eK! is electronic Kabalen (eksite.com), a web-exclusive Kapampangan journal of ideas

aida tanglao
aida tanglao ALDO DA ding pusu. Makananu yang pagmasusyan ini? Makananung susulat dikil king lugud, king pusu? Cardiologist ka dapat o pari? Doktor king katawan, doktor ning kaladwa. Ala ku kareni king pamilya, pero ngana ning metung karela, ali ya migdoktor katawan, obat ngeni megi yang doktor kaladwa. Pero ala kung anak a pari. Kanita ining pangane lalaki bala nitang metung nang apu mag-pari ya. Mayilig ya kasing mamisik danum king bale at maka-cape gulut. Nanu ne kasi ing cape keng Amanu tamo? O agya sigurung atyu kami pa ken Pampanga ali kune balu ini neng Tatagalug la at Iinglis ding tau ken.

Ala nala ding matwang mapangapampangan. Ala nala naman ata ding ortelanung mangasanting at manayun mangapampangan. Nanupata, ding matwa kanita buri ra atin lang maging anak, pangunakan o apung pari. Anya agyang basan neng danum ing lande kikinang floorwax o kandila ning anak papabusten de neng mamyalung yang pari-paring mamindisyun, mamisik danum. Pangaragul na ali ya man migpari. Ing bunsu ketang malati ya kitnan ke nung bisa ya, pilan ukdu kitnanan ke. Lawen naku mu o balikdan saka ya tumiman. Dapot misan king pisamban kabang sisimba kami, akutnan keng pasibayu pekibat na, "Ay, o kasi sasabi kung sasabe, sasabi lang sasabi deng pari," ngana. "Mapagal ing pari." Menakit ya ring pakibat a agyu nang yapse kang Indu na.

Ing ali ku kitnan karela, map ya pa aisip na ata ing lungub seminaryu neng megi neng idol o telangan ne itang maganaka nang paring talaturu king Don Bosco, Bacolor. Agyan aku tindanan ke itang sinabi nitang paring ayta keya "deng taung mapaglaram neng pane nalang maglaram milako nala panamdam, mepata nala, ali rana apikawani ing tutu king ali." Ninu kaya ing manulu kareng makanyan pin tau ne? Ding doktor o ding pari? Makananu yang babalik ing panamdam. Ngara ing kapanamdaman manibatan pusu. Makananu yang paganan ing pusung pata? Ngening Valentine's Day nanu ing magawa? Panulo o pangadi ing kaylangan ding pusu?

Nanu ya ing pusu, isanung pusu ing buri kung tamakan wari? Ing pusu anting diwa, anting kaladwa, o anting kosensiya? Ding pun sagin atin lang pusu, bayu ya ini sulput anting pusu atyu ya pa kakilubkiluban ning katawan ning pun. Keni ya mayakwa ing metung nang kabaldugan ning pusu. Ing kalalamlalaman ning katawan, ing kakilubkiluban ning tau. Itang malating suluk ning kekatang pangataung e malyaring tagkilan o akit, dapot makaramdam at makapayabut panamdam antimo ing lugud. King pusu ning pun sagin karin lang lunto at manibatan ding bunga. King tau kasi king pusung ayni karin la naman manibatan ding supling o sapni na. Anya pala ngara ing santol e mamungang manga?

Makanyan man ding pusu sukat lang sesesen, ikatamu ngan kayabe ta king pamanese king pusu ning metung at metung, aliwa mu ding pari o doktor. Ngening Aldo ding Pusu, lawen taya ing tibuk ning pusu ning Balayan, ing keyang kabilyan. Miyabeyabe ta ngan, tau tamu ngan dake ning lipunan. Sagipan taya ampon pakasesen ing Pusu ning Balayan bangkanita mabye yang mabye at maligaya. Masayang Aldo ning Panamdam kekayu ngan!


[About the author. Aida Tanglao is a U.S.-based Kapampangan Filipino American. She has lived and worked in different communities in Pampanga, Manila, and in Nigeria when the Philippines was under a regime of civil rights suppression. She studied in public and private Philippine institutions (Lourdes Elementary School, Holy Angel University, University of Sto. Tomas), went to graduate school at Angeles University Foundation, and attended local colleges in the U.S. She currently does "action research," and catches up on what she missed in the meagerly filled libraries in Pampanga, particularly at the Pampanga High School (formerly Jose Abad Santos High School) where she taught for more than a decade. At age 27, she became a single mother to five children; she is now a grandmother to eight. Her personal and educational backgrounds provide the impetus for her to reach out and help in instilling cultural, moral, and historical consciousness among her people and in advocating correct child rearing approaches. She has embraced into her motherhood and patriotic obligations working for the Filipino's aspirations to spiritual and human liberation and contentment.]

-Posted: 9:18 AM 2/14/08 | More of this author on eK!
Nextnext