eK! is electronic Kabalen (eksite.com), a web-exclusive Kapampangan journal of ideas

abel d soto
abel soto
Potang e na cu macasulat,
at carin pa tutung mimulat
tungcul qng ebun na ning tarat
at caring sugat a melambat,

potang e na cu macasulat
at carin pa icquit at sucat
deta nang bagueng mas maglambat
quesa caring sugat a magluat,

potang e na cu macasulat,
at penandamang mas masampat
deni nang sugat a miglambat
quesa caring ebun ding tarat,

potang e na cu macasulat,
at tutung maibug cung magsalbat,
at sisian que'ing ebun ning tarat
caring sugat a tutung megluat,

potang e na cu macasulat,
at ing cule cu, cule nang duat,
pauli ding sugat cung melambat
uling e na cu macasulat,
potang e na cu macasulat
uling e na cu macasulat,
acquit cu sanang mas malambat
ding sablang bague cung sinulat.
Potang e na cu macasulat,
tungcul qng ebun o qng tarat
o carin mang sugat cung megluat,
acua cu pa sanang mimulat
at acua cu pang mas maglambat
quesa qng ebun na ning tarat
o caring sugat cung miglambat,
uling masáquit ing susulat...
Potang e na ca/cu macasulat,


Macuyad a pauaga: Calupa na ning metung caring pecaburi cung talasulat a i Robert Fulghum, ing pecaburi cung uacas na ning libru, e ya uacas. Ini ya pin ing nung nucarin ne licuang James Joyce ing cayang obrang, Finnegans Wake , qng calibudtan na ning cayang pamangamanu, alang pauaga o tulduc o nanu pa man caibat na ning tauli nang amanu. Paniualan da ring aliuang mangabiasa a ing tauli nang e meyaring pamangamanu macataid ya qng pamangamanung ginamit na anting pamuclat qng cayang obra, a babie pamangaintuliran qng ala nang capupusang siklo ning libru. Sana pin tutu ita. Buri que'ita. Calupa na mu namang Richard Bach, a memupus naman qng cayang obrang, Illusions qng metung a cuit, a paniualan cung babie naman qng metung mu namang mas malalam a cabaldugan a ing cayang obra seria neng e dininan cayarian pauli ning cayang capaniualan a ring mamasa ila nang ating obligasiun a isundu ya ing cayang obrang e mepupus qng paralan a burianan dang ibie qng cayang obra a alang cauacasan. Carening aduang obrang a reni que quinua ing diua na ning canacung poema, uling calupa da ri Joyce at Bach, tinggap cu na ing catutuan a e cabang-caba agyu cung macasulat, at datang ing panaun a ati'nang aliuang gaua at misundu qng canacung obra *


[About the author. Abel D. Soto took up his certificatory double major course in Creative Writing and Performing Arts at Centre for Arts Foundation, Inc. in Quezon City. He also finished the Managing the Arts Program at the Asian Institute of Management in Makati City. He is a resident of Bacolor, Pampanga.]

-Posted: 11:22 AM 11/23/09 | More of this author on eK!
Nextnext