eK! is electronic Kabalen (eksite.com), a web-exclusive Kapampangan journal of ideas

abel d soto
Baquet dalit cu?
Ua, baquet pin?

Dalit cu sumangid da man rening casangcanan:
ing balen a patula cacu
patangisan de ring abusadu;
ing upayá na ning amanu
cacalinguan da ne ring cayanacan tamu;
ing leguá na ning amlat tamu
e ra ne sicasu ring alang mapangalinguan a tau.

Nung e cu dalit, ninu?
Ua, ninu ing dalit para canacu?

Idalit da uari dening politicu reni nang amanu:
pabustan que ing upaya na ning Apung Guinu
'ya ing tune mag-ari qñg mabilug a yatu;
igalang que't tangalan ing upaya na ning botu
ban manaig ing catutuan a tutung sagradu;
pusanan que ing cruz na ning pangasambut cu
uling qñg casambutan, atiu mu rin i Cristu?

Nung e cu dalit, ninu?
Ua, ninu ing dalit para canacu?

Idalit da uari dening cayanacan reni nang amanu:
ipagmaragul que at 'yang pacamalan cu
ing Amanung Sisuan a minie beluan cacu;
canacu yang biayan ing upaya ning amanu
at ipaglualu que ini nang bucud mung bandi cu;
pasulungan queng tune nucarin man miras cu
bandi man at upaya, e ya ipaglibe cu?

Nung e cu dalit, ninu?
Ua, ninu ing dalit para canacu?

Idalit da pa uari dening mengalinguan a tau reni nang amanu:
pane yang ipiblas cu qñg pangatau cu
ing leguan at gloria na ning milabasan cu;
icuintas que at isalbag anting mal a pabanglu
ini nang malagung amlat a babie dangalan canacu;
caring tutuquing dai, pane yang ipaganaca cu
at isuquilquil carela angga na qñg mate cu.

Inia pin... dalit cu!
Ua, dalit cu pin!


[About the author. Ing sinulat caniting poesia metung ya caring apu ng Juan Crisostomo "Crissot" C. Soto at miembru ne ning Sapni Ng Crissot Literary and Cultural Foundation. Taga-Sta. Ines, Bacolor ya at atlumpulu't lima neng banua edad. Quinangwa yang one-year certificatory double-major course qng Creative Writing at Performing Arts qng Center for Arts Foundation, Inc. at casalucuya' nang paninapan ing aquit neng pasibayu qng entablado ing metung caring peca-sicat a sarzuela nang "Crissot," ing "Alang Dios!"]

-Posted: 7:06 AM 11/28/08 | More of this author on eK!
Nextnext