eK! is electronic Kabalen (eksite.com), a web-exclusive Kapampangan journal of ideas

abel d soto
abel soto ATIN PUNG mig-email canacu at inauad na ing sumulat cu aguiang nanu canu at maguing macananu ya man canu cacuyad tungcul cang Apu Cung Crissot a magmasusi qng cayang quebaitan canitang Enero 27. Cayagna' ning email a ini ing metung pang email a menibat qng metung caring caclasi cu canitang "high school" a memitang sumulat na cu man canu tungcul qng "reunion."

Deni pung emails a reni ilang sangcan nung baquit mengangas cu pung sumubuc sumulat tungcul careting bague.

Nung mas pigunaman ta' yang mitmung kalalaman ing salitang "reunion" (pamitipun o pamisanmetung pasibayu), dacal tamu acuang mangasanting a lisyun a mapaliaring agamit tamu qng quecatamung pami-gunam caring sara-sarili tamung bie, lalu na nung ataid taya ing amanung ini qng Banal A Casulatan.

Canitang I Jesus sinubli yang mebie at pepaquit ya cang Maria Magdalena (aliua ya ing babaying meracap maqui-pangalugud), tinubud ne ing santa ban ibalita na caring cayang alagad/apostoles ing tungcul qng pangsubli ng mebie.At ing mas maulagang tubud ya pin ing pepasabi na caring alagad na ing magbalic la Galilea at carin ya maquiquit carela (uuyyyy... balamu atin la namang "reunion" ne?).Iti ing sangcan nung baquet i Maria Magdalena meyaus yang "Apostola Apostolorum" (Apostoles caring Apostoles/Apostle to the Apostles).

O'ini ngeni ing maulagang cutang: Baquet qng queracal-dacal da ring lugal a nung nu' ya maliaring maquiquit i Jesus caring queang alagad, baquet qng Galilea na piniling mequiquit carela? Nanu caya ing malalam a casangcanan caniti? E maliaring ala.Uling e ya gagauang metung a pamamili o desisyun ing Guinu tamung Jesucristo a alang mas malalam a cabaldugan o casangcanan.

Agpang caring "Bible Scholars," at "theologians" lalung-lalu na i Bishop Chito Tagle, STD, ing Galilea e ya mu cabud lugal; ing Galilea metung yang capaliarian, metung ya namang "capanamdaman" a miqui-maulagang cabaldugan qng bie da ring queang Alagad.(Galilee was not merely a place of meeting for their "reunion"; Galilee was an event, a feeling, a personal historicity, like many other significant places in the Bible, to name a few: Jordan, Cana, Judea, and Emmaus.)

Qng Galilea carin megumpisa ing "love story" da ri Jesus at ding queang alagad.Quening lugal a ini, meyaus la ring labing-aduang alagad.Queni megumpisa ing dacal a maulagang bague caring bie da ring cayang alagad, antimo ing carelang misiun at pamanuqui qng Guinu tamung Jesucristo.At canitang inisip da na ring alagad a mayari na ing carelang pag-asa qng pangamate ng Jesus, queni qng Galilea na pasibayung binyayan Jesus ing carealang misyun: be a disciple to all nations.Ing tauli nang amanung Jesus carela qng ebanghelyu nang San Mateo ,"Cayabe yu cu angga qng cauacasa' ning panaun." ("I am with you always until the end of time.") Nun inia sa't maragul ya cabaldugan ing lugal a Galilea caring cayang alagad at pati na mu rin cang Jesus.

Pamigunam:

Minsan, calupa da ring alagad, cailangan tamu mu namang magbalic caring quecatamung sara-sariling "Galilea." Paniualan cu na ing balang metung quecatamu atin yang sarili nang "Galilea" a dapat ng balican."It pays to go back," sabi na pin ning metung a abasa cung "essay." At maralas, caibat na ning dacal a miyayaliuang pigagap at capagalan a quecatamung delanan o daralanan qng casalucuyan, lalung titibe at babayat ing casangcanan nung baquet dapat tamung "magbalic caring quecatamung Galilea."

"It is when we consciously and willingly decide to go back to our own "Galilees" that we are able to meet our Lord Jesus Christ again, and see one another once more in a new light and perceive things anew in a new perspective," sabi na ning metung caring paboritu cung theologians. E masaquit paniualan ing catutuan na minsan, atiu qng pamagbalic ing susi na ning quecatamung caganapan bilang tau... bilang maglacbe queti sulip.

Ngening cayaldaua' na ning metung caring daquilang poeta na ning lalauigan Capampangan, buri cung samantalan ing pamicatagun a ini ban agcatan cu lang magbalic ring canacung camag-anac at calupang memale' ning Baculud a balican ya ing metung caring maulagang "Galilea" na ning quecatamung panga-Soto at panga-tau-Baculud.Labis cung lulungcut potang ditac-citac apapansinan cu na ala na yata caring camag-ana' cu ing atin pang sigasig ban "balican" ing macabaldugan a "Galilea" ning quecaming dai. Meuala nia cabud ing Sapni Ng Crissot Literary and Cultural Foundation a anting bula. Caracal cu sana taguimpan para qng Foundation a ini, dapot ninu pa caya ing sican a lub at sigasig ban biayan yang pasibayu?

Canitang Eneru 27, bayu cu linub qng obra dinalan cu qng arap na ning monumentu ng apu cung Crissot at maybug cung mipaquiac uling balamu panamdaman cu ing lungcut na ning metung a taung tutung migmasabal qng queang Cultura, a ngeni ala na yatang atin pang nasang palablaban ing undap-undap a sulu ning pamana nang Crissot quecaming dai na at caring tau-Baculud.

Iti ing canacung taguimpan, ing sana miguising yang pasibayu ing malacac a Sapni Ng Crissot, ban isulung at payabungan pa ing queang licuan a pamana.

Sana , e tamu cacalinguan ing panagcat na quecatamu ning Guinu tamung Jesucristo: ing magbalic tamu caring quecatamung "Galilea" agyang malagad mu.Ini ing sangcan nung baquit minuli cu at migbalic cung pasibayu qng balen cung beitan.Pota queni que aquit pasibayu ing tune cung misyun at acatabnung pasibayu i Cristo caring capara cung tau a malambat cung e iquit at bayu cu pang iquit qng canacung "Galilea."

Mipapangadi tamu sana... a e tamu sana mag-alinlangang mibalic caring quecatamung "Galilea" (not merely the places, but the people and the events, the feeling and historicity that we need to rekindle).

Going back to Galilee...going back to God.

Mane nobiscum Domine!


[About the author. Abel D. Soto took up his certificatory double major course in Creative Writing and Performing Arts at Centre for Arts Foundation, Inc. in Quezon City. He also finished the Managing the Arts Program at the Asian Institute of Management in Makati City. He is a resident of Bacolor, Pampanga.]

-Posted: 7:25 AM 2/13/09 | More of this author on eK!
Nextnext