eK! is electronic Kabalen (eksite.com), a web-exclusive Kapampangan journal of ideas

aida tanglao
aida tanglao ING BELWAN magdalang lugud a mamye sikanan. Adwa na kaming pulung banwa atyu kening Bayu ming Lugal. Maragul kung pasalamatan keni ing pangatimawa ming dakal a dakal. Misan kitnan daku FIlipinas nung makananu na kami ding anak ku, Filipinu kame, Kapampangan, o Amerikanu? Pekibat ku: parepareo. Kingwa mila ding mangasanting karing atlu.

Ing tune Amerika malagu ya, matimyas, manene, mayingat. Pipilinan nalang masalese ding amanung papalwal na. Matenakan yang manulid salita. Atin yang metung salita. Daratang ya keng oras a pisabyan. E maglaram, tutukyan nala ngan ding tuntunan at batas, atin makabante o ala, pareo mu kaya. Makanyan nang papalto ing pamipantepante nang lawe karing tau, nanu mang kule balat. Kalupa ning matinung tau Filipinas Kapampangan, e manisa, e pabayat. E maindredus o manusgang pauna. Mamasa ya. Magpakabiasa makananu ya man katwa. Ing karaniwan tau Amerika maki-belwan e nakami ausan Orientals, pauli ning ila e mila ausan Occidentals. Ali tamu Oriental Rugs o Carpet, ali tamu naman Kapampangan-Filipino-Americans. Kapampangan Filipino Americans tamu, makanyan tamung maustang mayaus lagyu at misulat. Kalupa na ning ding Aeta, Aeta la; ding African Americans makanyan la mu lagyu. Makanyan tamung mayayaus, ikatang people of color o taung maki-kule. Aba, anya pala exciting tamu, pauli ning atin tang kule? Ali map o maustang sabyan ini, nung sabyan mu o paramdam karing alang kule? Aba, kasakit na ning maging-politically correct! Ali maligwa ing magpakabiasa, o magpakapinu, dapot kabang mabye tamu sukat tang magpakabiasa. Ding African malyari lang mipanaus Negru o Matuling, dapot nung ali raka kabalat ali mo ayaus makanyan. Kalupa namu nini ing ding Kapampangan ayaus dang mayabang ing sarili ra, dapot ding e Kapampangan, mangatumbuk la patye maramdam lang sumabing makanyan karing Kapampangan a mayabang!

Metung a Bangsang maragul a keyalwa king sadya at migtagumpe mekapangilag karing balakid a katutubu ya pin ing Netherlands, o The Land Under. King pamagobra ku Africa kanita pilan ukdu linabas at minta kami karin. Agya mang kanitang minunang panaun mililigligan la keng panga-pirata ra o pamanulisan ding bansa Europa, ngeni ing Netherlands a kayabe ra metung yang uliran king pamang-galang katimawan ning balang lelangan. Metung ya karing malagung lugal a ali akalingwan. Ketang buri nang mimalino ning Filipinas ding mapilan pakibat karing pisasabyan katuliran pantau mipansinan ya ing lugal a sadyang makilagyung Holland.
Gabun Lalam Danum

[13 ning Septiembri, 2007]

Kaybat king Maralumdum
The Hague a malagu e kalingwan
Dimla ampon Spaghetting Dalan.
Dayat Pangulung mibagulbagulan
Ukuman mung makasalesayan
Anne Frank ken menuknangan.
Gatas bakang malinamnam
Kakewan mung aluntyan
Sandirit mung pikabalwan.
Kanita mikabus king pamanulisan
Minuli king malayang kaisipan
Uliran da ngeni ding batikan.


Ikit ku pa at abasa ing kelan pamanulaga karing lalang da ding artista ding barus a mamutut pelikula pauli na ning politika. Anya yampang kune karing kabalen ining mikelangan kung yabut king Pun Talapanuntun Rosendo Makabali. Neng akakit ko reng lalalangan da't pikukudta ding kayanakan tang kabalen abala ku ing pamangaylangan at ulaga ning sulat Kapampangan. Anya agyang dakal na ing akalingwan kung salita king Amanung Siswan susulung ke pa ing sulatk.blogspot.com kung pamanampang king ketawan.
[29 ning Disiembri, 2007]

Ing Banwang mamun na dakal ya apalto mayap a bunga karing Kapampangan...

Mumuna na ing masabal da ding memalayan king pamagbalik ning kaustuan king pamaalan.

Ding marakal dang dapat ding pilan mong politikung pamunu king panyulung ning pamipagaral at Kalinangan Kapampangan.

Ing pamakyabe ra ding kayanakan king pamangising king Belwan at Lalang Kapampangan.
Nung marapat sa ini karing aliwa nang lugal ning Filipinas kasanteng, milako o mabawas a dakal ing racism. Mika-sikanan la, ma-empower ding Bisaya, Aklanon, at aliwa pa patye akit de legwan at kabandyan ing Amanu da't Amlat. Metung ya ining pamaintagun a sukat dang abutan ding pamunu lakwas na ing Pamuntuk GMA, Kagalang-galang a Jesli Lapus ning DepEd. Atbusan ye pu ing kekayung pamanungkulan ngening adwa yung banwang mitatagan. Mayap ya pung Pamana ini king yatu— pamangising karing miyayaliwang Amanu at Kalinangan ding Lugal Filipinas! Masaplalang Bayung Pamaalan Kekayu Ngan! Minum tamung salabat king pamanyagana king Banwa ding Amanu 2008!


[About the author. Aida Tanglao is a U.S.-based Kapampangan Filipino American. She has lived and worked in different communities in Pampanga, Manila, and in Nigeria when the Philippines was under a regime of civil rights suppression. She studied in public and private Philippine institutions (Lourdes Elementary School, Holy Angel University, University of Sto. Tomas), went to graduate school at Angeles University Foundation, and attended local colleges in the U.S. She currently does "action research," and catches up on what she missed in the meagerly filled libraries in Pampanga, particularly at the Pampanga High School (formerly Jose Abad Santos High School) where she taught for more than a decade. At age 27, she became a single mother to five children; she is now a grandmother to eight. Her personal and educational backgrounds provide the impetus for her to reach out and help in instilling cultural, moral, and historical consciousness among her people and in advocating correct child rearing approaches. She has embraced into her motherhood and patriotic obligations working for the Filipino's aspirations to spiritual and human liberation and contentment.]

-Posted: 2:22 AM 1/3/08 | More of this author on eK!
Nextnext