eK! is electronic Kabalen (eksite.com), a web-exclusive Kapampangan journal of ideas

aida tanglao
aida tanglao PAMANUSGANG PAUNA - prejudice; Pamangabiran- discrimination; Pamanaus Lagyu - labeling; Pamangawun - stereotyping; pilan lang aske o dake at pamipaltutu karing isms. Antimo ding racism, sexism, ageism. Sangkan la at bunga ning ali pamipantepante king yatu. Guli la dening e maustang dapat areni, impediments o obstacles, agpang king talabaldugan nang Paring Diego Berganio. Mamunga la at magdalang guliguli (anxiety) king biye ding darapat ampon karing daraptanan da o paturan. Ketang magaral kami ing balu mi mung isms ila ding Catholicism, Protestantism, Buddhism, Hinduism, Zoroasterism.

Ngening dakal na panyulung at pamagaral merapat karing pamiyadwangan at pamiyutus-utus ding tau merakal la at meyakit ding isms a kayabe ra ding asabi ku na keni. Pauli da reni ding aliwa makarapat lang dakal a ali mayap. Pauli da reni ding tau makalabag la karing batas. Deng bage areni makasukul la king sarili ding magdala. Pauli da reni dakal la ding malungkut, dakal la ding e timawa. Pangilagan tala reni, tandanan ku nalamu ding pekalagum ning kayapan—lugud king kapara, pamipantepante ning balang tau.

Pilan nang aldo kebayitan nanang Doktor Martin Luther King, Jr. Pauli na ampon ding kayabe na, metung ne pala i Harry Belafonte kereni, migising at ginawa lang batas a babawal karening dapat a ali mausta, misulat ya ing Civil Rights Act. Ing pamakyabe ding religiosu pati na ding madre Katoliku kanita linipat king Tete Selma, Atlanta at Alabama, agyang makasabat la ding dakal a pulis. Dakal a mengamate pauli ning racism, pauli ning sama, hatred karing taung maki-kule balat. Mika ausan dang "lynching" karing African Americans lakwas na. Ikatamung Filipinu dinanas mu naman makanini. Balu tana ing milyari Stockton kanita at aliwa pang lugal.

Ikatamung Kapampangan dinanas tang makanyan karing aliwang lugal. Ngara ding aliwa ninu mo ing mituru kekatamu king racism nung aliwa ding minyakup kekatamu. Neng balu tana ngeni ita pangilagan tana. Nung ali, mitali tana man king victim syndrome. Menila kalian dakaming Kapampangan a alang H. Metung pa mayayaus tamung dayang asu. Ngeni mekad mababawas na ita, neng ding Kapampangan asmunala karakal king Menila. Mabilug Bangsang Pilipinas at Yatu dakal lang makikilala kayapan a Kapampangan. Lon ya ing babasan a Philippine Daily Inquirer, ketang aldo ala lang kapikakunwan sumulat matsura karing Kapampangan ding aliwa nang talasulat, ngeni o yan ing Punu na ning Kapampangan, ya ing Filipino of the Year, nung ali ya man mepili i Kagalang-galang Gobernador Among Ed Panlilio o kaya ding keganaganang Kapampangan anting Filipinos of the Year, ing kakadwa, Kapampangan ya pa mu rin, ing mibayit a Puno, Pekamatas Ukum Reynato Puno!

Makasaya ing malilyari. Bunga na nini ning panyulung ning kabyasanan at pamipagaral. Bunga ning pamisanmetung tamu, anya malakwan nala ding e map a isms aren. Ding Kapampangan e nala mipanaus tagalista, ding Tagalug e nala manaus dayang asu. Ala tamung pabusten manasakit, sagipan la ngan ding Amanu king balang Lugal. Mayap oras kekayu Kapampangan, king pamamunu ning Pun Lalawigan Among Eddie T. Panlilio! Pagmaragul at pagmayabang dakayu pu kabalen.


[About the author. Aida Tanglao is a U.S.-based Kapampangan Filipino American. She has lived and worked in different communities in Pampanga, Manila, and in Nigeria when the Philippines was under a regime of civil rights suppression. She studied in public and private Philippine institutions (Lourdes Elementary School, Holy Angel University, University of Sto. Tomas), went to graduate school at Angeles University Foundation, and attended local colleges in the U.S. She currently does "action research," and catches up on what she missed in the meagerly filled libraries in Pampanga, particularly at the Pampanga High School (formerly Jose Abad Santos High School) where she taught for more than a decade. At age 27, she became a single mother to five children; she is now a grandmother to eight. Her personal and educational backgrounds provide the impetus for her to reach out and help in instilling cultural, moral, and historical consciousness among her people and in advocating correct child rearing approaches. She has embraced into her motherhood and patriotic obligations working for the Filipino's aspirations to spiritual and human liberation and contentment.]

-Posted: 4:15 AM 1/15/08 | More of this author on eK!
WHAT THEY SAY...

Oscar Balajadia (of Macau) writes...

Kasanting na, Atsing Aida, nining sinulat mo. Karakal na dake a nung nukarin meyakit ing kayapan ampong kabiyasnan ning metung a talaisip.

Metung a bage nining sinulat mu a tutung masikan linub dinagus kareng uyat ku ampong ginulisak keng pusu ku ampong utak, itang dake dikil kareng amanu.

Bilang metung a megaral keng pamagaral-amanu (linguistics), asasabi kung alang marok ampong mayap a amanu. Atiyu keng panugali ra ampong dapat deng tawu anya balamu reng amanu marok la o mayap la. Tatayid tala reng amanu kareng tawu—anya nung marok la reng tawu, reng amanu ra marok la; nung mayap la reng tawu, reng amanu ra mayap la. Ing tune pamagaral-amanu (linguistics) e na lalawan ita.

Bilang atin ditak pegaralan keng pamagaral-amanu (linguistics), dapot e ku biyasang-biyasa, paniwalan dakang pante-pante la mu reng amanu. Balang metung a amanu matuturing lang kayamanan ning metung a bansa.

Salamat kanining sinulat mu. Sana abasa re reng marakal tamu pang kabalen.

-Posted/Via Email: Mon, 14 Jan 2008 18:42:56 -0800



The author Aida Tanglao (of USA) replies...

Salamat mu naman king pamanatu mu Papa Osmubal. Pauli na pin ning lalto pamangawun (boxing o stereotyping) karing tau kapamilatan ding amanu o salita ra anya ikwa keng asulat ining sanese. Marok ing stereotyping, dakal kekatamu atyu ya ini. Dening isms ali dala solu ding metung o pilan a layi. Ing ketwan at kapanaligan king Kayapan daragdag lang saup karing pamagaral o pamamasa bang makapibalak tamu at sumulung belwan at makiyutus mayap karing eganagana. Kanita ding kayanakan a tatalanga kekatamu makapulut lang mayap at gumalang kekatamu. E la masayang a talinu, kegiwan, at pamaglalang. Obat ali ta subukan labanan nung nanu man isms o biases a amana tamu kaninu man nunge e katamu mitimawa at lakwas saya at mabyasa.

Atin tamu ngan karapatan makyalam king Balen Tibwan nukarin tamu man suluk ning Yatu miparas. Panmetung Yatu ing malilyari. Mayingat tamu mu pin neng makarayu tana, neng masiri la lawe kekata ding kapatad a aliwa karin. Ataruk ku ing bili ra at panamdam neng manatu la ding mirayu na katawan king Tibwan a Lugal. Dapot agyang king Biblia mayayakit a metung tamu ngan Ibatan. Makanyan man ali ko sisisian at ikatamu man mig-diaspora ali raka tamu sisisian. E ku meko bang tumakas, meko ku bang magligtas. Itamu pu , salamat. Kapayapan.

-Posted/Via Email: Tue, 15 Jan 2008 17:09:35 -0800



post Publish your comments...
Nextnext