eK! is electronic Kabalen (eksite.com), a web-exclusive Kapampangan journal of ideas

abel d soto
abel soto neng cayi, ring "neng cayi"
mas maralas la pang maliliari
antimo uaring ring "neng caying" a reni
mas masalusu la pa pulayi
quesa quetang ilang dapat takiki
qng pulayi ning bie tamu queti.

neng cayi, ring "neng caying" a reni,
mas maralas quesa qng ali,
ilang mas susubung at papulayi
qng bie da ring dacal a laji,
nun inia sa't daca'lang malilili
at daca'lang bie ring misasalisi.

neng cayi, maralas ta lang lilimpi
reni nang miyaliuang "neng cayi"
nun inia pin sa't e cacati
ing albug na ning "pamag-baca-sacali"
bagcus lulumud na pa'ing dangal at puri
da ring taung siual at duajagui.

neng cayi, tutu nang macapacaili
ini nang catutuan a ini:
a reni nang "neng caying" a reni,
quesa quetang iuasan ta la reti,
ila pa ring pamintuan tang masiri
at aliua ring dápat a maliari.

neng cayi, e na tutung macauili
ing magsantung caring "neng cayi"
aguia mang deni, nen la mung "neng cayi"
at e la man dápat maralas maliari,
uling ing bie e ya sucat piraplan a pulayi
ban iti e ya maguing macapagal parati.

neng cayi, dapat tamung isipan ing cayapan a ini:
qng bie tamung lalacbayan queti,
at ing sablang qng bie tamu mangapaliari,
reni e la maralas ngan nune nen la mung "neng cayi"
a babie pamicatagun caring anggang sablang dai
ing samasan ya ing bie ra, mas maralas qng "neng cayi."


[About the author. Abel D. Soto took up his certificatory double major course in Creative Writing and Performing Arts at Centre for Arts Foundation, Inc. in Quezon City. He also finished the Managing the Arts Program at the Asian Institute of Management in Makati City. He is a resident of Bacolor, Pampanga.]

-Posted: 10:44 AM 11/19/09 | More of this author on eK!
Nextnext