eK! is electronic Kabalen (eksite.com), a web-exclusive Kapampangan journal of ideas

abel d soto
abel soto Nu' cu ume
potang ing aldo
e na na acua pang tando?
Nu' cu ume
potang ring dalan
sanga-sanga la't sucalan?
Nu' cu ume
potang ring paquibat
malulumud la caring cutang?

Nu' cu ume
potang ing amanu
lalapastanga' na ne ning tau?
Nu' cu ume
potang ing bandi cung sabla
meuala ngang anting bula?

Nu' cu ume?
Ua, nucarin pin?
Casaquit a cutang,
dapot ume cu pa mu rin ...
queta man o carin.
Ume cu
nung nucarin ing bulan
malagu yang macatiman.
Ume cu
nung nucarin ing ilug
mamagus ya't e malabug.
Ume cu
nung nucarin ing beluan
durucu ya qng cabiasnan.

Ume cu
nung nucarin ing amanu
micatauan yang tau.
Ume cu
nung nucarin ing "ala"
miguit ya qng sabla-sabla.

Ume cu, ua,
ume cu pin!
Anggang atin bie
ume cu't ume
quetang cacarinan
nung nucarin, capilan man,
e cu na pasibaiung sambitlan
ini nang maragul a cutang:
"Nu cu ume?"


[About the author. Abel D. Soto took up his certificatory double major course in Creative Writing and Performing Arts at Centre for Arts Foundation, Inc. in Quezon City. He also finished the Managing the Arts Program at the Asian Institute of Management in Makati City. He is a resident of Bacolor, Pampanga.]

-Posted: 5:26 AM 6/1/09 | More of this author on eK!
Nextnext