eK! is electronic Kabalen (eksite.com), a web-exclusive Kapampangan journal of ideas

abel d soto
abel soto ("Potang tutu mu nang balu a e mu balu, carin mu pa mu tutung balu." —adsoto)

NENG CAYI, qng quecatamung pamagdili-dili, daratanga'na ca tamu ning camasalan a e tamu asajan datang qng bie tamu. Neng cayi, panandaman ta na mu cabud ing quimut na ning mayap a espiritu caring quecatamung pusu at caisipan rening miyayaliuang camasalan a buri nang sabian tamu caring dacal a tau. Neng cayi lalto ing dapat lunto qng masalang daque na ning caisipan tamu uling qng nasang atin tamung buring abalu at buring itabiling beluan caring quecatamung caisipan. Neng cayi, mas macasaup pala ing balu tamung e ta mu balu quesa quetang pami-isip a dapat pane tamung balu.

E cu balu nung baquet maralas, ring taung buri tamu ila pin retang taung dacal a balu, retang taung parating macasadiang miraque beluan at mapse mangabeluan a opiniun caring miyayaliuang bague tungcul caring miyayaliuang pigagap tamu qng bie. E cu balu nung baquet malaut la qng lub tamu at e ta la man sicasu ring taung dimut mu balu, uli na ning ini ing beluan at pami-isip a balu tamu at mitimid quecatamu ibat canitang mangalati ta pa mu.

Baquet caya, ne? Tabalu... E cu balu...

E cu balu nung baquet icua rang mitanam malalam caring quecatamung pusu at caisipan ing pami-isip a, "mas dacal ca balu, mas tangalan da ca ring dacal a tau, nung dimut ca balu, culang ca pangatau."

O't macanian, ne? Tabalu... E cu balu...

E cu balu nung tutu la ping mecasaup la ring escuela tamu ban mitulid ya iting pami-isip at panugaling e macariquil qng batas na ning cababan-lub. E cu balu nung baquet caya picpuc rang ustu caring caisipan tamu ning sistema na ning quecatamung educasiun a ing pecamabayat nang responsibilidad ning educasiun para caring magaral at talaturu ya pin ing paquibaluan la ring dacal a bagueng cailangan tamung ipasar at ituru caring pagaralan at tuturu tamu qng escuela. Dapot e uari macatula dapot macasora mu namang isipan a potang mengayari tana qng pamagaral at tinggap ta na ing galal na ning quecatamung beluan at abalu, at tutu ta nang mabeluan caring cursung pinili tamu, aliua man ing nung nanung balu tamu nune nung ninung balu tamu yang maguing susi ban macapanintunan tamu at mica-masanting a obra at pusisiun caring pipagobran tamo?

Quening panau'na ning ausan tamung "Information Technology," e cu balu nung baquet daca'la quecatamu ring magcapilit paquibaluan ing anggang agyu tamung paquibaluan. E cu balu nung baquet alang bisang malacuan at pailacuan qng beluan. E cu balu nung baquet ing beluan ya pin ing meguing pecabalu tamung picabaluan a subung canu qng tune paniulung na ning meto quetauan.

Sana pin...

Dapot ya pin caya? Tabalu... E cu balu...

At nung aliua ini, sanu? Nung aliua ini ing tune beluan a dapat tamung itanam caring pusu't caisipan tamu, sanu caya? Nung aliua ini ing dapat misundung miral at mandatila caring quecatamung beluan, sanu? Nung aliua ini ing beluan a macayagpang qng beluan a buri nang mililip ning Dios caring quecatamung pusu't caisipan, sanu?

Tabalu... E cu balu...

E cu balu nung ing mass media caya mas macasaup ya quesa quetang macasira ya ban miyalilan ya'iting caisipan tungcul caniting clasi ning beluan a picabaluan tamu ngan? E caya mas maralas qng ali, ing mass media mas lalu na pang pasicnangan ing bucut a catuliran tungcul qng beluan, mas lalu na pang titimid quecatamu a ing queracala' na ning beluan ya pin ing midala quecatamu qng dala'na ning tagumpe at camasalan?

Tabalu... E cu balu...

E cu balu nung baquet qng mass media ngeni mas lalto ing miyayaliuang dacal a pamag-parangalan da ring taung atiu qng obra at cayausan o casuyuan a ini, at nung baquet mipapabustan ing anti caniting capalaluan. E cu balu nung baquet daca'la ring susulat ngeni a balamu ing balu ra ya na mu ing maulaga. E cu balu nung baquet ating mapilan a talasulat ngeni a sumulat lang dacal a mangacabang articulo tungcul caring miyayaliuang bague ba' ra mung agulisac masican qng capamilata' na ning pluma at papil a ila daca'la balu, a ila mas ustu la quesa queca... a ica mali ca at ila ustu la uling ing beluan da ing ginamit rang paniucad qng caustuan a amanuan ra, a dapot ila mung pupuri at tatangal caring susulat da. E cu balu nung balu da rening clasi da ring talasulat a amanuan cu a "the more they try so hard to display what they know, the more they never miss to shout their real ignorance" (nung capilan mas pagcapilitan dang masampat a iyangyang ing balu ra, mas lalu la mung e sasalang gugulisac ing tune rang camangmangan).

E cu balu nung baquet gng mass media ngeni mas lalto ing que-‘lang-marine. E cu balu nung baquet qng mass media ngeni mas lalto ing beluan a mababo cabaldugan. E cu balu nung baquet qng mass media ngeni mas lalto ing miyayaliuang dacal a capagsistian a alang nasang sumaup dapot ban mung macapalto caparatutan a ing sinulat ra mas mabeluan ya quesa quetang pigsisti ra. E cu balu nung baquet "Mass media today has just turned out to be a big "shout out" of humanity's ignorance (meguing metung nia mung gugulisac a que-alang-beluan at camangmangan ing mass media ngeni).

Isip-isipan co pin rening cutang cabang susulat que'ining articulo: Capilan ta uari tutu nang balu ing balu tamu? Capilan ta uari tutung asabi a ing metung a tau tutu yang mabeluan? Ing lepara'na uari ning beluan a apanyicsic na caring cayang mapamintung utac iya mung pisusucara'na ning quecatamung beluan at tune cabaldugan?

E cu balu nung nanu la caya ring maguing paquibat tamu carening cutang? At ing mas maulaga sigurung icutang ya pin ing, "Cucutang ta la pa caya rening mebangguit a cutang caring sarili tamo?"

Nanu? Balu mo? Balu yo? Tabalu... E cu balu...

E cu balu nung mecatapilan ta na mo caya pequibat qng bie tamu caring acacatalamitam tamu aldo-aldo rening amanung, "E CU BALU". E cu balu nung mecatapilan ta no mo caya asambitla rening atlung amanu a alang capicacunuan, calungcutan, at camarinayan a panandaman caring pusu tamu.

Ica, balu mo? Balu yo? Acu, tabalu... E cu balu...

E cu balu nung baquet ala tamung panaun caring e tamu balu? At baquet sumangid na ning gugugulan tamung ustu ing quecaba'na ning panaun at bie tamu qng pamangalap at pamaniagdag beluan, capapaltan ta pa mu rin qng panaun para arapat masampat ing masiring pigagap a ini? Nanu pa uaring dapat tang abalung e tamu pa balu? Nanu uaring e tamu balung balu tamu?

E cu balu nung baquet rening cutang a reni e ta la buring tapucanan a ditac mu mang panaun caring bie tamu ban ta lang abalu ring... Capamu... ring sanu? Ua pin, ring sanu?

Tabalu... E cu balu...

At nung ngeni mong abalu ta la ring "ring sanung" a reni, nanu mo canita? Ninanu mo? Nu' ra cata idala ring balu tamu? Buri ta caya ing dasan tamu qng pidalan da quecatamu ring balu tamo? Pota itamu mung miqui-buri caniting parasan tamung a'ini a pidalan da quecatamu ring balu tamu? Pota ing balu tamu ya pin mu ing balu tamu? Pota ing balu tamu mu ing quecatamu mu at ala ta nang paquialam caring balu da ring aliua (nia pin sa casosora tamu potang ing beluan a miraras quecatamu ibat ya mu qng peliculang Spiderman).

At nung tutu ping dacal tana balu, nu' ta la caya sisicap rening balu tamu? Nu' ta la caya sasalbag rening balu tamu? Nanu cayang pangambul tamu carening balu tamu? Nu' ta la caya gagamitan rening balu tamu? Nanung bubunga ra quecatamu ring balu tamu? Mamunga la cayang lugud, capanayan, at capayapan ring balu tamu? Nucarin ya caya ing Dios caring balu at beluan tamu?

Nanu...? Balu mo? Balu yo?

Tabalu... E cu balu...

Tutung macalungcut isipan a ngening panaun tamu, "man is being defined by what he knows" (miririnan yang cabaldugan ing tau agpang qng balu na). At nung ing cabalduga'na ning tau macasalale namu caring balu na, macananu caya potang e na na balu ing balu na? (Cababa na siguru maguing valor o ulaga ning tau nung ing pisusucaran mu mu qng cayang ulaga atiu ngan mu qng balu na.)

E cu balu nung balu yu ini, at e cu balu nung ayunan yu ini: Nung capilan tamu isipan at uculang balu tamu, carin tamu tutung e balu. Dapot potang tinggap tamung e tamu balu, carin ta pa mu tutung balu... uling caniti magumpisa ing tune beluan. At iti e ya cabud manatiling beluan, nune mibabayu yang asque qng asque na ning ausan tamung CABIASNAN. E cu balu nun baquet e tamu cucutang nung ing beluan caya atin yang maguing sapat at malalam a ulaga at cabaldugan quecatamung lelangan nung iti manatili nia mung beluan a cabud na macadatuc caring quecatamung caisipan.

Balu ta la ngan caya ring paquibat carening cutang?

Ing tutu na nini, E CU BALU... TABALU... (o't) E CU BALU... Ing balu cu mu tungcul caniting pisasabian ya pin ing "E CU BALU".


[About the author. Abel D. Soto took up his certificatory double major course in Creative Writing and Performing Arts at Centre for Arts Foundation, Inc. in Quezon City. He also finished the Managing the Arts Program at the Asian Institute of Management in Makati City. He is a resident of Bacolor, Pampanga.]

-Posted: 7:59 AM 10/29/09 | More of this author on eK!
Nextnext