eK! is electronic Kabalen, a web-exclusive Kapampangan journal of ideas

papa osmubal
oscar balajadia AII, ING pamaniulat pin naman ne? Quening susulat mu, nung melimbag ia, ditac a pamagcamali dala me rugu cabang-caba ning bie mu't manatili ia angga man quetang mecapa-mun na ca queti masala't ume queng sumangid niting bie.

Misulat cung aclat a maquipamagat a 'O Jo Nu Ca Menibat?' quetang milabasan a banua a pepalual nining Pamantasan ning Mal a Angel (Holy Angel University) queti Lungsud ning Angeles. Iting aclat a 'O Jo Nu Ca Menibat?' minuna ia naman linto (ing caiang caisipan at balangcas) queti eK!. Pilan nang banua canini ing milalabas. Malambat-lambat na. Oneng aliua ing lambat na't pulai nining panaun ing buri cung ipaiabut carening babasa, nung e reni rugung camalian at pamitalabu na nining aclat a 'O Jo Nu Ca Menibat?'. Casi macanian man pacacalale (pacaca-alalai) cong terucan at penigaralan dening amanung megamit queng aclat a mesabi, mitaquid at mitaquid ia rugu't mengatalmac quening daralanan na nining aclat. Ania ini dapat iang mitulid queti.

Aii, map namu iacu ing minunang menaquit. (O pota uli'ng i acu mu ing memasa quening aclat at caralasan naman macanini ing maliliari queng pamaniulat at careng misulat?). Macanian man, queng quetasan cung puluc, iacu na ing dinucu't meniauad capanupaian queng cacung sarili carening camalian a asulat cu quening aclat a 'O Jo Nu Ca Menibat?'. Queni malutu-lutu cu palung at mangale-ngale lua a arapan dening camalian a reni ba ne man mipaisnaua (mipasno) ining cacung pilubluban a quiquimquim careni.

O rene—

Olen


O't dugu capagmaragul cung sinabing ining 'olen' ning Capampangan ibat ia uari sa quening sabing 'hole in' ning Ingglis. O casi naman ia ini ing pamisabi-sabi ra't pamicacasundu rening acacasabi cung mailig mu naman queng pamanigaral amanu. Deni man caiacaiabe (caiabe-abe) Tagalug a manigaral amanu ia mu naman ing apipisabi mi ining 'olen' a isipan ming menibat ia queng sabing 'hole in' na nining Ingglis. O casi canu ining 'olen', patie pamialungan ia, papalub ia (=in) queng busbus (=hole). Cabira-bira queng pamamasa cu atuclasan cung mali ia pala ining anti canining pamisip. O casi ining 'olen' tamu pisan ne nining sabing 'guli' nining Bahasa a mangabaldugan 'marble' queng Ingglis. Nanu pa ta, nung e taganang ibat queng sabing 'hole in' ining sabi tamung 'olen', mecad pamibaiu na ne't capatad nining sabing Bahasang 'guli'.

Tulun, Patrunan, Patulunan


O ini mu naman ing maragul a camalian a merapat queng aclat a 'O Jo Nu Ca Menibat?'. Sinulat cung ing 'patulunan' pamibaiu ne nining sabing 'patrunan' (patron + an= patronan) a malaCastilang sabi. Mituag ia ing sabo, casi ining sabing 'patronan' (patrunan) ala iang quebaluan quening sabi tamung 'patulunan'. Casi ing 'patulunan’ meiangu ia queng matuang sabing 'tulun' ning Capampangan a mangabaldugan 'saup'. Ania queng anti ini ing 'patulunan' mangabaldugan iang 'catulun, catulung' o 'talasaup'. Ining 'patulunan' mangabaldugan ia uaring 'abugado, talapagtanggul' carening matuang Capampangan. Macanian man ining sabing 'patronan' (patrunan) minauig ia pangasabi at cabaldugan quening 'patulunan', e la pareu pangagaua reni. Ania macanian iang sinala ining misulat quening aclat a 'O Jo Nu Ca Menibat?'. Ining sabing matuang 'tulun' ning Capampangan pisan ne ining sabing Tagalug a 'tulong' (tulung) at Bahasang 'tolong' a pare-pareung mangabaldugan 'saup'.

Parusa, Dusa, Peliza


Ini ing pecamaragul at pecamacarine camalian ning aclat a 'O Jo Nu Ca Menibat?'. Misulat ia queng ing 'parusa' ning Capampangan ibat ia queng sabing 'peliza' ning Castila a mangabaldugan 'pamaluan'. Ining sabing 'peliza' nining Castila pisan ne ining sabi mu naman a Castilang 'palo'. Maracal a mengabaligo queng sabing 'peliza' at sinabi ra (cambe cu) na inin ing ibatan nining sabing 'parusa'. Giluan de ing Tabacuan! Ini palang 'parusa' cabud tambing cung asanac na ibat ia queng sabing 'dusa'. Ania ing pamigaua queng amanung 'parusa' anti ini ia pala rugo— suglung a 'pa-' at iamut a 'dusa'. Ania anti ia canini— pa + dusa = padusa, a ia naman meguing 'parusa'. Macanian queng abalu aniang abalu cung ing 'dusa' ibat ia queng sabing 'dosa' nining Sanscritu. Ining 'dosa' ning Sanscritu mangabaldugan iang ‘saquit, casaquitan, panasaquitan’ calupa nining quecatamung sariling 'dusa'.

Tapaian, Catapa


Ining sabing 'tapaian' mebangguit ia naman queng aclat a 'O Jo Nu Ca Menibat?'. Carin mebangguit na ining sabi tamung 'tapaian' ibat ia queng sabing 'tapa' ning Castila, uli'ng ining 'tapaian' canita gagamitan de bilang lunanan at pipamulucan 'tapa, o patapa-tapa' quetang panaun da reng Castila. Ini metung ia naman pamibaligo queng aclat a 'O Jo Nu Ca Menibat?', casi micatagun mung ining 'tapaian' tamu mitugma ia rugu queng sabing 'tapa' ning Castila at micatagun pa rugung ginamit taia ing 'tapaian' bilang lulanan at pipanggauan 'tapa'. Ing camatutuanan pala ining 'tapaian' tamu taganang ganap iang sabing Capampangan at e ia ibat queng Castilang 'tapa'. Ining 'tapaian' tamu pisan ne ining sabing 'terpayan' nining Bahasa a calupa na nining quecatamung 'tapaian'. Ania ing 'tapa, catapa' a daque na nining mengabalbal a 'tapaian' e ia naman ibat queng 'tapa' nining Castila.

O reta rugu reng pamilisia na't pangabalatung nining aclat tamung 'O Jo Nu Ca Menibat?'. Pasalamat a maragul at queni meganap itang nasa't caburian tamung itulid la't tanggapan a macaducu't mababa lub (bista't man maplas ing anti canining dapat). Ania queng anti ini, ining sacdu-sacdu cung pilubluban mipaisnaua neng baguia.

At baiu que sa pututan ining cacung mipapacabang catac, bustean da sa'ng ipaiabut que ining macuiad a pamipalino.

Quetang paunang-amanu nining aclat a 'O Jo Nu Ca Menibat?' a sinulat nang mal a guinung Dr Lino Dizon, ning Tarlac, na ing sabing 'Jo' canu maliaring ibat ia que sabing 'chocoran'. Queng aclat a 'O Jo Nu Ca Menibat?' pepaltauan tamung ining sabing 'Jo' ibat ne man queng sabing 'Joe' ning Ingglis, at pepalatauan tamung linsut ia ining amanu carening puruc a macapadurut carening dating 'miltary bases' da reng Americanu queti Pampanga (at Zambales). E ta ne pacacaba ining pisasabian, dapuat ining abangguit nang Dr Lino Dizon a sabing 'chocoran' (a maquiiamut sa uari canung 'cho') ia ing pisan ning sabing 'Jo'. Maragul ia daralan a suliranin o problema ining sabing 'chocoran' pauli ra rening sangcan a macatuqui— Mumuna, ining 'chocoran' nung agaganaca tamu miusu ia quetang panaun a 1970s. Pepausu neng Rod Navarro careng patalastas na careng TV canita. Papatalastas neng Rod Navarro ing metung a palaman a 'chocolate' (=cho), at sasabian ne ing sabing 'chocoran', ba iang mitugma ing sasabian at papatalastas nang palaman a 'chocolate' (cho). Ining ‘chocoran’ mangabaldugan iang 'caluguran, caiabe' at ini ibat ia queng Castilang 'socorro' o saup, o 'tulun' queng matuang Capampangan. Ining 'chocoran' pamibaiu ne nining sabing 'socorroan' (socorro + an) a mangabaldugan 'saupan'. Ining 'cachocoran' ia mu naman ining pamibaiu nining sabing 'casocorroan' (ca + Socorro + an). Ania e ta balu tagana nung ining 'socorro' (casocorroan, socorroan) ia ing ibatan nining sabing 'Jo', samantalang malino ining ibat ia carening balen a macapadurut carening 'military' bases' nung nu memanucnangan la rening sundalung Americanu canita. E uari pane ta ne man sasabian careng Americanu canita ing 'Joe' (Jo), ne?

Cabaragbag at cata-cata pu ing abalu tamu quening aclat a 'O Jo Nu Ca Menibat?', at dening apat a camalian a rening queti mesambitla at metulid (capamitalan ning quebaban lub) tumpacan mo pang macataladuang-pulu, e ro acuang alumud dening lacsa-lacsang camatutuanan a apag na't dadaque nining aclat a 'O Jo Nu Ca Menibat?'. Ining misulat a iti tungguean de sang maulagang daque na nining aclat a 'O Jo Nu Ca Menibat?' a nung nu e ia maliaring icauani't iuale. Queni ne pa mu pu mapupupupus ining pamisabi-sabi.


[About the author. Papa Osmubal is Oscar Balajadia of Magalang (Well, don't get fooled by that name), now a Macau resident (Sorry, where?) and married to a Chinese local (How? How come? Why?). He has been a Catholic seminarian (OK, he once opened a book at an exam in Latin and Romance Languages—but who in frigging hell did not?), a Catholic missionary (Oh, the rosary is the answer to our country's economic problems and to your alcoholism and addiction to nicotine!), a bookstore staffer (Yes, sir, listen here, we know it is urgent, so your book is on its way from Guangzhou and will be here in 8 months!), a librarian (Oh, it's Friday the 13th and I am not putting 666 as Dewey call number on this bloody book!), and a teaching assistant (OK, pal, I know you prepared for the exams so I will check and mark them!). He is currently a teacher (yawn) and has an M.A. in English Studies (yawn even more, nod off, and then snore) from the University of Macau (sorry again, where?).]

-Posted: 2:55 PM 4/1/12 | More of this author on eK!
Nextnext