eK! is electronic Kabalen (eksite.com), a web-exclusive Kapampangan journal of ideas

aida tanglao
aida tanglao ING PANGAMATE nang Jesus pauli ning kasalanan tamu yang masampat a panaun bang pagmasusyan ing lugud. Lugud king sarili, lugud karing kapara. Ngara bayu mu aluguran ding kapara, luguran me pa ing kekang sarili. (Kanini, luluguran mune ing Dios) Dapot kanaku at karing dakal, lakwas na karing Katoliko, nung tukyan ing tiru ra, e map ing lulugud pamu king sarili. Pane sakripisyu, kapibabatan ing tuturu ra kekami. Mumuli nang pamagkaymut king katuliran ning balang metung. Makanyan mu mekad ing depat da ding manyamantala, ding manyakup. Ngening mitimawa nala ding mengasakup, agyang makupad mu, ding tau ditak-ditak ababalu dana ing mausta. Lakwas na ngening dakal nala ding pamagaral at pamagmasid karing panugali at pamiyutus ding tau.

Ing pamanyalpantaya kang Kristu masikan kinalat karing taung pemalagwan dang alang belwan, taung mangabagsik a alang kilalanan pamaalan. Dapot agyang asmo karakal ding Kristianus dakal la ding e maka-Dios a mengarapat. Mayayakit ini king amlat na ning yatu. Pauli na ning kasalpantayanan milabanlaban la ding tau. Mika Hitler kaybat na pa ning WWI.

Makapagmulala i Hitler apatuki nala ding milyun a tau. Bakit migtagumpe la ding pasista. Ngening panaun ning Kadwang Libu, pauli ning mengapalyari Iraq, king Abu Ghraib, king Guantanamo, ing batikan king pamagaral ning diwa at kaladwa Doktor Philip Zimbargo king Pamantasan Stanford kanita, apatunayan ne ing inaus nang Lucifer Effect.

Maligwa yang manyambut at salake king isip at diwa ning tau ing ali map patye ing kasalpantayanan king Dios atyu mu king salita at isip. Nung kana ta king dapat balang penandit ing turu at pepakit nang ugaling Kristu, e ya man milapit kekatamu ing demonyu. Nung balang metung tau mabibye ya kalupa nang Kristu ala neng paglugalan i Lucifer keti yatu.

Ding obispos at pari ampong madre, ila ding panenayan da ding taung tumayid at mamye sikanan karing tau ngening manyawad nalang pamagbayu. Ing buri damdaman, ding mawang tata at inda o pamunu ya pin ing mirinan lang sikanan- lugud king sarili mi at kapara. Ali parusa at penitensiya ing masampat tangapan karing ukulan banal a disipulus nang Kristu. Ding barug at pamanyangkan pa karing kalulu na bulsa, gagaluguk atyan; kalulu king lugud at kaladwa, lalapit karing pari bangkanita antimong meging sundalus na, kapamilatan ning Sacramentu na ning Binyag, apanmituan ya ing turu nang mibyebye tamu ngan anting tau.

Ing pamadaskul, pamamarug karing tau, makayna. Milalako la lugud king sarili ra. Patye ing tau kulang yang lugud ampong pamangilala king sarili na, makananu ne pang aluguran ing keyang kapara?

Lipas na ing paralan pamamye guilty conscience karing taung e naman tune kriminal. Masampat ing pasiknangan la ding mayap dang pangatau at kegiwan ding talasalpantaya. Ala tana king panaun ning pamanyakup, panaun na sukat ngeni ning katimawan. Ini yang bitasang lalakaran da ring memalayan.

Ngana king aklat nitang paring talasulat, "Kilalanan at luguran ing sarili bangkanita mika-sikanan tang lugud king kapara." Mitimawa at sumulung ya ing metung a taung atin pamanulaga king keyang sarili o self-esteem. Makasaup ining maragul king pamanuknang ning genocide at pamanako. Ngara, "God did not mess up. He created enough for our Needs, not for our Greed."

Masanting balita ngeni king dakal nala ding tutuki at mabibye kalupa ning turu nang Kristu. Ali la mangan nung ding aliwa e la makapangan. Tipunan da pamu ing pamangan anga potang ustu na para karing eganagana. Mekad masakit gawan ini ngeni, dapot ali la wari makanyan di Jesus kanita at ding Apostoles na? Patas-patas, pantepante ing biye.

Mekad e masanting a balita king ding aliwa kanu ngara: "Lakwan ke ing Pisamban, bangkanita tukyan ke i Kristu." E na kalupa kanita ali rana gagawan milagru o misteryu ing turu nang Kristu, makatuklu na king Gabun ing dapat da anya ataruk daneng masalese ing Amanu ning Dios. Balamu tutu ya ini neng ding tawling bilangan da ding Katoliko at aliwa pang Protestanti mengababa la. Mayakit ini karing linwal bilang o statistics king tawli pa mung dumingu.

Gaganakan ku la din babaying makanini pepakit a gawa di Chiara Lubich, mitatag king FOCOLARE, Dorothy Stang, Martyr king Brazil a tiga Ohio, Mother Theresa ning Calcutta a balu tamung menga-disporma bitis pauli ning maralas yang misulud sapatos e map a sukad. Liwasan nala kareni ding pakakalulu, neng kukulang la ding daratang a ambag a sapatos karela; i Sister Christine Tan ning Pilipinas.

Ngening kasalungsungan libasan de pamu karing dapat pampari bang kanita arapat nala ring katungkulan na anting sundalus ning binyag at metung discipulu ning Holy Orders i Among Ed Panlilio. Pane reng agkatan magsalita karing myayalwang lugal at aguman, pauli ning ding amanu na anti lang panulu at vitamins a kaylangan at panenayan da ding tau. Ining Jun Lozada makanyan mu naman anya buri re ding tau, ali mu katutwan ing anwaran, panutak at malaman a salita, mayap a balita ing panenayan da ring memalayan.

Para kanaku makanyan apilasa ing Lugud. Makanyan yang atabi i Lucifer. Ngening atbusan na katamu ning Ginu sana kayabe nang Gloria, ampo i Pamuntuk George W. Bush; ding Bin Laden, deng mangulu karing tau Kenya, Sudan, at aliwa pang lugal, alang-alang king kekatang pangatau, baligtad tane ing Yatu, ibalik ya king sadya nang maustang kabilyan.

E la dakal din taung maburi king politika, dapot neng maragul ne arapat a ali masanting ini king yatu sukat neng linisan at sagipan. Anting melalang a maki kaladwa at pamibyebye panlipunan ding pamiyutus da agyang din mung adwang tau, alimbawa, politika na. Dake ne ning kekatang biye ing politika, ali ya apaburen ini. Politics cannot save itself; we protest for personal and social transformation, ngara pa. Mayakit a larawan kareni king sulatk king blogspot.

Nanu nanu na ing lagyung meyaus king sukat gagalangan a katungkulan karing pilan a bangsa. King bayung panaun ing Axis of Evil nang Pamuntuk Bush balamu yang migmula. Ketang misan ing Pamuntuk Chavez ning Venezuela pigsisti niya naman at inaus babaung asupri ing ibatan nang pipagsalitan king UN i Presidenti Bush. Dakal na la ding mararamdam king tagumpe ning e map anya miparas na ing manaus king Hari ning Dulum. Makapanaun abalu ing gewa nang pamanigaral Doktor Zimbardo a inumpisan na keta pang 1971:
"Please join me in a journey that the poet Milton might describe as making 'darkness visible.' Although it is often hard to read about evil up close and personal, we must understand its causes in order to contain and transform it through wise decisions and innovative communal actions. Indeed, in my view, there is no more urgent task that faces us today." (Philip Zimbardo/Professor Emeritus, Stanford University)
Aba, minayun! 6:28 Gatpanapun, 20 ning Marsu, 2008, California, United States of America.


[About the author. Aida Tanglao is a U.S.-based Kapampangan Filipino American. She has lived and worked in different communities in Pampanga, Manila, and in Nigeria when the Philippines was under a regime of civil rights suppression. She studied in public and private Philippine institutions (Lourdes Elementary School, Holy Angel University, University of Sto. Tomas), went to graduate school at Angeles University Foundation, and attended local colleges in the U.S. She currently does "action research," and catches up on what she missed in the meagerly filled libraries in Pampanga, particularly at the Pampanga High School (formerly Jose Abad Santos High School) where she taught for more than a decade. At age 27, she became a single mother to five children; she is now a grandmother to eight. Her personal and educational backgrounds provide the impetus for her to reach out and help in instilling cultural, moral, and historical consciousness among her people and in advocating correct child rearing approaches. She has embraced into her motherhood and patriotic obligations working for the Filipino's aspirations to spiritual and human liberation and contentment.]

-Posted: 3:01 PM 3/21/08 | More of this author on eK!
Nextnext