eK! is electronic Kabalen, a web-exclusive Kapampangan journal of ideas

jun sibug
paterno 'jun' c. sibug jr
CARING MACABASA

Queca cabalen, panupaya mu sana
Caring picudta cu mayayantala ca
E cu imbutan ing mayaliñgasñgas ca
Ditac a panaun idiquil mu sana

Pansariling cayapan e cu imbutan
Nung ing calibe na ing quecang canauan
Para qng Balen a dati titingñgalan
Mepupus iti uli ning casaquiman.

Deting macatuqui dapat lang sanacan
Qñg isip at pusu mu itanam
Balen caluguran queyang tatañgisan
Ganap sanang laya sucdul paninapan

Ipamalita mu at idaque sana
Caring cabalen at quecang caquilala
Magsimula at ngeni magumpisa na ya
Balen Pilipinas tune malaya ya.

*

Atin pung mitatag metung a aguman
Parasan na niti mipmung casantiñgan
Ding macabasa e da cacaliñguan
Nung ‘tañgan apusan tagumpe dasan

Ding pamuntuc ning balen cacung agcatan
Casipagan at catapatan diquilan
Masinup, maca-Dios tamung cabiayan
Alang patac o ditac mang calaraman.

Caring cacung cabalen tune mamasa
Micacalugud sa't misasaupan la
Pisasabian ning balen maquialam la
Qñg mipmung galang at dañgal carela

Cacung panalañgin caring cayanacan
Pamamintu't pagalang yang pagsicapan
Sabic queng cabiasnan sañgil queng caraucan
Pagasa ning layi't mitatanam cayapan

Balen a tibuan cacung paninapan
Miriquilan canauan at capayapan
Misaplala't panatag alang angganan
Titingñgalan da ding dacal at apusan

At queca canacung Mutyang Pilipinas
Tinap-tinapan cu ñgeni at qng milabas
Mibalic na sana ing dati mung ticas
Mabilug a yatu, Iyas da ding Iyas

*

Aslag ning banua sucluban me't sicapan
Balen tibuan at queragul quecang iñgatan
Mabilug a yatu, ala yang caparang
Maguing calibe qñg puso't caisipan

Lugud cu queca Balen tutung dalise
Anti queng Pilipinas alang capante
Lugal cung beitan, banua cu at carinan
Sinta cung cargan angga qng capilanman.

Balen cu tutunguen ausan dang maluca
Libutad ning buquid ing bie payapa
Tanaman a pale, atbu caya
Qñg gabun ing Mayupaya pepataba.

Cacung acaguisnan, balen cung maticas
Ayup carin queraclan, cayabe ding Denas
Ating tarat ampon pipit, lorong uatas
Luclac, Baco, Pugu, Tagac, Mayang Costas

Ayup ampon culisap miyayabe la
Aldo-aldo babie tula't ligaya
Mecad bengi, o abac caya
E cuculang qñg pusu ing tula at saya.

Ining alitaptap catuclip ning sala
Quindat-quindat, buldit quinang-quinang ya
At qñg pamitipun sula-sulapo la
Meñgaring sulu quislap-quislap la pa.

Yanaman ing siyuk malucang culiglig
Cayapan ning sunis, a matarling yang tigtig
At qñg pamamun ning aldo yang mumusig
Consiyertung regalo sunis manialicsic.

Dening tulang, mari posa't lipactung
E mipaindatun qng patingapun
Caring mulang madicut, tanque at bulung
Panagalan tuquian nucarin la mapun.

Ing gamu-gamu qng sala masilo ya
Mayap nang aral indu na pabusta'na
Pangasalangi na ning sulu datang ya
Qng aluk ning api lubus maguiguiam ya.

Musmus ya pa'y Rizal mengamanu ngana
Indu cu metung alimbaua gueua na
Qng sala't indak ning api ning gasera
Ing gamu-gamu, pac-pac na meduluc ya.


[About the author. Even in college, Paterno C. Sibug Jr., was known as Jun Sibug. He took his elementary education at Holy Family Academy, his high schooling at the former Sacred Heart Seminary, and spent college at the University of the Philippines. Mr. Sibug now lives in Chicago, Illinois and is presently working as a Pension Benefit Administrator. His main references are mostly books from the Newberry Library Filipiniana Collections and University of Illinois in Chicago. He cares about history, and is always proud to have been born a Pampango.]

-Posted: 9:20 PM 10/17/08 | More of this author on eK!
Nextnext