eK! is electronic Kabalen (eksite.com), a web-exclusive Kapampangan journal of ideas

aida tanglao
aida tanglao NGENI KU makasulat para keka . Mayap yang binunga ning diwang Angelenios ining lugal aptas ayni. Karing kalupa kung metwa king biye diaspora ding makanining kapaliaryan matalik lang mipansinan. Ding tubung Angeles a mikalat king yatu dakal karela minisip mipaburen ne ing Balen dang saguli mung likwan. Bunga ning pangmabilug yatu, ning makapangyatu. Materialismu, ngana ning Pilipinu at Castila. Kelingwan dane pin ing Angeles, Clark na ing inisep? E tala sasangkanan. Dakal nala at miyayalwa penibatan aliwang lugal ding pakatuknang Angeles, keta pang atyu ing kampu. Kaybat na pa ning akbung ning Bulkan at ning laar memamunta la Angeles ding mengaturan. Ding migbakwit pauli ning pamangaylangan o kabyayan ali ta buring sabyan a ala lang masabal king disan dang lugal. Dapot maralas den taung ali sadyang mikikilala malambat bayu la mika pamitayid at pamisaupanan.

Makanyan man paninintunan ku ing biye kanita. Ding tau mikikilala la. Mipapanatu patye miyakit la o mitagmutagmu king palengki, king pisamban at karing aliwang kapagmasusyan. Pisasabyan da ing kapaligiran, nung nanu ing sukat lingunan karing lugal. Atinan o katamtaman a kabilyan king biye, parepareo lang magmasabal. Ding mamuntukan makiramdam la karela. Ding Mamuntukan gagalangan la. Kayadwangan dala ding matwa't pengaring memalayan. Ali la anting pamunu o hari't reyna ding officialis ning Balen, talapagsilbi la. Patye mitutungali la o mitalamitam, misasalungatan king konsejo municipal ing pilalabanan mu ing paralan ning pamanupad karing gagawan king Balen. Ding anak mararandam la swala kapamilatan da ding karelang talaturu. Ding talaturu gagalangan dala king Balen at pakiramdaman.

Ing Balen at ding tau ila ding pisasabyan, ali persunalan, alang tumpuk-tumpuk, anti mong kampikampi. Malaya la isip alang nasang pansarili, ditak mu nung atin man at malagad mu, a mangaylangan kakampi o pangkat. Makanini keraklan ing pangayalwa na ning ngeni at ning napun. Metung nang pagmaragul ning Angeles ila pin ding keyang talasulat, talaulat, watas at mamaglalang. Menimuna ya keng pamaglimbag babasan ini. Agyang karen mung mangalating aklat pangandi ding tau Angeles miglimbag la at mikalat babasan. Agya pang balu tamu king ding Balen Makabebe at Baba ampong Wawa matwa lang pikabalwan a maki limbagan ketang panaun ding Castila.

Karing tau Espanya at Pangulung Amerika din tau Angeles biasa lang mikyabe dapot ali re kelingwan ing karelang Balayan king pamakyabe ra. Ngeni sana ini ya pa ing ipairal bangkanita ing lawe ra't pamangilala kekata ding taung miyabayan ngeni karing tau Korea, Australia at aliwa pa maging kalupa ning sadya, pipirmi taya king babo ing kekatang Bandera. Ding Parul Pasko ning Angeles itas la't pagmaragul king karelang legwan at kalinisan, pangadalise aske, kawangis ning simbul nang kababan ning Bingut ning Bethlehem. Ing kayabe ring aliwang obrang mengapalwa pauli ning kebalwan superhiway a penimunan ding tau Angeles lalto lang lakwas pauli ning gelingan da king pamanyulat. King pamandurut ning lakaran panliteratura ampong kalinangan anti neng miras king Kadwang Pangabayit ing Kabyasnan Kapampangan, Kapampangan Renaissance, king pamaltutu na ngeni ning bayung pamamaala. O wa ini po ing kanakung Pamaskung yampang kekayo: Neng mika tanka at haiku tana menibat ketang Banwang 2005, ngeni naman— Lalayag ke keni ing katlung aske Pamamoesya/Pangkawatasan king Amanung Kapampangan— Bungang Pamibule. Ding kekatang Mangatenakan Watas balu ku yambag da ing karelang gelingan at palwal lang lakwas mangalagu at mangalalam a Bungang Pamibule.

Bakit Ating Pasku

8 ning Disyembri, 2007

Kukuyad ya'ng aldo
Kakaba ya'ng bengi
Dirimla ing panaun
Alapap meralumdum–
Batwin singkasanting.

Libutad ning dulum
Kilub na ning dimla
Babo na ning yelu
Panayan ing Pasku–
Kebaytan nang Kristu.

Sala ampong pali
Ibye na ning Ginu
Dalan na ning Anak
Manatbus king Yatu–
Mitimawa kekatamu.

Makananu kaya
Nung alang Pasku
Nang ibye ning dulum
Nang ibye ning dimla–
Pusung pata, matang mapula?


11 ning Disiembri, 2007

Anya pin pala Pasku
Inampang Naka
Bang king sulu salangi
King daya mipali–
Maramdam ya'ng pusu.


12 ning Disiembri, 2007

Dinatang ne'ng Bingut
Swala na masikan
Malino mararamdam
Ding taung mipayaglip–
Mipakde la't mibalik.

Atin pang bukas
Bakas ning napun at ngeni
Tanda ning delanan
Miglakwan lang aral–
Ning Kadwang Kebaytan.

Malagung tubu
Maligayang pusu
Mitau ing lugud
Pauli ning bayung Apu–
Bayung bye karampatan mu!
—Ding tawling gulis miragdag la ngeni 21 ning Disyemri, 2007, neng Lalayag ke ing Bayung Aske Tula ausan kung "Pamibule't Pakibat"


[About the author. Aida Tanglao is a U.S.-based Kapampangan Filipino American. She has lived and worked in different communities in Pampanga, Manila, and in Nigeria when the Philippines was under a regime of civil rights suppression. She studied in public and private Philippine institutions (Lourdes Elementary School, Holy Angel University, University of Sto. Tomas), went to graduate school at Angeles University Foundation, and attended local colleges in the U.S. She currently does "action research," and catches up on what she missed in the meagerly filled libraries in Pampanga, particularly at the Pampanga High School (formerly Jose Abad Santos High School) where she taught for more than a decade. At age 27, she became a single mother to five children; she is now a grandmother to eight. Her personal and educational backgrounds provide the impetus for her to reach out and help in instilling cultural, moral, and historical consciousness among her people and in advocating correct child rearing approaches. She has embraced into her motherhood and patriotic obligations working for the Filipino's aspirations to spiritual and human liberation and contentment.]

-Posted: 1:11 AM 12/24/07 | More of this author on eK!
WHAT THEY SAY...

Oscar Balajadia (of Macau) writes...

Galamanu keka. Aro, kalagu na nining sinulat mung atin pang makatayid kawatasan. Sige, Atching Aida, samalan tamu, patse atin tamung panawun sumulat ta nang sumulat, neh? Napun pa mipasilip ku ketang kekang pangsariling-bulung. Manene kong binasa retang tawli mung sinulat uling pilasan ku la. Itang anak mung matenakan sumulat, Atchi, panaguyud mu neng sumulat mambag keng Pengari naka, sapiton me patse e bisang mamintu (biru mu, ne?). O sulung, mamun naku, angga na pa keni, kapayapan keka ampong keng laganas mung pibale-bale. Maragul a salamat, Atchi, keng pamakiyagum mu keng

-Posted/Via Email: Mon, 24 Dec 2007 17:26:07 -0800



Tony Mercado Peña (of Sasmuan, Pampanga, Philippines) writes...

Atsing Aida, antimunaman yabut ke ing galamanu keka kening dinake mung mapinung panyulat. Malino yang misiwala ing pamiyaliwa ning NAPUN keng NGENI karin king Angeles. Pamiyaliwa king kabyayan, masabal king kapaligiran, katutubung panugali, pamalakad king gobyerno, atap. Tutu pin ali mu king Angeles ing kapalyaryan ayni nune laganap mabilug a bangsa.

Atin pang BUKAS, oyni ing sangkan nung BAKIT ATING PASKU!

-Posted/Via Email: Tue, 25 Dec 2007 09:51:07 -0800



post Publish your comments...
Nextnext