eK! is electronic Kabalen (eksite.com), a web-exclusive Kapampangan journal of ideas

abel d soto
abel soto (Metung a macuyad a cuentu)

QUETANG MINUNA malilili cu qñg sarili cung misteriu. Cailangan queng panintunan ing sarili cu qñg pecamalalam nang daque ning canacung capigaganacan ban macapantun cung carapat-dapat a pipaglacbayan para qng canacung ausan a "Artist's Date." Pigcasaquitan cong culculan ring mengalabasan a capaliarian qñg bie cu a mapaliaring munie quintal caring canacung sensibilidad. Daramdaman que ing caduang gamat na ning relo a pababa na qñg lupa na ning panaun, sisitsit na qñg balugbug cu, "Ume na cang matudtud… ing bucas metung na ne namang panibayung aldo…" Ua, Sabadu pin bucas at ala cung obra. Dapot ninu mong mumulangan cu? Sobra cu capagal… a milalablab sabian ing catutuan. 'Nia aisip queng sidian ing tauli cu para qñg aldong ita at caibat memaligua cung minyipiliu at tiglus cu na qñg pamanudtud.

Magumpisa ya ing istorya cu qñg metung a pitatacasan silab… ing silab a manibatan qñg calabing-adua nang palapag ning metung a gusali. Discoloradu no ring pader, mitmu na lang mantsa a menibatan caring tatagas a talatugtug danum a macadiquit caring quisami. Ulatang e ya masesese ustu ing gusali.

Balang ditac a penandit daramdaman que ing matarling nang inge ning elevator a e malaut qñg lugal cu. Ding biga ning asuc megumpisa nong mas mecapal at lilunga' na no ring mas mangatas pang palapag qñg gusali.

Dintang ya ing metung a tau a e cu aquiquilala at lebasan mi la ngan ding aliuang cuartu cabang panagalan mi ing asuc a papunta banua. Ing mapait nang epectu ning asuc tutu nang macasulasuc cabang paucyat cami. Balang tacbang babie yang cascupan qñg salu cu, at ing pusu cu culang na mu lucsu ne qñg bilis na ning cayang tibuc a balamu pila’ na cung aldo pupulayi. Penandama' nang mengaina ning utac cu. Ing balang curap cu mitutuquian yang macabulag a maputing sala, at bayu cu pu man mibaui careting tuqui-tuquing pangasilo, icua mi nang miras qñg pecatuctuc na ning gusali a alang nanu pa mang laman nune icami. Caras ming caras quening pecatuctuc na ning gusali, anti que mong anac pasibayu a pula-pulaying mamialungan at magsaya qñg malaya at blangcung espasyung disan mi.

Tiquian cu ing masalusung ala nang direcsiun a pulayi ning abe cu a angga ngeni e cu pa mu rin aquiquilala, at sisio que qñg tula. Belicda' na cu at linaue na ing distansia pilatan mi, at tinaglus yang milayi qñg metung a pitalnanan. At carin que pa mu aquilala ing taung ini a nandin cu pa tutuquian. Qñg salusu na ning pulayi na, misacab ya at e na icuang mitalan quetang calele nang pitalananan… Macamulala at mitmu qñg tacut cung iquit ing pangabaldug na anting municang-basan a sasalpuca’ na ning angin. Dimdam queng ginulisac, "Ibulus mu cu!" Buri que mang isalba quetang pangabaldug na dapot tauli na cu at ala nang cuenta ing nanu pa mang arapat cu. Ing siuala cu bicnala' na ning canacung cabiguan at capagmalunan. Ala cung agaua nune ing alben yang mananabu qñg cayang camatayan… ing canacung sarili… laun a pangatau… menabung napun.

Miguising cung macaquera qñg butil-butil a pauas. Daramdaman que pang daramdunga’ na ning pusu cu ing canacung salung maibug nang maspac. Paquiramdam cu buri cu neng isuca ing cabilugan cung calamnan. Dapot angga ngeni daramdaman que pa mu rin ing guilisac na ning milabasan cu, sactung canabu-nabu na pa mu qñg amlat na ning e mayayaquit a camasalan, pasibayu ngana, "Ibulus mu cu!" Mibangun cu't tinicdo qñg pagqueran cu at inos que ing lupa cu at mequiraque cung mapilan a penandit qñg sarili cu carapa' na ning salamin. Pepasalamat cu qñg Dios a paninap mu ing sabla… Uling e balang paninap mumuli qñg dapat a mayap, lalu na nung iting paninap bangungut ya palang manenayang lumaya qñg presidio ning capigaganacan a ngeni cu pa ayaring abulus qñg metung a malaya at masalang yatu na ning pluma at papil.


[About the author. Abel D. Soto took up his certificatory double major course in Creative Writing and Performing Arts at Centre for Arts Foundation, Inc. in Quezon City. He also finished the Managing the Arts Program at the Asian Institute of Management in Makati City. He is a resident of Bacolor, Pampanga.]

-Posted: 8:12 AM 9/4/09 | More of this author on eK!
Nextnext