwari. Magulu ya ing yatu pauli da reng makanyan a panugali.

Ngeni ko ayntidyan ding mangatwa. Ketang anak ku babawal ke i Ima kung makyalam o magsalita karing taung magkamali. Ngening akung metwa, aisip ku, nung e ku pa gawan ngeni kapilan pa. Makuyad ya ing biye. Para kanaku deng ali makyalam king kasaplala da ding tau lakwas ding anak, maymut la o sarili ra ing isipan da.

Metung tamu mu biye, mibyebye ta pang anting mete? Pabusten la ding magkamale? Pabusten la ding misasakitan pauli ning kapalalwan. Nukarin ya kanita ing lugud?

Maralas neng ing yatu o ing malati nang dake ken king kekatamu miparoro yang bina ing kayang pamaala, gaganakan ko retang anak a tiru ku karing eskwela. Nukarin la ngeni, nang daraptan da? Bakit mipakanyan ya ing Balen? Gaganakan kula naman detang mestra't mestrung kayabe ku. Nanu ing kakulangan karing gewa?

Nanu ing pamagkulang na ning Pibalebale, ning Pisamban, ning Eskwela?

Ing sakup a isip mayayalimbawa ya karing babaying mangatampalasan dapot e bubulad, e lalaban, nunge mibabata at paparsala pa king sarili ra. Misan misasabi la ring adwang babayi, pisasabyan de ing metung artistang anak labandera. Ining artista simbung ne ing asawa nang mamugbug kaya. Ngara dening adwang misasabi obat ali nya mu kanu mibata, reklareklamu yapa. Bakit e nya mu kanu pasalamat mabibiye yang makwalta ngeni pauli na ning asawa na.

Ing Indung Tibwan sukat neng mikabus king makanyan a kabilyan. Lon la ding magmasabal areni: Kinuldas ya nandin 1:30 ning gatpanapun Berkeley itang katataulian karing mitagan a apat a migbante karing tanaman magatwa king Pamantasan ning Berkeley. Sinampa nala king taluktuk nitang Redwood a asmu katas, neng mirarasan nala karing pulis a papakuldas karela. 21 a bulan nalang magbante at menuknangan karin. Maigit lang 40 pun ding ilako bang mika lugal ing patalakad dang pipagsadyan karing mamyalung panligligan. Mikaalaga yang maygit 160 milyun ing talakad dang training center. Ketang Banwang 1911 tenam dala ding magaral kanita a kaybat miparala at linaban king Mumunang Pamiabnung Panyatu, WWI dening pun areni ngara. Mamanangis la ding kayabe ring tree sitters at ding magmalasakit king Gabun Tibwan, dapot itang matas a Redwood tree a karelang tutukluan ayta masakit ne at sukat neng ilako. Mirinan lang ditak kapasnawan ding mekabalu kanini. Ing adwang banwa rang pibatan magbante karing pun ding lulugud king Gabun Tibwan mikabunga– apikasunduan king ding pilan tau ampon tumpukan miyabe la king Pamantasan at lipunan ning Berkeley. Mirinan lang swala karing pamalak ning balayan.


[About the author. Aida Tanglao is a U.S.-based Kapampangan Filipino-American. She has lived and worked in different communities in Pampanga, Manila, and in Nigeria when the Philippines was under a regime of civil rights suppression. She studied in public and private Philippine institutions (Lourdes Elementary School, Holy Angel University, University of Sto. Tomas), went to graduate school at Angeles University Foundation, and attended local colleges in the U.S. She currently does "action research," and catches up on what she missed in the meagerly filled libraries in Pampanga, particularly at the Pampanga High School (formerly Jose Abad Santos High School) where she taught for more than a decade. A mother to five children at 27 years old, she is now a grandmother to eight. Her personal and educational backgrounds provide the impetus for her to reach out and help in instilling cultural, moral, and historical consciousness among her people and in advocating correct child rearing approaches. She has embraced into her motherhood and patriotic obligations working for the Filipino's aspirations to spiritual and human liberation and contentment.]

-Posted: 8:43 AM 9/12/08 | More of this author on eK!
WHAT THEY SAY...

Papa Osmubal (of Macao) writes...

Kalupa ra reng aliwa nang susulat Atsing Aida, ngeni keng metung a inapse nang ini misan pa tiran ne, tinud ya pang masikan, angga man kareng uyat ampong pekasuluk da reng butul kinablas ing kaplas ning siwala na. Kalupa ra reng susulat keng Amanung Siswan keng aptas a ini (kalupa ra mo ri Ma'am Ces ampong ing kabalen a Marcial, ampong deng aliwa pa), i Atsing Aida patse susulat ya ing siwala ibat ya keng pusu na anya naman reng amanu na e la sasala. Alang sakit lub ing siwala ra reng talasulat a reni a tinunggen ku lagyu a tutung tatalangan ku, nung e atin masalang katutwan. Puge pu kekayu ken, makaslag ya sanang pane ing kekong panlalawe keng katutwan! Salamat.

-Posted/Via Email: Sat, 13 Sep 2008 01:07:47 -0700



post Publish your comments...
Nextnext